ލަންކާގެ ހަމަނުޖެހުމުގައި އެކަކު މަރުވެ 12 މީހުން ޒަޚަމްވެއްޖެ

ސްރީލަންކާގެ ރަންބުއްކަނައިގައި އަންގާރަ ދުވަހު ހަވީރު ހިނގި ހަމަނުޖެހުމުގައި ބަޑިޖެހުމުގެ ސަބަބުން އެކަކު މަރުވެ 12 މީހުން ޒަޚަމްވެއްޖެއެވެ.

އަންގާރަ ދުވަހު ހެދުނުން ފެށިގެން ކުރިއަށް ގެންދިޔަ މި މުޒާހަރާގައި، ރަންބުއްކަނައިގެ ރޭލު ދަތުރުކުރާ މަގު ބަންދުކުރުމާގުޅިގެން ލަންކާގެ ފުލުހުން ވަނީ މީހުން ދުރަށް ޖެއްސުމަށް ބަޑި ޖަހާފައެވެ. ލަންކާގެ ފުލުހުން ވަނީ އާންމުންނާ ދިމާލަށް ބަޑިޖެހިކަން ކަށަވަރުކޮށްދީފައެވެ.

ފުލުހުންގެ ތަރުޖަމާނު, އެސްއެސްޕީ ނިހާލް ތަލްދުވާ ވިދާޅުވީ, މުޒާހަރާގެ ބައިވެރިން އެތަނުން ނުކުތުމަށް ފުލުހުން އިންޒާރު ދިންނަމަވެސް ތަބާނުވާކަމަށެވެ. އޭނާ ވިދާޅުވީ, އޭގެފަހުން މުޒާހަރާގެ ބައިވެރިން މަސައްކަތްކުރީ ތެޔޮ ބައުޒަރުގައި ރޯކޮށްލުމަށް ކަމަށެވެ. މީގެއިތުރުން ކުރޮޅީގައި ރޯކޮށްލުމަށާއި, ތަންތަނަށް ގެއްލުން ދިނުމަށްވެސް މަސައްކަތް ކޮށްފައިވާކަމަށެވެ.

ފުލުހުންގެ ތަރުޖަމާނު ވިދާޅުވީ, އެއްވުން ރޫޅާލުމަށްޓަކައި ފުލުހުން ކަރުނަ ގޭސް ޖަހާފައިވާ ކަމަށާއި, އޭގެފަހުން މުޒާހަރާގެ ބައިވެރިން ހިލަ އުކަންފެށިކަމަށެވެ. އަދި ހަމަޖެހުން ގާއިމުކުރުމަށް ފުލުހުން ބަޑިޖަހާފައިވާ ކަމަށާއި، އެކަމުގެ ސަބަބުން އާންމުންގެ ބަޔަކު ޒަޚަމްވިކަމަށެވެ.

މި ހާދިސާގައި އަނިޔާވި މީހުންނަށް އަވަސް ފަރުވާ ދިނުމަށް ހޮސްޕިޓަލަށް ގެންގޮސްފައިވާއިރު, ބައެއް ފުލުހުންނަށް ވެސް އެކިވަރުގެ އަނިޔާތައް ލިބިފައިވާ ކަމަށާއި އެ މީހުން ވެސް ހޮސްޕިޓަލަށް ގެންދިޔުމުގެ މަސައްކަތް ކުރަމުން އަންނަކަމަށް ފުލުހުންގެ ތަރުޖަމާނު ވިދާޅުވިއެވެ.