ކޮލޮމްބޯ ސްޓޮކް އެކްސްޗޭންޖް 5 ދުވަހަށް ބަންދުކުރަން ނިންމައިފި

ކޮލޮމްބޯ ސްޓޮކް އެކްސްޗޭންޖް, އޭޕްރީލް 18 ވަނަ ދުވަހުން ފެށިގެން 5 ދުވަހަށް ބަންދުކުރުމަށް ލަންކާގެ ސެކިއުރިޓީ ކޮމިޝަނުން އަންގައިފިއެވެ.

އިކޮނޮމިކް ޓައިމްސްގައި ރިޕޯޓުކޮށްފައިވާ ގޮތުން ސްޓޮކް އެކްސްޗޭންޖް ބަންދުކުރުމަށް އަންގާފައި ވަނީ ލަންކާގެ މިވަގުތުގެ އިގުތިސާދީ ހާލަތު ބަޔާންކުރުމުގެ ފުރުސަތު އިންވެސްޓަރުންނަށް ދިނުމަށެވެ. އެގޮތުން ސްޓޮކް އެކްސްޗޭންޖްގެ ޑިރެކްޓަރުންގެ ބޯޑާއި ހިއްސާދާރުން ވަނީ ވަގުތީ ގޮތުން ސްޓޮކް މާކެޓް ހޯދުމަށް އެދިފައި ކަމަށް, ލަންކާގެ ސެކިއުރިޓީ ކޮމިޝަނުން ނެރުނު ބަޔާނެއްގައި ވަނީ ބުނެފައެވެ.

އެކޮމިޝަނުން ބުނެފައި ވަނީ މިނިންމުން ނިންމާފައި ވަނީ ސްޓޮކް އެކްސްޗޭންޖްގެ ޑިރެކްޓަރުންގެ ބޯޑާއި ހިއްސާދާރުން ފާހަގަކޮށްފައިވާ ކަންތަކާއި, ގައުމުގެ މިހާރުގެ އިގުތިސާދީ ހާލަތައް ރިއާޔަތްކޮށް، މިކަމުގެ ސަބަބުން ސްޓޮކްމާކެޓަށް ކޮށްފާނެ އަސަރުތަކަށް ވިސްނުމަށްފަހު ކަމަށެވެ.

ލަންކާގެ މަންދޫބުންގެ ޓީމެއް މިމަހުގެ 18 ވަނަ ދުވަހު އެމެރިކާއަށް ދަތުރުކުރުމަށް ނިންމާފައިވާއިރު, މިދަތުރުގައި އިންޓަނޭޝަނަލް މަނިޓަރީ ފަންޑް (އައިއެމްއެފް)އާއެކު މަޝްވަރާކޮށް ހަތަރު ބިލިއަން ޑޮލަރުގެ އެހީ ހޯދުމަށް ލަންކާއިން މަސައްކަތްކުރާނެކަމަށް ރިޕޯޓުތައް ބުނެއެވެ.

ނިމުނު ހަފުތާގައި ލަންކާއިން އެގައުމުން ބޭރުގެ ގައުމުތަކަށް އަދާކުރަން ޖެހެ ދަރަނި ދެއްކުން މަޑުޖައްސާލަން ނިންމުމާއެކު, އެގައުމުން ބޭރުގެ ދަރަނި ދެއްކުމަށްޓަކައި، ދަރަނި ނަގާފައިވާ ފަރާތްތަކާ ވާހަކަދެއްކުމަށް ނިންމި ނިންމުމަށް އައިއެމްއެފުން ތާއީދުކުރާކަމަށް އެއިދާރާއިން ވަނީ ބުނެފައެވެ. އެގޮތުން އައިއެމްއެފްގެ ލަންކާގެ މިޝަން ޗީފް މަސަހިރޯ ނޮޒާކީ ވަނީ, ލަންކާގެ ދަރަނި ދެއްކުމާއި، ކުރަމުން އަންނަ މަސައްކަތް އަދި މެކްރޯއިކޮނަމީ ޕޮލިސީތަކަށް އެކަނި ބަދަލު ގެނެސްގެން އެގައުމު ދަރަނިން ސަލާމަތް ނުވާނެކަން ފާހަގަކޮށް, ދަރަނި ދިން ފަރާތްތަކާ ވާހަކަދައްކައިގެން ދަރަނި އަދާކުރުމުގެ ކަންތައްތައް ކުރިއަށް ގެންދިއުމަށް ނިންމުމަކީ ރަނގަޅު ނިންމުމެއްކަމަށް ވިދާޅުވެފައެވެ.

ސްރީލަންކާގައި މިވަގުތު އޮތް ހަމަނުޖެހުމުން އަރައިގަނެ، ޒަރޫރީ ތަކެއްޗަށް އޮތް ދަތިކަންފިލުވާލައި، (ވަކިން ޚާއްސަކޮށް) ތެލާއި ބޭސް އަދި އިގުތިސާދީ ކާރިސާއިން އަރައިގަތުމަށް 3 ބިލިއަން ޑޮލަރުގެ ބޭރުގެ އެހީ ބޭނުންވާކަމަށް ލަންކާގެ ފިނޭންސް މިނިސްޓަރު އަލީ ސަބްރީ ވަނީ ވިދާޅުވެފައެވެ.

ސްރީލަންކާގައި ކަރަންޓާއި، ބޭހާއި، ތެލާއި އަދި ޒަރޫރީ ތަކެއްޗަށް ވަނީ ޖެހިފައެވެ. މިއާއެކު އާންމުން ރުޅިގަދަވެ, މަގުތަކަށް ނުކުމެ މުޒާހަރާކުރަމުން އަންނައިރު، ރައީސް ގޮތަބަޔާ ރާޖަޕަކްސައަށް ވަނީ ނުއުފުލޭވަރުގެ ފިއްތުންތަކާ ކުރިމަތިލާންޖެހިވަޑައިގެންފައެވެ.

ދިރާސާކުރާ ފަރާތްތަކުން ބުނާގޮތުގައި، މި ހަފުތާތެރޭގައި ލަންކާއިން ދައްކަން ޖެހިފައި ހުރި ދަރަނީގެ ސަބަބުން, އެގައުމުގެ އަހަރު ދުވަހުގެ ބޭރުގެ ދަރަނި 7 ބިލިއަން ޑޮލަރަށް އަރާނެ ކަމަށް ބެލެވެއެވެ. މިއީ މިހާރު ހޯދަން މަސައްކަތް ކުރަމުން އަންނަ 3 ބިލިއަން ޑޮލަރު ހިމަނައިގެންނެވެ. ބޭރުގެ ސޮވްރިން ބޮންޑަށް ނުދެއްކި 12.55 ބިލިއަން ޑޮލަރު ހުރި އިރު، ބޭރުގެ ރިޒަރވްގެ ގޮތުގައި މާޗް މަހުގެ ނިޔަލަށް ހުރީ 1.93 ބިލިއަން ޑޮލަރު ކަމަށް ސްރީލަންކާގެ މަރުކަޒީ ބޭންކުގެ ތަފާސްހިސާބުތަކުން ދައްކައެވެ.