ނޫޑްލްސް ކަވާބު މި ގޮތަށް ތައްޔާރުކޮށްލަމާ!

ނޫޑްލްސް އަކީ ވަރަށް ގިނަ މީހުންނަށް ކަމުދާ ކެއުމެކެވެ. ނޫޑްލްސް އެކި ގޮތްގޮތަށް ކައްކައިގެން ކާއިރު، އޭގެއިން ތައްޔާރުކުރާ ހެދިކާގެ ބާވަތަކީ ވެސް ވަރަށް މަގުބޫލު ކެއުންތަކެވެ. އެ ގޮތުން ނޫޑްލްސް ބޯކިބާ، ނޫޑްލްސް ރިހަވެސް ކައްކާއުޅެއެވެ. މި ފަހަރު ތައްޔާރުކޮށްލަން މިއުޅެނީ ނޫޑްލްސް ކަވާބެވެ.

އެންމެ ފުރަތަމަ ފިޔާ، މިރުސް، ލޮނުމެދު، ހިކަނދިފަތް، ލޮނު، ލުނބޯ އަދި މަސްދަޅު އަޅައިގެން މޮޑެލާށެވެ. މަސްދަޅު އަޅާއިރު އޭގައި ހުރި ހުރިހާ ތެލެއް އުކާ ނުލާށެވެ. ދެން އޭގެ ތެރެއަށް ފުށާއި އަލުވި އަދި ބިސް އަޅައިގެން ރަނގަޅަށް މޮޑެލާށެވެ. އެއަށްފަހު ނޫޑްލްސް އަޅައިގެން ހުރިހާ ބާވަތެއްގެ ރަހަ އެކުވާހެން މޮޑު މަށްފަހު، ހެޔޮވަރު ވަރަކަށް ކަވާބު ގުޅަ ޖަހާލާށެވެ. ގުޅަ ޖަހާއިރު، އެހާ ހަރު ނޫންނަމަ ފުށް އިތުރު ކޮށްލެވިދާނެވެ.

ދެން ތަވައަކަށް ތެޔޮ އަޅާފައި ހޫނުވުމުވުމުން ކަވާބު ގުޅަތައް ތެލުލާށެވެ. ރީތި މުށި ކުލައެއް އެރުމުން ނަގާށެވެ.