އިންޓަނޭޝަނަލް މަނިޓަރީ ފަންޑް (އައިއެމްއެފް) އިން ސްރީލަންކާއަށް އަވަސް އެހީއެއް ފޯރުކޮށްދިނުމާ ގުޅޭގޮތުން ވިސްނާނެ ކަމަށް ބުނެފައިވާ ކަމަށް ސްރީލަންކާގެ ފިނޭންސް މިނިސްޓަރު ވިދާޅުވެއްޖެއެވެ.
ފިނޭންސް މިނިސްޓަރު އަލި ސަބްރީ ހިމެނިވަޑައިގަންނަވާހެން ލަންކާގެ މަންދޫބުންގެ ޓީމެއް ވަނީ އައިއެމްއެފް އާއެކު މަޝްވަރާތައް ފެށުމަށް ހޯމަ ދުވަހު އެމެރިކާގެ ވޮޝިންގްޓަން އަށް ވަޑައިގެންފައެވެ. މި މަޝްވަރާތަކާއެކު ގައުމުގެ ފޮރިން ރިޒަރވް އަށް ފައިސާ އިތުރުވެ މިހާރު ކުރިމަރިވެފައިވާ މައްސަލަތަކުގެ ތެރޭގައިވެސް ޒަރޫރީ ބޭނުންތަކަށް ހަރަދުކުރާނެ ފައިސާ ލިބިގެން ދިއުމަކީ ލަންކާ ސަރުކާރުގެ އުންމީދުކަމަށް ރޮއިޓަރސް އިން ބުނެއެވެ.
ރޮއިޓާސް އިން ރިޕޯޓުކޮށްފައިވާގޮތުގައި ލަންކާ ސަރުކާރުން އުންމީދު ކުރަނީ އައިއެމްއެފްއެކު ކުރިއަށްދާ މަޝްވަރާތަކުގެ ތެރެއިން 'ބްރިޖް ފައިނޭންސިން'ގެ އެހީ ހޯދުމަށެވެ.
ފިނޭންސް މިނިސްޓްރީގެ އޮފިޝަލެއް ކަމަށްވާ ޝާމިރް ޒަވާހިރް އާ ހަވާލާދީ ރޮއިޓަރސް އިން ރިޕޯޓުކޮށްފައިވާގޮތުގައި ލަންކާއިން ވަނީ އައިއެމްއެފްގެ ރެޕިޑް ފައިނޭންޝަލް އިންސްޓްރުމަންޓް (އާރްއެފްއައި) ގެ ދަށުން ލޯނެއް ދިނުމަށް ހުށަހަޅާފައެވެ. މިއީ އިމަރޖެންސީ ހަލާތްތަކުގައި ފައިސާގެ އެހީއަށް ބޭނުންވެފައިވާ ގައުމުތަކަށް ފައިސާ ފޯރުކޮށްދިނުމަށް އައިއެމްއެފް އިން ގެންގުޅޭ ޕްރޮގްރާމްއެކެވެ.
ލަންކާއިން މި ހުށަހެޅުން ހުށަހެޅި ވަގުތު އައިއެމްއެފް އިން ވަނީ ރެޕިޑް ފައިނޭންޝަލް އިންސްޓްރުމަންޓްގެ ދަށުން އެގައުމަށް ލޯނު ފޯރުކޮށްދޭން ފަސްޖެހިފައެވެ. ނަމަވެސް ފިނޭސް މިނިސްޓަރު ސަބްރީ ވަނީ އިންޑިއާއިން އައިއެމްއެފްގައި ލަންކާއަށް މިއެހީ ފޯރުކޯށްދޭން އެދިފައިވާތީ ލޯނު ފޯރުކޮށްދިނުމާ ގުޅޭގޮތުން އައިއެމްއެފް އިން މިހާރު ވިސްނަމުންދާ ކަމަށް ވިދާޅުވެފައެވެ.
