ރައީސްގެ ދެކަނބަލުން ނުރަސްމީ ދަތުރުފުޅު ނިންމަވާލެއްވުމަށްފަހު ރާއްޖެ ވަޑައިގަންނަވައިފި

ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙާއި އެމަނިކުފާނުގެ އަނބިކަނބަލުން ފަޒްނާ އަޙްމަދު ސިންގަޕޫރަށް ކުރެއްވި ނުރަސްމީ ދަތުރުފުޅު ނިންމަވާލެއްވުމަށްފަހު އާދިއްތަ ދުވަހުގެ ރޭ ރާއްޖެ ވަޑައިގަންނަވައިފިއެވެ.

ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙްއާއި އެމަނިކުފާނުގެ އަނބިކަނބަލުން ފަޒްނާ އަޙްމަދު ސިންގަޕޫރަށް ވަޑައިގެންނެވީ މި މަހުގެ 15 ވަނަ ދުވަހުއެވެ. މިއީ ސިންގަޕޫރަށް ކުރެއްވި ނުރަސްމީ ދަތުރުފުޅެކެވެ.

ރައީސްގެ ދެކަނބަލުން އެންމެ ފަހުން ސިންގަޕޫރަށް ވަޑައިގެންނެވީ، ފެބްރުއަރީ މަހުގެ 23 ވަނަ ދުވަހު ރައީސްގެ ތައިރޮއިޑްގެ އޮޕަރޭޝަނަކަށެެވެ. ފަރުވާއަށް ފަހު ރާއްޖެ ވަޑައިގެންނެވީ މާޗު 6ވަނަ ދުވަހުއެވެ. ރާއްޖެ ވަޑައިގެންނެވުމާއިއެކު ރަސްމީ ދަތުރުފުޅުތަކުގައި ބައެއް ރަށްރަށަށްވެސް އެމަނިކުފާނު ވަޑައިގަންނަވާފައިވެއެވެ.

އެމަނިކުފާނުގެ ސިއްޙީ ހާލުކޮޅު ހުރިގޮތުން ބައްދަލުވުންތަކުގައި ވާހަކަފުޅުދެއްކެވުން ކުޑަކޮށް މަޑުޖައްސަވާލެއްވުމަށް ޑޮކްޓަރުން އިލްތިމާސްކުރައްވާފައިވާކަމަށް ފުވައްމުލަކުގައި ބޭއްވެވި ބައްދަލުވުމެއްގައި ރައީސް ވިދާޅުވެފައިވެއެވެ. އެގޮތުން އޮޕަރޭޝަނަށްފަހު ހައެއްކަ ހަފުތާ ވަންދެން ޖަލްސާތަކުގައި ވާހަކަފުޅުދެއްކެވުން މަޑުޖައްސަވާލެއްވުމަށް ޑޮކްޓަރުން އިރުޝާދު ދެއްވާފައިވާ ކަމަށް އެމަނިކުފާނު ވިދާޅުވެފައިވެއެވެ. ނަމަވެސް އެމަނިކުފާނު ގެންދެވީ އެއްވެސް އަރާމު ކުރެއްވުމެއްނެތި ދަތުރުފުޅުތައް ކުރައްވާ ބައްދަލުވުންތައް ބާއްވަވާ ރައްޔިތުންނާއި ބައްދަލުކުރައްވަމުންނެވެ.