ހިޔާ ފްލެޓްތަކަށް ދައްކަންޖެހޭ ފައިސާ ނުދެއްކުމަށް ބާރުއަޅާ މައްސަލާގައި އެޗްޑީސީގެ އިންޒާރެއް

ހުޅުމާލެ ފޭސް 2ން ދޫކޮށްފައިވާ ފްލެޓްތަކަށް ދައްކަންޖެހޭ ފައިސާ ނުދެއްކުމަށް ބާރު އަޅައި ދައްކަމުންދާ ވާހަކަތަކަކީ, ގާނޫނީގޮތުން ހެދިފައިވާ އެއްބަސްވުމެއްގައި ބަޔާންކުރެވިފައިވާ ކަންކަމާ ޚިލާފުވުންކަމަށް ބުނެ, މިކަމަށް ހިތްވަރުދީ ބާރުއެޅުމަކީ ބޮޑު ކުށެއްކަމުގައި ފާހަގަކޮށް މިކަން ހަރުކަށި އިބާރާތުން ކުށްވެރިކުރާ ކަމަށާއި, މިމައްސަލަ ބަލައި މިކަމުން ލިބޭނެ ގެއްލުމުގެ ބަދަލު ހޯދުމަށް އެދި ކަމާބެހޭ މުއައްސަސާތަކަށް ހުށަހަޅާނެކަމަށް ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ)ން ބުނެފިއެވެ.

ހިޔާ ފްލެޓްތައް މީހުންނަށް ދޫކުރިތާ 7 މަސް ފަހުން ކުލި ނަގަން ފަށާފައިވާއިރު, ކުލި ނަގަން ފެށުން މައްސަލައެއްގެ ގޮތުގައި ފާހަގަކޮށް, ކުލި ނުދެއްކުމަށް ހިޔާ ޔޫނިއަނުން ވަނީ ގޮވާލާފައެވެ. ހިޔާ ފްލެޓަށް މަހު ކުލީގެ ގޮތުގައި ކަނޑައަޅާފައިވަނީ 8500 ރުފިޔާއެވެ. ނަމަވެސް ހިޔާ ޔޫނިއަނުން ބުނަމުން އަންނަނީ އެއީ ބޮޑު އަދަދެއް ކަމަށާއި, އެއަދަދު އެއަދަދު ނުދެއްކޭނެކަަމަށެވެ. ސަރުކާރާއި އެޗްޑީސީން ބުނަމުން އަންނަނީ ހިޔާ ފްލެޓްތައް އަޅާފައިވަނީ ބޮޑު ލޯނަކުން ކަމަށްވާއިރު ކުލި އެއަށްވުރެ ކުޑަކުރެވެން ނެތްކަމަށެވެ.

Advertisement

މައްސަލަ ހޫނުވެފައިވާއިރު އެޗްޑީސީން ނެރެފައިވާ ބަޔާނުގައި ބުނެފައިވަނީ, މެއިންޓަނަންސް ފީ ނެގޭނީ އެގްރީމެންޓްގެ 13 ވަނަ މާއްދާގެ (ހ)ގައި ބުނެފައިވާ ފަދައިން, ކޮންމެ 2 ޓަވަރެއްގެ މެދުގައި އުފައްދާ ކޯޕަރޭޓިވް ސޮސައިޓީގެ ބޯޑު މެދުވެރިކޮށްކަން ފާހަގަކޮށްފައިވާއިރު، މި އެގްރީމެންޓްގެ 13 ވަނަ މާއްދާގެ (ށ)ގައި ބަޔާންކުރެވިފައިވާ ފަދައިން, އެއްބަސްވުމުގައި މި މެނޭޖްމެންޓް ކޯޕަރޭޝަން އުފެދި އިމާރާތް ބެލެހެއްޓުމާއި މެނޭޖްކުރުމުގެ ޒިންމާ ގާނޫނަކުން ނުވަތަ ގަވައިދަކުން ނުވަތަ ކަމާބެހޭ އިދާރާއަކުން ކަނޑައަޅާ އުސޫލެއްގެ ދަށުން އެހެން ފަރާތަކަށް ނަގުލުވުމާ ހަމައަށް, އިމާރާތް އިންޝުއަރެންސް ކުރުމާއި މަރާމާތުކުރުމާއި ބެލެހެއްޓުމުގެ މަސްއޫލިއްޔަތު އުފުލުމަށް، ފްލެޓް ވިއްކާފަރާތާއި ފްލެޓް ގަންނަ ފަރާތް ވަނީ އެއްބަސްވެފައެވެ.

