ރޭޑިއަންޓްއަކީ ނިއުރޭޑިއަންޓްކަމަށް ބަލާ، ފުރުޞަތު ނުދޭން ނިންމައިފި

ނުލާ ހުދުގެ ސަޕޯޓަރުންނަށްޓަކައި ވުޖޫދުކުރި ރޭޑިއަންޓް ސްޕޯރޓްސް ކްލަބަށް ފުރުޞަތު ނުދޭން އެފްއޭއެމްއިން ނިންމައިފިއެވެ. މައުލޫމާތު ލިބިފައިވާ ގޮތުގައި އެފްއޭއެމްގެ އެނިންމުން އައިސްފައިވަނީ އޭއެފްސީއަށްވެސް އެކަން ހުށަހަޅާ, އޭއެފްސީންވެސް އެގޮތަށް ނިންމުމުންނެވެ.

މިކަން ރޭޑިއަންޓަށް އެނގިފައިވަނީ ޓީމް އެކުލަވާލާ މުބާރާތަށް ތައްޔާރުވަމުން ދިޔަނަމަވެސް, އެފްއޭއެމްގެ އެސޯސިއޭޓް މެންބަރަކަށް ވެވޭނެކަމުގެ ޔަޤީންކަން ލިބިފައި ނުވާތީއާއި, ރޭޑިއަންޓަށް މުބާރާތުގައި ބައިވެރިވެވޭނެކަން ނުވަތަ ނޫންކަން އެފްއޭއެމްއިން އަންގާފައި ނުވާތީ އެކްލަބުން އެދިގެން އެފްއޭއެމްއާއެކު ބޭއްވި ބައްދަލުވުމުންނެވެ. އެބައްދަލުވުމުގައި އެފްއޭއެމްގެ ފަރާތުން ބައިވެރިވީ ޖެނެރަލް ސެކެޓްރީ ހުސައިން ޖަވާޒްއާއި, ޑެޕިއުޓީ ޖެނެރަލް ސެކެޓްރީ އަދި ކްލަބް ލައިސަންސިންގ ކަންތަކުގައި އެފްއޭއެމްގައި އިސްކޮސް މަސައްކަތްކުރައްވާ އަބުދުالله ޝިބާއުއާއި, ޖައުޝަން ޝަރީފްއެވެ.

އެބައްދަލުވުމުގައި ރޭޑިއަންޓުން ބުނެފައިވަނީ ބައްދަލުކުރީ އާއްމު އުޞޫލުން ކަންކަން ހިނގާގޮތަށްވުރެ ލަހުން ކަން ހިނގާތީއާއި, ވާގޮތްވެސް ކްލަބަށް ނޭނގޭތީ އެކަން ސާފްކޮށްދިނުމަށް އެދިކަމަށެވެ. އެކަމަށް ޖަވާބުދެއްވަމުން އެފްއޭއެމްގެ ފަރާތުން ބުނެފައިވަނީ ކްލަބް ލައިސަންސިންގ ސިސްޓަމްގެ ތެރެއިން ކަންކަން ހަމަޖައްސަން ހުރަސްތަކެއް ހުރިކަމަށެވެ. އޭއެފްސީންވެސް ސާފްކުރަންޖެހޭ ކަންތައްތަކެއް ހުރިކަމަށެވެ. މެމްބަރޝިޕަށް އެދުމުން މެންބަރޝިޕް ދިނުމުގެ ކުރިން ފުރިހަމަވާންޖެހޭ ޝަރުތުތަކަކާއި, އިޖުރާއަތްތަކެއް ހުންނަކަމަށާއި, މެމްބަރޝިޕް ލިބޭނީ އެކަންކަން ފުރިހަމަވުމުން އެގްޒެކެޓިވް ކޮމިޓީން ނިންމައިގެން ކޮންގްރެސް އިންކަމަށް އެފްއޭއެމްއިން ބުންޏެވެ.