ލަންކާއަށް މިނިވަންކަން ލިބުނުފަހުން ފުރަތަމަ ފަހަރަށް އެގައުމުގެ އިގުތިސާދު މިިހާ ގޯސްވުމަށް މެދުވެރިވެފައި ވަނީ އެގައުމުގެ ސަރުކާރުގެ ފައިސާގެ މުއާމަލާތްތައް ކުރުމުގަޔާއި އިގުތިސާދީ ކަންކަމުގައި ގެންގުޅެވުނު ދޯދިޔާ ސިޔާސަތުތަކުގެ ސަބަބުންނެވެ. އަދި ކޮވިޑް-19ގެ ސަބަބުން އެގައުމުގެ އިގުތިސާދަށް ކުރި ނޭދެވޭ އަސަރާއެކު ގައުމުގެ އިގުތިސާދު މިވަނީ ބޮޑު އަދަވަޅަކަށް ވެއްޓިފައެވެ.
ގައުމުގެ ފޮރިން ރިޒަރވް ހުސްވެ، ބޭރުގެ ދަރަނި އަދާނުކުރުވޭ އިރު، ބޭރު ފައިސާ ނެތުމުގެ ސަބަބުން ތެޔޮ، ގޭސް އަދި ބޭހުގެ އިތުރުން ކާޑުގެ ބާވަތްތައް އިމްޕޯޓުނުކުރެވި ރައްޔިތުންނަށް ވަނީ އެތައް ހަފުތާއެއް ހޭދަކުރަންޖެހިފައެވެ. މިއާއެކު އާންމު ރައްޔިތުންގެ ނުރުހުން ސަރުކާރަށް އަމާޒުވެފައިވާއިރު، ރައްޔިތުން ދަނީ ރައީސް ގޮތަބަޔާ ރާޖަޕަކްސަ އާއި ބޮޑުވަޒީރު މަހިންދަ ރާޖަޕަކްސަގެ އިސްތިއުފާއަށް ގޮވާލަމުންނެވެ.
މިދިޔަ ހަފުތާގައި ލަންކާގެ ސެންޓްރަލް ބޭންކުން ވަނީ އައިއެމްއެފްގެ މަޝްވަރާތަކުން ލޯނުތައް ދެއްކޭނެ ގޮތެއް ހޯދެންދެން އެގައުމުގެ ބޭރުގެ ދަރަނިތައް ނުދައްކާ މަޑުޖައްސާލަން ނިންމާފައެވެ.
ލަންކާގެ ފިނޭންސް މިނިސްޓަރު ވަނީ ކުރިއަށް އޮތް ދެތިން މަސްދުވަހުގެ ތެރޭގައި ބޭރުގެ އެހީގެ ގޮތުގައި ތިން ބިލިއަން ޑޮލަރުގެ އެހީ ބޭނުންވާ ކަމަށް ވިދާޅުވެފައެވެ. މިއެހީ ހޯދުމަށް އެކުވެރި ގައުމުތަކާއި އައިއެމްއެފް ފަދަ މާލީ އިދާރާތަކުގައި އެދޭނެ ކަމަށް އޭނާ ވަނީ ވިދާޅުވެފައެވެ.
ލަންކާއަށް ކުރިމަތިވެފައިވާ އިގުތުސާދީ ކާރިސާގައި އިންޑިއާ އަދި ޗައިނާއިން ދަނީ ގިނަ އެހީތަކެއް ފޯރުކޯށްދެމުންނެވެ. އައިއެމްއެފް އާއެކު ކުރިއަށްދާ މަޝްވަރާތަކުގެ ހަވާސާގައި ލަންކާގެ ފިނޭންސް މިނިސްޓަރު ސަބްރީ ވަނީ އިންޑިއާގެ ފިނޭންސް މިނިސްޓަރު ނިރްމަލާ ސިތަރަމަން އާ ބައްދަލުކުރައްވާ ދެގައުމުން ގުޅިގެން ކުރާ މަސައްކަތްތައް އިތުރަށް ހަރުދަނާ ކުރުމަށް އެއްބަސްވެވަޑައިގަންނަވާފައި ކަމަށް ރޮއިޓަރސްއިން ރިޕޯޓުކޮށްފައިވެއެވެ.
