ދަނޑުވެރިކަމަށް ދޫކޮށްފައިވާ ހއ. މަޑުލުން ވެލި ނަގައި ގާއެޅުމަށް ބޭނުން ކުރާކަމަށް ދެކެވޭ ވާހަކަތައް އެރަށް ނަގާފައިވާ ކުންފުނި، ދަ ހޯކްސް ޕްރައިވެޓް ލިމިޓެޑްއިން ދޮގުކޮށްފިއެވެ.

ރާއްޖެއެމްވީއަށް މައުލޫމާތު ލިބިފައިވާ ގޮތުގައި އެރަށު ތުނޑިން ގަވާއިދާ ޚިލާފަށް ވެލި ނަގައި އެޅިގާ އަޅައިގެން ވިއްކަމުންދާ މައްސަލައެއްގައި އެ ރަށް ނަގާފައިވާ ކުންފުނި 1 ލައްކަ ރުފިޔާއިން ޖޫރިމަނާ ކުރުމަށް މިނިސްޓްރީ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ އިން ވަނީ ނިންމާފައެވެ.

އެ ރަށް ނަގާފައިވާ ފަރާތް ޖޫރިމަނާ ކުރުމަށް ނިންމީ އޭޕްރީލް މަހުގެ 7 ވަނަ ދުވަހުއެވެ.

މައުލޫމާތު ލިބޭ ގޮތުގައި މިނިސްޓްރީން މިހާރު ވަނީ އެކަމާ ގުޅިގެން ބަލަންޖެހޭ ކަންކަން ބެލުމަށް އެންވަޔަރަމަންޓް ޕްރޮޓެކްޝަން އޭޖެންސީ (އީޕީއޭ) އަށްވެސް އަންގާފައެވެ. އަދި އެކަމާ ގުޅޭ މައްސަލަތަކެއް އެކި ފަރާތްތަކުން ވަނީ ފުލުހުންނަށްވެސް ހުށައަޅާފައެވެ.

އެކަމާ ގުޅޭގޮތުން ރާއްޖެއެމްވީއިން ސުވާލުކޮށްލުމުން އީޕީއޭގެ ޑިރެކްޓަރ ޖެނެރަލް މުހައްމަދު ނައީމް ވިދާޅުވީ، އެ މައްސަލައިގައި އަޅަންޖެހޭ ފިޔަވަޅުތައް މިހާރު އީޕީއޭއިން ބަލަމުންދާ ކަމަށެވެ. އެގޮތުން ފުލުހުންވެސް އެކަން ތަހުގީގު ކުރުމަށްފަހު އީޕީއޭއަށް ރިޕޯޓު ހިއްސާ ކޮށްފައިވާއިރު، ޤަވާއިދާ ޚިލާފަށް އެ ރަށުން ވެލި ނަގަމުންދާކަން ރިޕޯޓުންވެސް އެނގޭކަމަށް އޭނާ ވިދާޅުވިއެވެ.

އެކަމާ ގުޅޭގޮތުން ރާއްޖެއެމްވީއާ ވާހަކަ ދައްކަވަމުން ދަ ހޯކްސް ޕްރައިވެޓް ލިމިޓެޑުގެ ޗެއަރމަން އަހުމަދު ރަޝީދު ވިދާޅުވީ، ކުންފުނީގެ ކޮޅުވެއްޓީގައި ވެލި ގެންދަނީ ހުޅުމާލެއިން ކަމަށެވެ. އެގޮތުން އެއީ ހުޅުމާލޭ ގޯތިތަކެއް ކޮނުނުއިރު ނަގާފައިވާ ވެލިތަކެއް ކަމަށާއި، އެ ވެލިތައް މަޑުލަށް ގެންގޮސް، އެ ރަށުގެ ސަރަޙައްދަކަށް އަޅާކަމަށް އޭނާ ބުންޏެވެ.

މަޑުލަށް ވެލިތައް ގެންދިއުމަށްފަހު ގާއެޅުމަށް ބޭނުންކުރާކަން އޭނާ ފާހަގަ ކުރެއްވިއެވެ.

މިނިސްޓްރީން ކުންފުނި ޖޫރިމަނާ ކުރުމަށް ނިންމީ އެ ރަށް ދޫކުރިއިރު އެގްރީމަންޓުގައި ބަޔާންކޮށްފައިވާ ކަންކަންފިޔަވާ އިތުރު ކަންކަމަށް އެ ރަށް ބޭނުން ކުރާނަމަ، ޖޫރިމަނާ ކުރެވޭނެކަމަށް އެގްރީމަންޓުގައިވެސް ހިމެނިފައިވާނެކަން ބަޔާންކޮށެވެ.

ކުންފުނިން ބުނާ ގޮތުގައި އެ ކުންފުނީގެ ވިސްނުމަކީ ރަށް ދޫކޮށްލުމެވެ. އަދި ރަށުގައި ދަނޑުވެރިކަމާ ގުޅުންހުރި މަސައްކަތްތައް ކުރަން ފަށާފައިވާނެކަމަށްވެސް އޭނާ ވިދާޅުވިއެވެ. އެކަމުގައި މަޑުޖެހުމެއް އައީ ކޮވިޑުގެ ޙާލަތުގެ ސަބަބުންކަން އޭނާ ފާހަގަކުރެއްވިއެވެ.