ރައީސް އޮފީހުން 2020ވަނަ އަހަރު ޚަރަދުކޮށްފައިވަނީ މާލިއްޔަތު ގާނޫނާ އެއްގޮތަށްކަމަށް އޮޑިޓް ރިޕޯޓުން ދައްކައިފިއެވެ.

އޮޑިޓް ކުރެވުނު މާލީ ބަޔާންތައް ތައްޔާރުކޮށްފައިވަނީ ރައީސުލްޖުމްހޫރިއްޔާގެ އޮފީހާއި، ރައީސުލްޖުމްހޫރިއްޔާގެ ގަނޑުވަރާއި، ރައީސުލްޖުމްހޫރިއްޔާގެ ނައިބުގެ ގަނޑުވަރުގެ ހިސާބުތައް ހިމަނައިގެން އެއް ބަޔާނެއްގެ ގޮތުގައެވެ. އެހެންކަމުން ރައީސް އޮފީހާއި ގަނޑުވަރާއި، ނާއިބުރައީސްގެ ގަނޑުވަރުގެ ޚަރަދުތައް ބަލަހައްޓާފައިވަނީ ދައުލަތުގެ މާލިއްޔަތު ގާނޫނާ އެއްގޮތަށްކަމަށް އޮޑިޓް ރިޕޯޓުގައި ބުނެފައިވެއެވެ.

އޮޑިޓަރ ޖެނެރަލްގެ އޮފީހުން ނެރުނު އޮޑިޓް ރިޕޯޓްގައި ބުނެފައިވަނީ، މައިގަނޑު ގޮތެއްގައި ރައީސުލްޖުމްހޫރިއްޔާގެ އޮފީހުގެ 31 ޑިސެންބަރު 2020ށް ނިމުނު މާލީ އަހަރުގެ ޚަރަދުތައް ކޮށްފައިވަނީ އެ އަހަރަށް ރައްޔިތުންގެ މަޖިލީހުން ރައީސުލްޖުމްހޫރިއްޔާގެ އޮފީހަށް ފާސްކޮށްދެއްވި ބަޖެޓުގެ މަގުސަދުތައް ހާސިލްވާގޮތަށް ކަމަށެވެ. ބަޖެޓުގައި ކަނޑައެޅިފައިވާ ކަންތައްތަކަށް، ބަޖެޓުގައި ކަނޑައެޅިފައިވާ މިންވަރަށް، ދައުލަތުގެ މާލިއްޔަތުގެ ގާނޫނާއި ދައުލަތުގެ މާލިއްޔަތުގެ ގަވާއިދާ އެއްގޮތަށް ކޮށްފައިވާކަމަށް ރިޕޯޓުގައި ބުނެފައިވެއެވެ. އަދި، ރައީސުލްޖުމްހޫރިއްޔާގެ އޮފީހުގެ އެހެނިހެން މާލީ ކަންކަން، މައިގަނޑު ގޮތެއްގައި، ހިންގައި ބަލަހައްޓާފައި ވަނީ ދައުލަތުގެ މާލިއްޔަތުގެ ގާނޫނާއި ގަވާއިދާ އެއްގޮތަށްކަމަށްވެސް ރިޕޯޓުގައިވަނީ ބުނެފައެވެ.