ސްރީލަންކާއިން ދައްކަން ޖެހޭ ބޭރުގެ ދަރަނިތައް ނުދައްކަން އެގައުމުން ނިންމައިފިއެވެ.
އަންގާރަ ދުވަހު ލަންކާގެ ސެންޓްރަލް ބޭންކުން ބުނީ އެގައުމުން ދައްކަންޖެހޭ ބޭރުގެ ދަރަނިތައް ދެއްކުން މިހާރު ވަނީ ވަރަށް ބޮޑު ގޮންޖެހުމަކަށް ކަމަށާއި އެދަރަނިތައް މިހާރު ދެއްކެއް ނެތް ކަމަށެވެ. އެގޮތުން ބޭރުފައިސާ މަދު ވެފައިވާ މިދަނޑިވަޅުގައި އެފައިސާއިން ޒަރޫރީ ބޭނުންތަކަށް ހަރަދުކުރަން ޖެހޭ ކަމަށް ސެންޓްރަލް ބޭންކުން ފާހަގަކުރެއެވެ.
ސެންޓްރަލް ބޭންކްގެ ގަވަރުނަރު ޕީ. ނަންދަލަލް ވީރަސިންގް ވަނީ އާންމުންނަށް ބޭނުންވާ ޒަރޫރީ ސާމާނު ހޯދުމަށް ހަރަދުކުރުން، ބޭރުގެ ދަރަނި އަދާކުރުމަށް ވުރެއް މިވަގުތު މުހިންމު ކަމަށް ވިދާޅުވެފައެވެ. އަދި ދަރަނިތައް އަދާކުރުމަށް މިހާރު ލަންކާ ނުކުޅެދިފައިވާ ކަމަށް އޭނާ ވިދާޅުވިއެވެ.
މީގެ އިތުރުން ދަރަނި ނުދައްކާ ގޮތަށް ނިންމާފައިވާ ނިންމުން ދެމިގެން ދާނީ އައިއެމްއެފް އާއެކު ކުރެވޭ މަޝްވަރާތަކާއެކު އެއިދާރާގެ އެހީއާއެކު ދަރަނިތައް ދެއްކޭނެ އައު ގޮތެއް ދަރަނި ދައްކަންޖެހޭ ގައުމުތަކާއެކު ކަނޑައެޅެންދެން ކަމަށް ވީރަސިންގް ވިދާޅުވިއެވެ.
ފާއިތުވި ދެ އަހަރުގެ ތެރޭގައި ލަންކާގެ ފޮރިން ރިޒަރވް ވަނީ ވަރަށް ބޮޑަށް ދަށަށްގޮސްފައެވެ. ސަރުކާރުން ނަގަމުންދިޔަ ޓެކްސްތައް މަދުކުރުމާ ކޮވިޑް-19ގެ ސަބަބުން ފަތުރުވެރިކަމަށް އައި ލޮޅުމާއެކު ސަރުކާރުގެ އާމްދަނީ ދަށްވެ، ދަރަންޏަށް ސަރުކާރުން ކުރަމުންދިޔަ ހޭދަތަށް ފެންނަން ފެށިއެވެ.
މިހާރު އެގައުމުގެ ފޮރިން ރިޒަރވް ދެ ބިލިއަނަށްވުރެ ދަށަށް ގޮސްފައިވާއިރު، ގައުމަށް ކުރިމަތިވި އިގުތިސާދީ ކާރިސާއާއެކު ތެޔޮ، ގޭސް، ބޭސް އަދި ކާނާ ނުލިބި އާންމު ރައްޔިތުންނަށް ގޮންޖެހުންތަކާ ކުރިމަތިލާން ޖެހިފައިވާތާ މިހާރު މަސް ދުވަހަށްވުރެ ގިނަ ދުވަސް މިވަނީ ވެފައެވެ.
މިއަހަރަށް ލަންކާއިން ދައްކަންޖެހޭ ބޭރުގެ ދަރަނި ހަތަރު ބިލިއަން ޑޮލަރަށް އަރާކަމަށް ރިޕޯޓްތައް ބުނެއެވެ. މީގެ ތެރޭގައި ޖުލައި މަހަށް ހަމަވާ އެއް ބިލިއަން ޑޮލަރުގެ ލޯނެއްވެސް ހިމެނެއެވެ.
ޗީފް އެގްޒެކެޓިވް އޮފް ބްރޮކެރޭޖް ޖޭބީ ސެކިއުރިޓީސް، މުރްތަޒާ ޖެފަރްޖީ ވަނީ ސެންޓަރަލް ބޭންކްގެ މިނިންމުމަކީ ރަނގަޅު ނިންމުމެއް ކަމަށް ވިދާޅުވެފައެވެ. އެގޮތުން ލަންކާއިން ދިޔައީ ނެތް ފައިސާއިން ބޭރުގެ ދަރަނިތައް ދައްކަމުން ކަމަށާއި، ސެންޓްރަލް ބޭންކްގެ މި ނިންމުމާއެކު ގައުމުގެ އާންމުންނަށް ބޭނުންވާ ޒަރޫރީ ބޭނުންތަކަށް އިސްކަންދެވޭނެ ކަމަށް އޭނާ ވިދާޅުވިއެވެ.
މީގެ އިތުރުން ބްލޫވޭ އެސެޓް މެނޭޖްމެންޓްގެ ސީނިއަރ އިމަރޖިންގ މާކެޓްސް ސޮވެރިން ސްޓްރެޓީޖިސްޓް ޓިމޮތީ އޭޝް ވަނީ މިނިންމުމުން ހައިރާން ކުރަނިވި ހަމައެކަނި ކަމަކީ މިނިންމުން ނިންމަން ލަންކާ ސަރުކާރަށް މިހާ މުއްދަތު ނެގިކަން ކަމަށް ވިދާޅުވެފައެވެ. އަދި އައިއެމްއެފް އާއެކު މަޝްވަރާތައް ނިމެންދެން ލޯނުތައް ދެއްކުން މަޑުޖައްސާލުން އެއީ ރަނގަޅު ނިންމުމެއް ކަމަށް އޭނާ ވިދާޅުވިއެވެ.
