ހުޅުމާލެ ދެވަނަ ފިޔަވަހީގައި އިމާރާތްކުރަމުންދާ ވިނަރެސް އެޕާޓްމެންޓުތަކަށް އެދުމުގެ ފުރުސަތު ހުޅުވާލާނީ ޕޯޓަލް އެއް މެދުވެރިކޮށް ކަމަށް އެޗްޑީސީގެ މެނޭޖިންގ ޑިރެކްޓަރު ސުހައިލް އަހުމަދު ވިދާޅުވެއްޖެއެވެ.

ރާއްޖެޓީވީގެ "ފަލަސުރުޚީ" ޕްރޮގްރާމްގައި ވާހަކަފުޅުދައްކަވަމުން ސުހައިލް ވިދާޅުވީ ފްލެޓް ބޭނުންވާ ފަރާތްތަކަށް ޕޯޓަލް މެދުވެރިކޮށް އެމީހަކު ބޭނުންވާ ފްލެޓަކަށް އެދުމުގެ ފުރުސަތު ލިބިގެންދާނެކަމަށެވެ. އަދި އެމީހަކު ބޭނުންވާ ފްލެޓް އެހެން މީހަކު ނަގާފައި ހުރިނަމަ ވެއިޓް ލިސްޓުވެސް ކުރެވޭނެކަމަށް ސުހައިލް ވިދާޅުވިއެވެ. އެގޮތުން ކޮންމެ މީހަކަށްވެސް މަދުވެގެން އެމީހަކު ބޭނުންވާ ފަސް ފްލެޓް އިހުތިޔާރުކުރުމުގެ ފުރުސަތު ލިބޭނެކަމަށް ސުހައިލު ވިދާޅުވިއެވެ.

ފްލެޓަށް އެދޭއިރު އެމީހަކު އެންމެ ބޭނުންވާ ފްލެޓް އެހެން މީހަކު ނުނަގާއޮތްނަމަ އެމީހަކަށް އެފްލެޓް ލިބޭނެކަމަށް ސުހައިލު ވިދާޅުވިއެވެ. ސުހައިލު ވިދާޅުވީ ޕޯޓަލް ހުޅުވާލުމުގެ ކުރިން ޕޯޓަލް އަށް ބޭނުންވާ މައުލޫމާތުތައް ހާމަކުރާނެ ކަމަށެވެ.

ސުހައިލު ވިދާޅުވީ ފްލެޓްތަކުގެ އަގުތައް ކަނޑައަޅާފައިވަނީ ތިރީ ފްލޯތަކަށް އަގު ކުޑަކޮށް މަތީ ފްލޯތަކުގެ ފްލެޓްތަކުގެ އަގު ބޮޑުވާގޮތަށްކަމަށެވެ. މީގެއިތުރުން ފްލެޓް ހުރި ގޮތުން ވިއު އަށް ބަލައިގެންވެސް އަގުތައް ކަނޑައަޅާފައިވާނެ ކަމަށް ސުހައިލު ވިދާޅުވިއެވެ.

އެހެންކަމުން ސީދާ މިވެނި ފްލެޓެއްގެ އަގު އުޅޭނީ މިވެނި އަގަކަށޭ ވިދާޅުވާން ދަތިކަމަށް ސުހައިލު ވިދާޅުވިއެވެ.

ފްލެޓްތައް އިއުލާނުކުރާނެ ތާރީޚާއި ގުޅޭގޮތުން ސުހައިލު ވިދާޅުވީ މިއަހަރު ތެރޭގައި ފްލެޓްތައް އިއުލާނުކުރެވޭނެކަމަށެވެ.

މިދިޔަ ފެބްރުއަރީ މަސް ތެރޭގައި ރާއްޖެޓީވީގެ "ފަލަސުރުޚީ" ޕްރޮގްރާމްގައި ވާހަކަފުޅުދައްކަވަމުން ސުހައިލް ވިދާޅުވެފައިވަނީ އޭގެ ދެ ހަފްތާއެއްހާ ތެރޭގައި ފްލެޓްތައް ހުޅުވާލާނެކަމަށެވެ. އެކަމާއި ގުޅޭގޮތުން ސުހައިލު ވިދާޅުވީ ވިނަރެސް ފްލެޓުން މާލޭގައި ދިރިއުޅޭ ރައްޔިތުންނަށް ޚާއްސަކުރެވިފައިވާ ފްލެޓްތަކުގައި ވަކި ޝަރުތުތަކެއް ކަނޑައަޅަން މަސައްކަތްކުރަމުންދާތީ އެކަމުގައި ލަސްތަކެއް ކުރިމަތިވެފައިވާކަމަށެވެ.

ނަމަވެސް އެޝަރުތުތައް ހިމެނުމަށްފަހު ވީއެންމެ އަވަހަކަށް ފްލެޓަށް ހުޅުވާލުމުގެ މަސައްކަތްކުރަމުންދާކަމަށް ސުހައިލު ވިދާޅުވިއެވެ.

