ކޮވިޑްގެ ލުއިތަކާއެކު އުރުދުންގެ ރައްޔިތުންނަށް ރޯދައިގެ އީދެއް

1443 ވަނަ އަހަރުގެ ރަމަޟާން މަސް މިފަހަރު އައީ ތަފާތުކޮށެވެ. ފާއިތުވި 2 އަހަރުގެ ތެރޭގައި އުރުދުންގެ ރައްޔިތުންނަށް ޖެހުނީ ގޭގައި ބަންދުވެގެން ތިބެ ރަމަޟާން މަހުގެ ދުވަސްތައް ހޭދަ ކުރާށެވެ. ނަމަވެސް މި ފަހަރު އުރުދުންގައި އާންމުންނަށް އެއްވެސް ހުރަހަކާއި ނުލައި ރަމަޟާން މަހުގެ ރޭތައް ހޭދައް ކުރަމުންދަނީ މިނިވަންކަމާއެކު އީދެއްގެ ގޮތުގައެވެ.

ކޮވިޑްގެ ލުއިތަކާއެކު ރަމަޟާން މަހަށް ޚާއްސަކުރެވޭ ހަރަކާތްތަކާއެކު ހަވީރާއި ރޭގަނޑު ކަންކަން ކުރިއަށް ދަނީ 2 އަހަރު ފަހުންނެވެ.

އެގޮތުން އައްމާންގެ މަޝްހޫރު ރެސްޓޯރެންޓްތަކުގައި ރޯދަ ވީއްލުމާއި، މަގުމަތީ ބާޒާރުތައް ބޭއްވުމާއި، ތަފާތު ކުޅިވަރުތަކާއި ޖަމާއަތުގައި ނަމާދު ކުރުމުގެ ފުރުސަތު ލިބިގެންދެއެވެ. އަދި މި ރޯދަމަހަކީ ތަފާތުކަން އިހުސާސްވާ ރޯދަ މަހެއްގެ ގޮތުގައި ގިނަ ބަޔަކު އަންނަނީ ސިފަކުރަމުންނެވެ.

"މާސްކް އަޅާކަށް ނުޖެހޭ. މިއީ އަހަންނަށް އެންމެ މުހިންމު ނިންމުމަކީ. އަހަނަށް ފެންނަނީ މީހުންގެ މޫނުމަތިން ތާޒާކަން" ހާރު ކާން ވެގެން އިން ދުއާ ފަތަފްތާ އުފަލުން އޭނާގެ އިހުސާސްތައް ކިޔައިދިނެވެ.

ގިނަ ހަރަކާތްތައް ބާއްވަމުން އަންނަނީ އަމިއްލަ ފަރަތްތަކުންނެވެ. މީގެއިތުރުން އުރުދުންގެ ސަރުކާރުން ވެސް ވަނީ މުޅި ގައުމު ޝާމިލްވާގޮތަށް ހަރަކާތްތަކެއް ބާއްވަން ނިންމާފައެވެ. އޭގެ ތެރޭގައި ޅެން ކިއުމާއި، ފުލޯކް އަދި ދީނީ ހަރަކާތްތައް ދައްކުވައިދޭ ތަމްސީލުތަކާއި، ތިއޭޓަރުގައި ކުރިއަށްގެންދާ ހަރަކާތްތަކާއި، ސަގާފީ މުބާރާތްތަކުގެ އިތުރުން ބާޒާރު އަދި ކުޑަކުދިންނައް ޚާއްސަ ހަރަކާތްތައް ހިމެނެއެވެ.