ގައިދީން ތަހައްމަލުކުރަމުންދާ ދަތިތަކަށް ހައްލެއް ހޯދާނަން: އިމްރާން
ވޭތުވެދިޔަ އެއްވެސް ސަރުކާރަކުން މިކަމަށް ނުކުރާ ވަރަށް މިސަރުކާރުން މަސައްކަތްކޮށްފައިވާކަން، ފުރިހަމަ ޔަގީންކަމާއެކު ގަބޫލުކުރައްވާކަމަށް މިނިސްޓަރ ވިދާޅުވި
ހޯމް މިނިސްޓަރ އިމްރާން އަބްދުﷲ - އަސާސީ ތަމްރީނު ޕްރޮގްރާމްގެ ބައިވެރިއަކަށް ޝީލްޑް ހަވާލުކުރައްވަނީ
ގައިދީން ތަހައްމަލުކުރަމުންދާ ދަތިތަކަކީ ފަރުވާ ހޯދަން ޖެހިފައިވާ ގައުމީ މައްސަލައެއްކަން މިސަރުކާރުން ފުރިހަމައަށް ގަބޫލުކުރާކަމަށާއި, އެކަމަށް ފަރުވާ ހޯއްދަވާނެކަމަށް ހޯމް މިނިސްޓަރ އިމްރާން އަބްދުالله ވިދާޅުވެއްޖެއެވެ.
އެމަނިކުފާނު މިހެންވިދާޅުވީ މޯލްޑިވްސް ކަރެކްޝަނަލް ސަރވިސްގެ 25 ވަނަ އަސާސީ ތަމްރީނު ޕްރޮގްރާމްގެ ބައިވެރިން ދަސްވެނިވުމާއި ހުވާކުރުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ.
މިނިސްޓަރ ވިދާޅުވީ, އިބްރާހީމް މުހައްމަދު ސާލިހުގެ ސަރުކާރު އައީ ޒަމާނުއްސުރެ ދިވެހިންގެ ހިތުގައި ޖަލުތަކާމެދު އުފެދިފައިވާ ކިލަނބީ ތަސައްވަރު ދިލާސީކުރުމުގެ ފުރިހަމަ ތަސައްވަރަކާއެކުކަމަށެވެ. މިޒިންމާއާ ހަވާލުވީއިރުވެސް ޖަލުތަކުގެ ހާލު ރަނގަޅަށް ދެނެވަޑައިގެން ހުންނެވިކަމަށެވެ. އަދި ގައިދީން ތަހައްމަލުކުރަންޖެހޭ ދަތިތަކަކީ ފަރުވާ ހޯދަން ޖެހިފައިވާ ގައުމީ މައްސަލައެއްކަން މިސަރުކާރުން ފުރިހަމައަށް ގަބޫލުކުރާކަމަށެވެ. މިސަބަބާހުރެ ޖަލުތައް ހިންގުމުގެ މުޅި ނިޒާމް ރިފޯރމްކޮށް, އިންސާނީ ކަރާމާތާއި, އަސާސީ ހައްގުތައް ކަށަވަރުވާނޭ ފަދައިން ޖަލުގެ ކަންކަން ތަރުތީބުކޮށް ހިންގުމަށް ބޭނުންވާނެ ޑައިރެކްޝަން އަބަދުވެސް ދެއްވަމުން ގެންދަވާކަމަށެވެ.
މިނިސްޓަރ ވިދާޅުވީ, ވޭތުވެދިޔަ އެއްވެސް ސަރުކާރަކުން މިކަމަށް ނުކުރާ މަސައްކަތް މިސަރުކާރުން ކޮށްފައިވާކަން ފުރިހަމަ ޔަގީންކަމާއެކު ގަބޫލުކުރައްވާކަމަށެވެ.
ސަރުކާރުގެ އެންމެ ފުރަތަމަ ދުވަސްކޮޅުގައި ޖަލު އޮޑިޓްކޮށް ފުރިހަމަ ރިޕޯޓެއް އެކުލަވާލެއްވިކަން މިނިސްޓަރ ފާހަގަކުރެއްވިއެވެ. ޖަލުގެ އޮޑިޓް ރިޕޯރޓްގައި ފާހަގަކޮށްފައިވާ މުހިއްމު ކަންކަން ކަރެކްޝަނަލް ސަރވިސްއިން މިހާރުވެސް ކޮށްފައިވާކަމަށާއި, އަދި ނުކުރެވިހުރި ކަންކަންވެސް ކުރެވޭނެ މަގު ފަހިކުރަމުންދާކަމަށް މިނިސްޓަރ ވިދާޅުވިއެވެ.