ހައުސިން އެންޑް ޕްލޭނިންގ މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން މީގެކުރިން "ރާއްޖެއެމްވީ" އަށް މައުލޫމާތު ދެއްވަމުން ވިދާޅުވީ ހުރިހާ އެންމެނަށް ފްލެޓް ވިއްކުމަށް ފަހު ބާކީވާ ހުރިހާ ފްލެޓެއް ވިއްކުމަށް ނިންމާފައި ވަނީ ހަމައެކަނި މާލޭ މީހުންނާއި ދަފްތަރުގައި ޖެހިފައިވާ މީހުންނަށް ކަމަށް މީގެ ކުރިން ނިންމި ނަމަވެސް، މިހާރު އެނިންމުން ބަދަލުކޮށް ގިނަ ދުވަހު މާލޭގައި ދިރިއުޅެމުންދާ ރަށްރަށުގެ މީހުންނަށް ވަކި އަދަދަކަށް އެޕާޓްމެންޓް ވިއްކުމަށް ނިންމާފައިވާކަން ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު އަންގަވާފައިވާ ކަމަށެވެ. އެ އެންގެވުމާއެކު، އެގޮތަށް މަސައްކަތްތައް ކުރިއަށްދާ ކަމަށް އަކްރަމް ވިދާޅުވިއެވެ. އަކްރަމް ވިދާޅުވީ މިހާރު ކްރައިޓީރިއާ އެކުލަވާލުމުގެ މަސައްކަތްތައް ކުރިއަށްދާ ކަމަށާއި، ކައިރި މުސްތަގުބަލެއްގައި އެ މައުލޫމާތުތައް އާއްމު ކުރެވިގެންދާނެ ކަމަށެވެ.

ހިޔާ މަޝްރޫއުން ފްލެޓް ދޫކޮށްލި މީހުންގެ ތެރެއިން ވިނަރެސްއިން އެޕާޓްމެންޓް ބޭނުންވާ މީހުންނާއި، އެޕާޓްމެންޓް ގަތުމަށް ސީލައިފަށް ފައިސާ ދެއްކި މީހުންނާއި، ގުޅީފަޅުން ފްލެޓް ގަތުމަށް ފައިސާ ދެއްކި މީހުންގެ ތެރެއިން، ވިނަރެސްއިން އެޕާޓްމެންޓް ލިބޭ މީހުން ކަނޑައެޅުމުގެ މަސައްކަތް އެޗްޑީސީން ގެންދަނީ ކުރަމުންނެވެ. ހިޔާ މަޝްރޫއުން ފްލެޓް ދޫކޮށްލި މީހުންގެ ތެރެއިން ވިނަރެސްގެ އެޕާޓްމެންޓަށް އެދި ހުށަހަޅާފައިވަނީ 76 މީހުންނެވެ. ސީލައިފަށް ފައިސާ ދެއްކި މީހުންގެ ތެރެއިން ވިނަރެސްގެ އެޕާޓްމެންޓަށް 400 އަށްވުރެ ގިނަ މީހުން ވަނީ ހުށަހަޅާފައެވެ. އަދި ގުޅީފަޅުން ފްލެޓް ގަންނަން ފައިސާ ދެއްކި މީހުންގެ ތެރެއިން ވިނަރެސްގެ އެޕާޓްމެންޓަށް އެދި ހުށަހަޅާފައިވަނީ 91 މީހުންނެވެ. 

ވިނަރެސް މަޝްރޫއުގެ ދަށުން ތައްޔާރުކުރާ 1،344 ފްލެޓް ހުންނާނީ 10 ޓަވަރަށް ބަހާފައެވެ. އަދި ކޮންމެ ޓަވަރެއްގައި 13 ފަންގިފިލާ ހުންނަ އިރު، ކޮންމެ އެޕާޓްމެންޓެއްގައި 3 ކޮޓަރިއާއި 3 ފާޚާނާގެ އިތުރުން ބެލްކަންޏެއް ހުންނާނެއެވެ. ވިނަރެސް ފްލެޓުތަކުގެ ޖާގަ ބޮޑުވި ނަމަވެސް އޭގެ އަގު ހިޔާ ފްލެޓުތަކަށް ވުރެ ބޮޑު ވާނެ ކަމަށް ހައުސިންގ މިނިސްޓްރީން ވަނީ މީގެ ކުރިން ބުނެފައެވެ.

ވިނަރެސް އެޕާޓްމެންޓްތަކުގައި ހަތަރު ބާވަތެއްގެ އެޕާޓްމެންޓު ހުންނާނެއެވެ. އެއީ މެރީނާ ވިއު، އިނަރ ވިއު، އައުޓަރ ވިއު އަދި ސްޓޭންޑާރޑް ވިއު އެޕާޓްމެންޓުތަކެވެ. އޭގެ ތެރެއިން ސްޓޭންޑާޑް ވިއު އެޕާޓްމެންޓުގައި ހުންނާނީ 883 އަކަފޫޓެވެ. ނަމަވެސް ބާކީ ތިން ބާވަތުގެ އެޕާޓްމެންޓުގައި 902 އަކަފޫޓު ހުންނާނެއެވެ.