ވެރިކަމުގެ އެންމެ ފަހު ވަގުތާ ޖެހެންދެންވެސް މަގާމުން އިސްތިއުފާ ނުދެއްވާ މަގާމުގައި ދެމި ހުންނަވާނެ ކަމަށް ސްރީލަންކާގެ ރައީސް ގޮތަބަޔާ ރާޖަޕަކްސަ ވިދާޅުވެއްޖެއެވެ.
ރައީސް ގޮތަބަޔާ މިފަދައިން ވިދާޅުވެފައިވާއިރު އާދިއްތަ ދުވަހުން ފެށިގެން ލަންކާ ސަރުކާރަށް އައު ކެބިނެޓެއް އައްޔަންކުރަން އެމަނިކުފާނު ވަނީ ނިންމަވާފައެވެ. ގޮތަބަޔާ ވިދާޅުވިގޮތުގައި ސަރުކާރަށް އައު ކެބިނެޓެއް އައްޔަންކުރުމަށް ނިންމަވާފައިވަނީ އިދިކޮޅު ޕާޓީތަކުން ވަގުތީ ސަރުކާރެއް އެކުލަވާލަން އެއްބަސްވެފައިނުވާތީއެވެ.
އެހެންނަމަވެސް ގޮތަބަޔާގެ އާއިލީ ބޭފުޅުން ކަމުގައިވާ ނަމާލް ރާޖަޕަކްސަ، ބަސިލް ރާޖަޕަކްސަ، ޗަމާލް ރާޖަޕަކްސަ އަދި ޝަޝީންދްރަ ރާޖަޕަކްސަ ވަނީ އެއްވެސް މިނިސްޓަރެއްގެ މަގާމާ ހަވާލުވެވަޑައިނުގެންނެވުމަށް ނިންމަވާފައެވެ.
އަދި މީގެ ކުރިން މިނިސްޓަރުންގެ މަގާމު ފުރުއްވާފައިވާ ބޭފުޅުންވެސް ވަނީ މިނިސްޓްރީއެއްގެ އެއްވެސް މަސައްކަތަކާ ހަވާލުވެވަޑައިނުގަންނަވާނެ ކަމަށް ވިދާޅުވެފައެވެ.
2019 ވަނަ އަހަރު ރައްޔިތުންގެ ބޮޑު ތާއިދަކާއެކު ގޮތަބަޔާ ލަންކާގެ ވެރިކަމާ ހަވާލުވެވަޑައިގަތުމަށްފަހު އެމަނިކުފާނު ނިސްބަތްވެ ވަޑައިގަންނަވާ ޕާޓީ، ސްރީލަންކާ ޕޮޑުޖަނާ ޕެރަމޫނާ ޕާޓީ ވަނީ މަޖިލީހުގެ އަގުލަބިއްޔަތު ކާމިޔާބުކޮށް ގައުމުގެ ބޮޑުވަޒީރުކަމުގެ މަގާމު ބޭބޭފުޅު މަހިންދަ ރާޖަޕަކްސައަށް ހޯއްދަވާދެއްވާފައެވެ. ހަ މިލިއަނަށް ވުރެ ގިނަ މީހުންގެ ތާއީދާއެކު ވެރިކަމަށް ވަޑައިގެންނެވި ނަމަވެސް މިއަދު އާންމު ރައްޔިތުން ދަނީ ރައީސް ގޮތަބަޔާގެ ގައުމު ހިންގުމުގެ ގާބިލުކަމެއް ނެތްކަމަށް ބުނެ، އުސޫލުތަކަށް ފާޑުކިޔާ ގަދައަޑުން އިސްތިއުފާއަށް ގޮވާލަމުންނެވެ.