ޖަލުގެ އޮޑިޓް ރިޕޯރޓްގައި ފާހަގަކޮށްފައިވާ ކަންކަމުގެ ތެރެއިން, ކުރަމުންދާ ކަންކަމާއި ކޮށްފައިވާ ކަންކަން, އެކަމަށް ޚާއްސަކުރެވިފައިވާ ކޮމިޓީއަކާއެކު ގާތުން ބައްލަވަމުން ދާކަމަށްވެސް މިނިސްޓަރ ވިދާޅުވިއެވެ. ރާއްޖޭގައި މިހާރުހުރި ގިނަ ޖަލުތަކަކީ އުފެދުމުގައި އެހެން ކަމަކަށް ބޭނުންކުރާގޮތަށް އިމާރާތްކޮށްފައިވާ ޖަލުތަކެއްކަންވެސް މިނިސްޓަރ ފާހަގަކުރެއްވިއެވެ.
އޮފިސަރުންގެ އިދާރީ މަސައްކަތްތަކަށް ގާއިމްކުރެވިފައިވާ މާހައުލަކީވެސް މިފަދަ ސްޓްރެސް މަސައްކަތެއް ކުރުމުގައި އެންމެ އެކަށީގެންނުވާ ތަންތަން ކަމަށާއި, މިއީވެސް އެންމެންނަށް ފެންނަންއޮތް ހަގީގަތެއްކަމަށް މިނިސްޓަރ ވިދާޅުވިއެވެ.
ކަރެކްޝަންގައި ތަމްރީނުދިނުމަށް އެންމެ އެކަށޭނަ ވަސީލަތްތައް ނެތުން އެއީ ހިތާމަކުރާކަމެއްކަމަށާއި, 50 އަހަރުވީ މިޚިދުމަތުގައި ޒަމާނާ އެއްވަރަށް ޓްރެއިނިންގ ދެވޭނެ މަގުތައް ފަހިކޮށްދިނުމަކީ ވަރަށް މުހިއްމުކަމެއް ކަމަށްވެސް މިނިސްޓަރ ވިދާޅުވިއެވެ. އަދި މިކަމަށް މިއަދު ވަރަށް ބޮޑު ހައްލެއް ހޯދައިދެވިފައިވާކަންވެސް މިނިސްޓަރ ފާހަގަކުރެއްވިއެވެ. ނޭޝަނަލް ކޮލެޖް އޮފް ޕޮލިސިންގ އެންޑް ލޯ އެންފޯރސްމަންޓްގެ ތެރެއިން, ގާނޫނު ތަންފީޒުކުރާ ހުރިހާ މުއައްސަސާތަކަށް ބޭނުންވާނެ ތަމްރީނު އެންމެ ރަނގަޅުގޮތުގައި ފޯރުކޮށްދިނުމަށް މިއަދު އެކަށީގެންވާ ނިޒާމެއް ގާއިމްކުރެވިފައިވާކަން މިނިސްޓަރ ފާހަގަކުރެއްވިއެވެ.
ރާއްޖޭގެ ޖަލުތަކުގައި ނުވަތަ ކަރެކްޝަނަލް ސަރވިސްގެ ބެލުމުގެ ދަށުގައި 2000އެއްހާ ގައިދީން ތިބިއިރު, ހައެއްކަ ސަތޭކަ އޮފިސަރުންނަކީ މިކަން ކުރުމަށް އެންމެ އެކަށީގެންވާ އަދަދެއްނޫންކަމަށާއި, މިކަމުގެ ސަބަބުން ގައިދީންނަށް ދޭންޖެހޭ ޚިދުމަތަށް (ޚާއްސަކޮށް ރިހިބިލިޓޭޝަންގެ މަސައްކަތަށް) ދޭންޖެހޭ ސަމާލުކަން ނުދެވި އެކަން އެންމެ ފުރިހަމަގޮތުގައި ނުކުރެވުމުން, ޖަލުތަކުން ނެރޭ ގައިދީންނަށް އެންމެ ފުރިހަމަގޮތުގައި ޕްރޮގްރާމް ހިންގިފައިނުވާކަން ގަބޫލުފުޅުކުރައްވާކަމަށްވެސް މިނިސްޓަރ ވިދާޅުވިއެވެ. އެހެންކަމުން ޖަލުގައި އެކަށީގެންވާ މިންވަރަށް އިންސާނީ ވަަސީލަތް ގާއިމްކުރުމަށް ސަރުކާރުން ވަރަށް ބޮޑު އިސްކަމެއް ދެއްވާކަމަށް ވިދާޅުވިއެވެ.
މިނިސްޓަރ ވިދާޅުވީ, އަލަށް ގިނަ އޮފިސަރުންތަކެއް ކަރެކްޝަނަށް ނެގެނީ ރައީސުލްޖުމްހޫރިއްޔާގެ ސީދާ އެހީފުޅާއެކު ކަމަށެވެ. އަލަށް ގުޅުނު ކަރެކްޝަން އޮފިސަރުންނާ މުޚާތަބުކުރައްވާ މިނިސްޓަރ ވިދާޅުވީ, އެއޮފިސަރުން ހަވާލުވަނީ ވަރަށްބޮޑު ގައުމީ މަސައްކަތަކާކަމަށެވެ.
