ނިއު ރޭޑިއަންޓް ސްޕޯޓްސް ކުލަބު އަލުން ފުރަތަމަ ޑިވިޝަންގައި ކުޅެން ފެށުމުން، އެ ކުލަބުގެ ސަޕޯޓަރުން ދަނޑަށް ވަދެ އަލުން ގަލޮޅު ދަނޑު ގުގުމާލާނެ ކަމަށް، އެ ކުލަބުގެ ޗެއާމަން އަޙުމަދު މުބީން ވިދާޅުވެއްޖެ އެވެ.

މުބީން އޭނާގެ ފޭސްބުކު އެކައުންޓުގައި ކުރެއްވި ޕޯސްޓެއްގައި ވިދާޅުވެފައި ވަނީ ނިއު ރޭޑިއަންޓް ސްޕޯޓްސް ކުލަބު އަލުން އެނބުރި ގަލޮޅު ދަނޑަށް އައުމަކީ ވަޅު ޖެހިފައިވާ ދިވެހި ފުޓުބޯޅަ އަށް ކުރިއެރުން ލިބިގެން ދާނެ ކަމެއް ކަމާމެދު މުޖައްރިބު ކަމަށެވެ.

މީގެ އިތުރުން ފާއިތުވި ހަ ވަރަކަށް އަހަރުގެ ތެރޭގައި މާޔޫސްވެފައި ތިބި ނިއު ރޭޑިއަންޓުގެ ސަޕޯޓަރުން، އެ ކުލަބު އަލުން ދިވެހި ޕްރިމިއާ ލީގުގައި ކުޅެން ފެށުމާ އެކު، ކުލަބުގެ ސަޕޯޓަރުން ދަނޑަށް ވަދެ ގަޮލޮޅު ދަނޑު ގުގުމާލާނެ ކަމަށް ވެސް މުބީން ވަނީ ވިދާޅުވެފަ އެވެ.

އިތުރަށް މުބީންގެ ޕޯސްޓުގައި ވިދާޅުވެފައި ވަނީ ކާޅު ސިޑިބަރި އުތުރި އަރާތަން އަނެއްކާ ވެސް ދިވެހި ފުޓުބޯޅަ އިން ދާދި އަވަހަށް ފެނިގެން ދާނެ ކަމަށެވެ. ނިއު ރޭޑިއަންޓް އަށް ފުރަތަމަ ޑިވިޝަން އިން ޖާގަ ދިނުމަށް ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން ނިންމާފައިވާ ކަމަށް، "ރާއްޖެ އެމްވީ" ގައި ލިޔެފައިވާ ޚަބަރު ހިއްސާ ކުރައްވައި މުބީން ވިދާޅުވެފައި ވަނީ، މިތުރުންގެ ހިތަށް ދަތި ކުރި ކަޅު ކޮންނެ ރެޔެއް ވެސް، ފިތުރަތުގެ އުސޫލުން ނިމެނީ ފަތިހަށް ކަމަށެވެ.

އެފްއޭއެމްގެ ކުރީގެ ރައީސް ބައްސާމް އަދީލް ޖަލީލްގެ ދަައުރުގައި، 2019 ވަނަ އަަހަރު ވަނީ ނިއު ރޭޑިއަންޓް ސަސްޕެންޑު ކުރުމަށް ނިންމައިފަ އެވެ. ކުޅުންތެރިންނަށް ދޭން ޖެހޭ ފައިސާ ނުދެވި އޮތް މައްސަލައިގައި އޭރު އެފްއޭއެމް އިން ނިއު ރޭޑިއަންޓް ސަސްޕެންޑު ކޮށްފައި ވަނީ، އޭރު ރައީސަކަށް ހުންނެވި ބައްސާމްއާ ދެކޮޅަށް އެ ކުލަބުން މަސައްކަތް ކުރުމުންނެވެ. އޭގެ ފަހުން ކުލަބު ތަކުގެ ތާއީދާ އެކު އެފްއޭއެމް އިން ވަނީ ނިއު ރޭޑިއަންޓުގެ ސަސްޕެންޝަން ދަމަހައްޓަން ވެސް ނިންމައިފަ އެވެ.

އެފަހުން، 2022 ވަނަ އަހަރު އެފްއޭއެމް އިން ވަނީ ނިއު ރޭޑިއަންޓުގެ ސަސްޕެންޝަން އުވާލަން ނިންމައިފަ އެވެ. އެކަމަކު އެ ކުލަބަށް ފުރަތަމަ ޑިވިޝަން އަށް އަލުން އާދެވެން އޮތީ ދެ ވަނަ ޑިވިޝަންގެ ފުޓުބޯޅަ މުބާރާތުގައި ވާދަކޮށްގެންނެވެ. އޭގެ ފަހުން 2023 ވަނަ އަހަރާއި، 2024 ވަނަ އަހަރު ވެސް ނިއު ރޭޑިއަންޓް އިން ވަނީ ދެ ވަނަ ޑިވިޝަންގައި ވާދަކޮށްފަ އެވެ.

ނިއު ރޭޑިއަންޓުގެ އައު ޗެއާމަންކަމާ ދާދި ފަހުން މުބީން ހަވާލުވެފައިވާއިރު، މުބީން އާއި އޭނާގެ ޓީމުގެ އެންމެ ބޮޑު އަމާޒަކީ ނިއު ރޭޑިއަންޓް އަލުން ފުރަތަމަ ޑިވިޝަން އަށް ގެނައުމެވެ. ނިއު ރޭޑިއަންޓަށް އަލުން ފުރަތަމަ ޑިވިޝަންގެ ޖާގަ ދިނުމަށް އެފްއޭއެމް އިން ނިންމާފައި ވަނީ، ފުރަތަމަ ޑިވިޝަންގައި ވާދަކުރަމުން އައި ސުޕަ ޔުނައިޓެޑު ސްޕޯޓްސް (ސަސް) އިން، ފުރަަތަމަ ޑިވިޝަން އިން ވަކިވުމުންނެވެ.

އެގޮތުން އެންމެ ފަހުން އޮތް ދެ ވަނަ ޑިވިޝަންގެ ޗެމްޕިއަން ޓީމު އަދި ރަނައަޕް ޓީމަށް ފުރަތަމަ ޑިވިޝަންގެ ޖާގަ ލިބިފައިވާތީ، ދެން ދެ ވަނަ ޑިވިޝަން އިން އެންމެ ރަނގަޅު ނަތީޖާ ނެރެފައިވާ ޓީމަށް ފުރަތަމަ ޑިވިޝަންގެ ޖާގަ ދިނުމަށް އެފްއޭއެމް އިން ވަނީ ނިންމައިފަ އެވެ.