ދެ ލެގުގެ ނަތީޖާއިން އެގްރިގޭޓް އެއްވަރުވުމުން, ނަތީޖާ ނެރުމަށް ކުޅުނު 15 މިނިޓްގެ ދެހާފްގައި ކުރި ހޯދައިގެން ޗެމްޕިއަންސް ލީގު ސެމީފައިނަލުން ރެއާލް މެޑްރިޑް ޖާގަ ހޯދައިފިއެވެ.

ފުރަތަމަ ލެގު ޗެލްސީގެ ދަނޑުގައި ކުޅެ 3-1 ން ކުރި ހޯދާފައިވަނިކޮށް, އަމިއްލަ ދަނޑުގައި ކުޅުނު ދެވަނަ ލެގުގެ ފުރިހަމަ ވަގުތު ހަމަވިއިރު ހަމަ އެނަތީޖާއިން ކުރި ހޯދީ ޗެލްސީއެވެ. ދެވަނަ ލެގުގައި ފުރަތަމަ ތިން ލަނޑު ޖަހާ ޗެލްސީން ރެއާލް ސިއްސުވާލީ މޮޅަށް ކުޅެގެންނެވެ. ޗެލްސީން ތިންވަނަ ލަނޑު ޖަހާ އެގްރިގޭޓް ނަތީޖާ އަނބުރާލުމުގެ ކުރިންވެސް ލަނޑެއް ޖެހިއެވެ. ރެފްރީ އެލަނޑު ފުރަތަމަ ޤަބޫލުކުރި ނަމަވެސް, ޗެލްސީ ކުޅުންތެރިން އުފާފާޅުކުރި ފަހުން ވީއޭއާރުން ބެލުމަށްފަހު ލަނޑު ބަލައިނުގަންނަން ނިންމިއެވެ. އެއީ މާކޮސް އަލޮންސޯ ބޯޅަ ފޮނުވާލުމުގެ ކުރިން އަތުގައި ޖެހުމުންނެވެ. ޗެލްސީއަށް ފުރަތަމަ ލަނޑު ޖަހައިދިނީ މޭސަން މައުންޓްއެވެ. ދެވަނަ ލަނޑު ޖެހީ އެންޓޯނިއޯ ރުޑިގާއެވެ. ތިންވަނަ ލަނޑު ވާނާ ޖެހީ ރެއާލްގެ ޑިފެންސްލައިން ތަޅުވާލުމަށްފަހު ގޯލްގެ ދުރުކަނަށް ފޮނުވާލައިގެންނެވެ.

އޭގެފަހުން ރެއާލްގެ ކޯޗު އެންޗެލޮޓީ އެއްފަހަރާ ދެބަދަލެއް ގެނައެވެ. އެއީ ޓޯނީ ކުރޫޒްއާއި ކަސެމީރޯގެ ބަދަލުގައި ކަމަވިންގާ އާއި ރޮޑްރީގޯ ކުޅެން ނެރުމެވެ. ކުޅެން ނިކުއިންތާ ދެވަނަ މިނިޓްގައި ރޮޑްރީގޯ ރެއާލްއަށް ލަނޑު ޖަހައިދީ އެގްރިގޭޓް އެއްވަރުކޮށްދިނީ މޮޑްރިޗްގެ މޮޅު, ހިތްގައިމު ޕާހަކުން އެއްފަހަރުން ޖަހާ ގޯލްގެ ތެރެއަށް ފޮނުވާލައިގެންނެވެ. މިނަތީޖާއާއެކު މެޗު ނިމުމުން ދެޓީމްގެ އެގްރިގޭޓް 4-4 ން އެއްވަރުވިއެވެ. ނަތީޖާ ނެރުމަށް ކުޅުނު 15 މިނިޓްގެ ތެރެއިން ފުރަތަމަ ހާފްގައި ރެއާލް ސެމީއަށް ގެންގޮސްދިން ލަނޑު ޖެހީ ފުރަތަމަ ލެގުގައި ހެޓްރިކް ހެދި ކެޕްޓަން ބެންޒިމާއެވެ. އޭނާ ލަނޑުޖެހީ ވިނީޝިއުސް ޖޫނިއަރ ނަގައިދިން ހުރަސް ބޮލުން ގޯލްގެ ތެރެއަށް ފޮނުވާލައިގެންނެވެ.

މިދިޔަ ސީޒަންގެ ޗެމްޕިއަންސް ލީގު ސެމީފައިނަލުން ރެއާލް މެޑްރިޑް ކެޓީ ޗެލްސީ އަތުން ބަލިވެގެންނެވެ. ޗެމްޕިއަން ޗެލްސީ މިސީޒަންގައި ކެޓީ ކުއާޓަރ ފައިނަލްގައި ރެއާލް އަތުން ބަލިވެގެންނެވެ.