ލަންކާއިން ދަރަނި ދެއްކުމުގައި އަމަލުކުރަން ނިންމި ނިންމުމަށް އައިއެމްއެފުން މަރުހަބާ ކިޔައިފި

ސްރީލަންކާއިން ބޭރުގެ ދަރަނި ދެއްކުމަށްޓަކައި، ދަރަނި ނަގާފައިވާ ފަރާތްތަކާއި ވާހަކަދެއްކުމަށް ނިންމި ނިންމުމާއި ގުޅިގެން، އިންޓަރނޭޝަނަލް މަނިޓަރީ ފަންޑް (އައިއެމްއެފް) އިން މަރުހަބާ ކިޔައިފިއެވެ.

އައިއެމްއެފްއިން ބުނެފައިވަނި ލަންކާގެ އެ ނިންމުމަށް މަރުހަބާ ކިޔާ ކަމަށާއި، ދަރިނީ ދޫކޮށްފައިވާ ފަރާތްތަކާއި މަޝްވަރާ ކުރުމަށް ނިންމި ނިންމުމަށް އައިއެމްއެފްއިން ތާއީދުކުރާ ކަމަށެވެ. އައިއެމްއެފްއިން ލަންކާގެ މި ނިންމުމަށް ތާއިދުކޮށްފައިވާއިރު، ލަންކާއިން ވަނީ އޭގެ ކުރީ ދުވަހަކު ބޭރުގެ ދަރަނިތައް ދެއްކުން ހުއްޓާލާފައިވާ ކަމަށް އިއުލާންކޮށްފައެވެ.

އައިއެމްއެފްގެ ލަންކާގެ މިޝަން ޗީފް މަސަހިރޯ ނޮޒާކީ ވިދާޅުވީ ލަންކާގެ ދަރަނި ދެއްކުމާއި، ކުރަމުން އަންނަ މަސައްކަތް އަދި މެކްރޯއިކޮނަމީ ޕޮލިސީތަކަށް އެކަނި ބަދަލު ގެނެސްގެން އެގައުމު ދަރަނިން ސަލާމަތް ނުވާނެކަމަށެވެ. އެހެންކަމުން ލަންކާއިން ދަރަނި ދިން ފަރާތްތަކާއި ވާހަކަދައްކައިގެން ކުރިއަށް ގެންދިއުމަށް ނިންމި ނިންމުމަށް މަރުހަބާ ކިޔާ ކަމަށެވެ.

އައިއެމްއެފްއިން ލަންކާގެ މި ނިންމުމަށް މަރުހަބާ ކިޔާފައިވާއިރު، ލަންކާގެ ވަފުދެއް މި މަހުގެ 18 ވަނަ ދުވަހުގެ އައިއެމްއެފްއާއި ބައްދަލުކުރުމަށް އެމެރިކާއަށް ފުރުމަށް ވަނީ ނިންމާފައެވެ. އަދި ހާއްސަ އުސޫލުތަކެއް ހަދާ، މާލީ ކަންކަން ހަރުދަނާކުރުމަށް ހާއްސަ ކޮމިޓީއެއް އެލުލަވާލުމުގެ މަސައްކަތް އަންނަނީ ކުރަމުންނެވެ.

ސްރީލަންކާގައި މިވަގުތު އޮތް ހަމަނުޖެހުމުން އަރައިގަނެ، ޒަރޫރީ ތަކެއްޗަށް އޮތް ދަތިކަންފިލުވާ، ވަކިން ހާއްސަކޮށް ތެލާއި ބޭސް އަދި އިގްތިސާދީ ކާރިސާއިން އަރައިގަތުމަށް 3 ބިލިއަން ޑޮލަރުގެ ބޭރުގެ އެހީ ބޭނުންވާ ކަމަށް ލަންކާގެ ފިނޭންސް މިނިސްޓަރު އަލީ ސަބްރީ ވަނީ ވިދާޅުވެފައެވެ.

ސްރީލަންކާގައި ކަރަންޓާއި، ބޭހާއި، ތެލާއި އަދި ޒަރޫރީ އާންމު ތަކެއްޗަށް ވަނީ ޖެހިފައެވެ. މިއާއެކު އާންމުން ރުޅިގަދަވެ މަގުތަކަށް ނިކުމެ މުޒާހަރަތައް ކުރަމުންއަންނައިރު، ރައީސް ގޮތަބަޔާ ރާޖަޕަކްސައަށް ވަނީ ނުއުފުލޭވަރުގެ ފިއްތުންތަކާއި ކުރިމަތިލާންޖެހިފައެވެ.

ސަބްރީ ވިދާޅުވެފައިވަނީ ގައުމަށް ބޭނުންވާ 3 ބިލިއަން ޑޮލަރު ހޯދުމަށްޓަކައި އިންޓަރނޭޝަނަލް މަނިޓަރީ ފަންޑު (އައިއެމްއެފް) އާއި މަޝްވަރާތައް ކުރުމަށްދަނީ ތައްޔާރުވަމުންނެވެ. މީގެ އިތުރުން އިންޓަރނޭޝަނަލް ސޮވްރިން ބޮންޑު ރީސްޓްރަކްޗަރު ކުރުމާއި، ލޯންތައް ދެއްކުން ފަސްކުރުމުގެ އިތުރުން، ޖުލައި މަހުގައި ދައްކަން ޖެހޭ ބިލިއަން ޑޮލަރުގެ ދަރަނި ދެއްކުމަށް ބޮންޑް ހޯލްޑަރުންނާއި މަޝްވަރާކުރަން ފައްޓަވާފައިވާ ކަމަށެވެ.

ދިރާސާ ކުރާ ފަރާތްތަކުން ބުނާ ގޮތުގައި، މި ހަފްތާ ތެރޭގައި ލަންކާއިން ދައްކަން ޖެހިފައި ހުރި ދަރަނީގެ ސަބަބުން އެގައުމުގެ އަހަރު ދުވަހުގެ ބޭރުގެ ދަރަނި 7 ބިލިއަން ޑޮލަރަށް އަރާނެ ކަމަށް ބެލެވެއެވެ. މިއީ މިހާރު ހޯދަން މަސައްކަތް ކުރަމުން އަންނަ 3 ބިލިއަން ޑޮލަރު ހިމަނައިގެންނެވެ. ބޭރުގެ ސޮވްރިން ބޮންޑަށް ނުދެއްކި 12.55 ބިލިއަން ޑޮލަރު ހުރި އިރު، ބޭރުގެ ރިޒަރވްގެ ގޮތުގައި މާޗް މަހުގެ ނިޔަލަށް ހުރީ 1.93 ބިލިއަން ޑޮލަރު ކަމަށް ސްރީލަންކާގެ މަރުކަޒީ ބޭންކުގެ ތަފާސްހިސާބުތަކުން ދައްކައެވެ.