ބިދޭސީ މީހާގެ މަރާއި ގުޅިގެން ތުހުމަތުވާ ޕާކިސްތާނު މީހާ ހައްޔަރުކޮށްފި
ހަމަލާދިނުމަށްފަހު މުހައްމަދު އާބިދު ވަނީ ފިލާފައި
ހަމަލާގެ ތުހުމަތުގައި ހައްޔަރުކޮށްފައިވާ ޕާކިސްތާނުގެ މުހައްމަދު އާބިދު
ހުޅުމާލޭގެ ހާންޖީ ރެސްޓޯރަންޓްގައި ހޮނިހިރު ހަވީރު ބަންގްލަދޭޝްގެ ވެއިޓަރަކަށް ހަމަލާދީ މަރާލި ކަމަށް ތުހުމަތުވާ ޕާކިސްތާނުގެ ޝެފް މުހައްމަދު އާބިދު ހައްޔަރުކޮށްފިއެވެ.
ހަވީރު ހިނގި މިހާދިސާއާ ގުޅިގެން ފުލުހުން އޭނާ ހޯދަމުންދާކަން އިއުލާންކޮށްފައިވަނީ ހޮނިހިރު ދުވަހުގެ ރޭ 9:30 ހާއިރުއެވެ. ހޮނިހިރު ދުވަހުގެ ރޭ ދަންވަރު 2:23 ގައި ފުލުހުން ކުރި ޓްވީޓެއްގައި ބުނެފައިވަނީ މިހަމަލާގައި ތުހުމަތުކުރެވޭ ޕާކިސްތާނު މީހާ ކަމުގައިވާ އުމުރުން 26 އަހަރުގެ މުހައްމަދު އާބިދު ހައްޔަރުކޮށްފައިވާކަމަށެވެ. ހަމަލާދިނުމަށްފަހު މުހައްމަދު އާބިދު ވަނީ ފިލާފައެވެ. ފުލުހުން ބުނެފައިވަނީ އާބިދު އަކީ ވަރަށް ނުރައްކާތެރި މީހެއްކަމަށެވެ.
ހާންޖީ ކެފޭގައި މަސައްކަތްކުރާ މިދެމީހުންގެ ތެރެއިން މަރާލާފައިވާ ބަންގްލަދޭޝް މީހާއަކީ އެކެފޭގައި ވެއިޓަރެއްގެ ގޮތުގައި މަސައްކަތްކުރަމުން އަންނަ މީހެކެވެ. ބަންގްލަދޭޝް މީހާ މަރުވެފައިވަނީ ލިބިފައިވާ ޒަޚަމްތަކަށް ހޮސްޕިޓަލްގައި ފަރުވާދެމުން އަންނަނިކޮށެވެ. މައުލޫމާތު ލިބިފައިވާ ގޮތުގައި އާބިދު ބަންގްލަދޭޝް މީހާއަށް ހަމަލާދިނީ ހިނގި ދެ ބަސްވުމެއްގެ ތެރޭގައެވެ.
މިހާދިސާ އާ ގުޅިގެން ރާއްޖޭގައި ދިރިއުޅޭ ބަންގްލަދޭޝްގެ ރައްޔިތުން ހޮނިހިރު ދުވަހުގެ ރޭ ވަނީ ރާއްޖޭގައި ހުންނަ ބަންގްލަދޭޝްގެ އެމްބަސީ ކައިރިއަށް އެއްވެ މުޒާހަރާވެސް ކޮށްފައެވެ.
މިމައްސަލަ ސީރިއަސް މައްސަލައެއްގެ ގޮތުގައި ބަލަމުން އަންނަކަމަށް ފުލުހުން ވަނީ ބުނެފައެވެ.
