ރ. މީދޫ ފެންފިޔާޒުގޭ މުޙައްމަދު އަނަސްގެ މަރުގެ މައްސަލައިގެ އަޑުއެހުމެއް ބުދަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
މި އަޑުއެހުމަކީ މި މައްސަލައިގައި އަނަސް މަރާލުމުގައި ބައިވެރިވުމުގެ ކުށުގެ ދައު ވާލިބޭ ސިމާހު މޫސާގެ ފަރާތުން ހުށައަޅާފައިވާ ދިފާއީ ހެކިންގެ ހެކިބަސް ނެގުމަށް ބޭއްވި އަޑުއެހުމެކެވެ. އޭނާގެ މައްޗަށް އުފުލާފައިވަނީ ތޫނު އެއްޗެއް ބޭނުންކޮށްގެން ޤަސްތުގައި މީހަކު މެރުމުގައި ބައިވެރިވުމުގެ ކުށުގެ ދައުވާއެވެ.
މި މައްސަލައިގައި 12 އޭޕްރީލް 2022 ގައި ބޭއްވިއަޑުއެހުމުގައިސިމާހު މޫސާގެ ފަރާތުން ހުށައަޅާފައިވާ ހެއްކެއްގެ ހެކިބަސް ނަގާފައިވާއިރު، އަނަސްގެ މަރުގެ ޙާދިސާ ހިނގިއިރު، އޭނާއާއި ސިމާހުއާ އުޅުނީ އެއްކޮށްކަމަށް އެ ހެކިވެރިޔާ ވަނީ ބުނެފައެވެ.
ހެކިވެރިޔާ ބުނެފައިވާ ގޮތުގައި އެރޭ އެމީހުން ތިބީ ފިލުމު ބަލާށެވެ. ފިލުމު ބަލަން ތިބި ގޭގައި އިތުރު ދެ މީހަކުވެސް ތިބިކަމަށް އެ ހެކިވެރިޔާ ބުންޏެވެ. އެއީ އެ ގޭގައި ސިމާހުއާއެކު އުޅެމުންދިޔަ ދެމީހުންކަމަށް ހެކިވެރިޔާ ބުންޏެވެ.
ސިމާހު މޫސާގެ ފަރާތުން ދެން ހުށައެޅި 2 ހެކިން ތިބީ މާފުށީ ޖަލުގައިކަމަށް ވުމާއެކު، އެ ދުވަހު އެ ދެ ހެކިންގެ ހެކިބަސް ނެގުން ފަސްކުރީއެވެ. ވުމާއެކު، ބުދަ ދުވަހުގެ އަޑުއެހުމަކީ އެ ދެ ހެކިންގެ ހެކިބަސް ނެގުމަށް ބޭއްވި އަޑުއެހުމެކެވެ.
މި އަޑުއެހުމުގައި ފުރަތަމަ ހާޒިރުކުރީ ގދ ފަރެސްމާތޮޑާ މަންޒިލް، މުޙައްމަދު ނިޝާހުއެވެ. އޭނާ ބުނެފައިވާ ގޮތުގައި އޭނާއަކީ ސިމާހުއާއެކު އެގޭގައި ދިރިއުޅެމުންދިޔަ ފަރާތެކެވެ. އެގޮތުން ޙާދިސާ ހިނގި ރޭގައި އޭނާ އުޅުނީ ސިމާހުއާއެކު އެ ގޭގައިކަމަށް އޭނާ ހެކިބަސް ދެމުން ބުނެފައިވެއެވެ. އެރޭ މެންދަން ވަންދެން އުޅުނީ އެކުގައިކަމަށް އެ ހެކިވެރިޔާ ބުންޏެވެ.
އޭނާވެސް ވަނީ ސިމާހުގެ ފަރާތުން ފުރަތަމަ ހާޒިރުކުރި ހެކިވެރިޔާވެސް ބުނެފައިވާ ގޮތަށް، އެމީހުން ތިބީ ފިލުމު ބަލަން ކަމަށް ބުނެފައެވެ.
ދެން ކުރިއަށް ދިޔައީ ދައުލަތުން ހެކިވެރިޔާ ކްރޮސް އެގްޒެމިނޭޝަން ކުރުމެވެ. އެގޮތުން އެމީހުން ބަލާފައިވަނީ ކޮން ފިލުމެއްކަމާއި، ސިމާހު އޭރު ލައިގެން ހުރީ ކޮން އެއްޗެއްކަން ސީދާ ހަނދާނުގައި ނެތްކަމަށް ދައުލަތުން ކުރި ސުވާލުތަކަށް ޖަވާބުދެމުން ހެކިވެރިޔާ ބުންޏެވެ.
ސިމާހުގެ ފަރާތުން ދެން ހުށައަޅާފައިވާ ހެކީގެ ހެކިބަސް ނަގަން ބޭނުން ނުވާކަމަށް އޭނާ ވަނީ ބުނެފައެވެ. ވުމާއެކު، ސިމާހުގެ މައްޗަށް ކުރާ ދައުވާގެ ހެކިބަސް ނެގުމުގެ މަރުޙަލާ ބުދަ ދުވަހު މިވަނީ ނިންމާލާފައެވެ. ދެން އޮންނާނީ މި މައްސަލައިގެ ޚުލާސާ ބަޔާން އިއްވުމެވެ.
އަނަސް މަރާލާފައިވަނީ، 2017 ވަނަ އަހަރުގެ ޖުލައި މަހުގެ 31 ވަނަ ދުވަހުގެ ރޭ ލިޓަސް ގަރާޖް ތެރޭ ވަޅިން ހަމަލާދީގެންނެވެ.