މިބައްދަލުވުމަށް އިޝާރާތްކުރައްވާ ވާހަކަދައްކަވަމުން ފިނޭންސް މިނިސްޓަރުގެ އޮފީހުން ވަނީ އައިއެމްއެފް އާއެކު ލަންކާއިން ކުރިއަށް ގެންދާ މަޝްވަރާތަކުގައި އިންޑިއާގެ ފުރިހަމަ އެއްބާރުލުން ލިބޭނެކަމުގެ ޔަގީންކަށް ދީފައިވާކަން ފާހަގަކުރައްވާފައެވެ.
ލަންކާގެ ސަރުކާރުގެ އިސްތިއުފާއަށް ގޮވާލާ އާންމުންގެ އަޑު ގަދަވެފައި ވީނަމަވެސް މަގާމުން އިސްތިއުފާ ނުދެއްވާނެ ކަމަށް ރައީސް ގޮތަބަޔާ ރާޖަޕަކްސަ ވަނީ ވިދާޅުވެފައެވެ. ރައީސް ވަނީ ހޯމަ ދުވަހު އެމަނިކުފާނުގެ ކެބިނެޓަށް އިތުރު 17 މިނިސްޓަރުންވެސް އައްޔަނުކުރައްވާފައެވެ. މި ބޭފުޅުންގެ ތެރޭގައި ރާޖަޕަކްސަ އާއިލާއަށް ނިސްބަތްވެވަޑައިގަންނަވާ އެެއްވެސް ބޭފުޅަކު ހިމެނިވަޑައެއް ނުގަންނަވައެވެ.
ލަންކާގެ ކެބިނެޓަށް އައު ވަޒީރުން އައްޔަނުކުރެވުނުކަން އަންގާ ރައީސް އޮފީހުން ނެރުނު ބަޔާނުގައި ވަނީ ރައީސް އަދި ބޮޑުވަޒީރުގެ މަގާމަށް އެއްވެސް ބަދަލެއް ނާންނަކަމަށް ބުނެފައެވެ.
އަންގާރަ ދުވަހު ބޮޑުވަޒީރު މަހިންދަ ރާޖަޕަކްސަ ވަނީ ހުރިހާ ސިޔާސީ ޕާޓީތަކެއް އެކުލެވޭ ގުޅިފައިވާ ސަރުކާރެއް އެކުލަވާލުމަށް މަޖިލީހުގައި ހުށަހަޅުއްވާފައެވެ. މީގެ ކުރިން ރައީސް ގޮތަބަޔާ ރާޖަޕަކްސަ ވެސް ވަނީ ގުޅިފައިވާ ސަރުކާރެއް އެކުލަވާލުމަށް ހުށަހަޅުއްވާފައެވެ. ނަމަވެސް އިދިކޮޅުން ވަނީ އެކަމަށް ނޫނެކޭ ބުނެފައެވެ.
ސަރުކާރަށް އަމާޒުވެފައިވާ ނުރުހުން ކުޑަކުރުމަށް ބޮޑުވަޒީރު އަދި ރައީސް ރާޖަޕަކްސަ ވަނީ ލަންކާގެ ގާނޫނަށް ބަދަލު ގެނައިސް ރައީސަށް ދީފައިވާ ބާރުތައް ކުޑަކުރުމަށް ވެސް ހުށަހައްޅުއްވާފައި ކަމަށް ރޮއިޓަރސް ބުނެއެވެ. އެގޮތުން ބޮޑުވަޒީރު މަހިންދަ ރާޖަޕަކްސަ ވަނީ ރައީސްގެ ތާއީދާއެކު ގާނޫނު އަސާސީއަށް ބޮޑެތި ބަދަލުތައް ގެންނަށް މަސައްކަތްކުރާނެ ކަމަށާއި މިކަމަށް އާންމު ރައްޔިތުންނާ އިދިކޮޅު ފަރާތްތަކާއި ހުރިހާ އެންމެގެ އެހީއަށް އެދޭކަމަށް ވިދާޅުވެފައެވެ.