އޭއެފްސީން އެދިގެން ކޮމިޝަނަރ އޮފް ސްޕޯރޓްސްއިން ލިބެންހުރި ރޭޑިއަންޓްގެ މައުލޫމާތުތައް ހިއްޞާކުރިކަމަށާއި, ހިއްސާކުރުމުން ދެކަމެއް އޭއެފްސީން ފާހަގަކުރިކަމަށް އެފްއޭއެމްއިން ބައްދަލުވުމުގައި ބުނެފައި ވެއެވެ. ފީފާގެ ޑިސިޕްލިނަރީ ކޯޑްގެ 15 ވަނަ މާއްދާގެ 15.4 އަށް ހަވާލާދީ ކަންތައްތަކެއް އޭއެފްސީން ފާހަގަކުރިކަމަށް އެފްއޭއެމްއިން ބުންޏެވެ.

ރޭޑިއަންޓް ސްޕޯރޓްސް ކްލަބަކީ ރާއްޖޭގައި ފުޓްބޯޅަ ކްލަބެއްގެ ގޮތުގައި އޮޕަރޭޓްކުރި ނިއުރޭޑިއަންޓާ ގުޅިންހުރި ކްލަބެއްކަމަށް އޭއެފްސީން ދެކޭކަމަށް ބައްދަލުވުގައި ބުންޏެވެ. އެގޮތަށް ދެކެނީ ނަމާއި, ކުލައާއި, ލޯގޯއާއި, ކުޅުންތެރިންނާއި, އޯނަރޝިޕްއާއި, ސްޓޭކް ހޯލްޑަރސްއަށް ބެލުމަށްފަހުކަަށްވެސް ބައްދަލުވުމުގައި ރޭޑިއަންޓަށް އެންގިއެވެ.

ބައްދަލުވުގައި ދެކެވުނު ވާހަކަތަކުގެ އަލީގައި ރޭޑިއަންޓްގެ ބޯޑް މެންބަރަކު ބުނީ މައިގަނޑު ޕޮއިންޓަކީ ރާއްޖޭގެ ދަނޑުތަކުގައި "ނުލާއި ހުދު" ބޭނުން ނުކުރެވޭނެކަމަށް ނިންމުންކަމަށެވެ. ރޭޑިއަންޓްގެ ބޯޑްގައި ނިއުރޭޑިއަންޓްގައި އެންމެ ފަހުން އޮތް ބޯޑްގެ ދެ މެމްބަރަކު ހިމެނުމެވެ. އޭގެތެރޭގައި ރޭޑިއަންޓްގެ ޗެއަރމަން ވާސިފް ހިމެނެއެވެ. އެދެމެމްބަރުން ރޭޑިއަންޓް ބޯޑުން އިސްތިއުފާ ދިންނަމަވެސް ހުރަސްތަކެއް ހުރިކަމަށް މައުލޫމާތުލިބެއެވެ. އެއީ ލޯގޯވެސް ވަރަށް ބޮޑަށް އެއްވައްތަރުވުމެވެ. އަދި ނިއުރޭޑިއަންޓްގެ ކުލަކަމަށްވާ ނުލާ ހުދު ރޭޑިއަންޓުންވެސް ބޭނުންކުރުމެވެ. ރޭޑިއަންޓް އުފެއްދީ ސީދާ ނިއުރޭޑިއަންޓްގެ ނަން ދިރުވުމަށާއި, އެކްލަބްގެ ސަޕޯޓަރުންނަށްޓަކައެވެ. އެކަން ރޭޑިއަންޓްގެ ބޯޑުން ވަނީ އިއުލާންވެސް ކޮށްފައެވެ.

ރޭޑިއަންޓަށް ފުރުޞަތު ނުދޭން މިނިންމީ ތިންވަނަ ޑިވިޝަންގައި ބައިވެރިވާން ޓީމްގެ ކޯޗިންގ ޓީމް ކަނޑައަޅާ, ރަނގަޅު ސްކޮޑެއްވެސް އެކުލަވާލާފައިވަނިކޮށެވެ. އަދި ރޭޑިއަންޓުން ވަނީ ބިދޭސީ ކުޅުންތެރިންވެސް ހޯދާފައެވެ. އެކްލަބުން އެމަސައްކަތް ކުރީ ކޮމިޝަނަރ އޮފް ސްޕޯރޓްސްއިން އެކްލަބް ރަޖިސްޓްރީކޮށްދިނުމުންނެވެ. ނަމަވެސް ކްލަބަށް ފުރުޞަތު ނުދޭން ނިންމިކަން ރޭޑިއަންޓްގެ ބޯޑް މެންބަރަކު ވަނީ ޔަޤީންކޮށްދީފައެވެ.