އަދި 31 ޖަނަވަރީ 2012 ވަނަ ދުވަހު އެޗްޑީސީން ކޮށްފައިވާ އިއުލާނުގައިވެސް ބަޔާންކޮށްފައިވާފަދައިން, 20 ޑިސެންބަރު 2021ގައި އެއްމެދު އިމާރާތުގެ ގާނޫނު ރައީސުލްޖުމްހޫރިއްޔާ ވަނީ ތަސްދީގު ކުރައްވައި، އެއްމެދު އިމާރާތްތައް ބެލެހެއްޓުމާބެހޭގޮތުން އަމަލުކުރަންޖެހޭ ގޮތްތަކެއް ކަޑައަޅާފައެވެ. އަދި ހިޔާ މަޝްރޫއުގެ ދަށުން ތަރައްގީކުރެވިފައިވާ 16 ޓަވަރު ބެލެހެއްޓުމާއި މެނޭޖްކުރުމަށް މެނޭޖްމަންޓް ކޯޕަރޭޝަން ހަމަޖެއްސުމަށްޓަކައި ކުރިޔަށް ގެންދަންވީ ގޮތެއް ކަމާބެހޭ މުއައްސަސާތަކާއެކު ދަނީ މަޝްވަރާ ކުރެވެމުންނެވެ. އެހެންކަމުން، މިހާލަތުގައި އިންސްޓޯލްމަންޓަށްވާ ފައިސާ އަދި މެއިންޓަނަންސް ފީ ނެގުމުގައި އެއްވެސް ހުރަހެއް ނެތްކަމަށް އެޗްޑީސީން ބުނެއެވެ.

ރާއްޖެޓީވީގެ ފަލަ ސުރުޚީ ޕްރޮގްރާމްގައި ވާހަކަދައްކަވަމުން އެޗްޑީސީގެ މެނޭޖިންގ ޑިރެކްޓަރ ސުހައިލް އަހުމަދު ވިދާޅުވީ، މިހާރު އެޗްޑީސީން ހަދަމުން އަންނަ ސަރވޭއިން ދައްކާގޮތުން, 4500ށްވުރެ ގިނަ އާއިލާ މިހާރު ހިޔާ ފްލެޓަށް ދިރިއުޅުން ބަދަލު ކޮށްފައިވާ ކަމަށެވެ. އެގޮތުން މިހާރު 20،000ށްވުރެ ގިނަ މީހުން އެތަނުގައި ދިރިއުޅޭނެކަމަށް ސުހައިލް ވިދާޅުވިއެވެ.

ހިޔާ ފްލެޓްތަކުގެ ލޯނު މައްސަަލާގައި އޮޑިޓަރ ޖެނެރަލްގެ އޮފީސް ރައްޔިތުންގެ މަޖިލީހުގެ މާލިއްޔަތު ކޮމިޓީއަށް ހޯމަ ދުވަހު ވަނީ ހާޒިރުކޮށްފައެވެ. މިބައްދަލުވުމުގައި އޮޑިޓް އޮފީހުން ބުނެފައިވަނީ, ހިޔާ މަޝްރޫއު ރަނގަޅަށް މެނޭޖްނުކޮށްފިނަމަ އެޗްޑީސީއަށް މާލީ ބޮޑެތި ގެއްލުންތަކެއް ކުރިމަތިވާނެކަަމަށެވެ.

އެޗްޑީސީން މިހާތަނަށް ލޯނުގެ ގޮތުގައި ނެގި 700 މިލިއަން ޑޮލަރު (10.7 ބިލިއަން ރުފިޔާ)ގެ ތެރެއިން 400 މިލިއަނެއްހާ ޑޮލަރު (ހަ ބިލިއަން ރުފިޔާ)އަކީ ހިޔާ މަޝްރޫއަށް ނަގާފައިވާ ލޯނު ކަމަށާއި, މި މަޝްރޫއުގެ ލޯނު ރަނގަޅަށް މެނޭޖް ނުކުރެވިއްޖެނަމަ ކުންފުންޏަށް މާލީ ބޮޑެތި ގޮންޖެހުންތަކާ ކުރިމަތިވާނެކަމަށް އޮޑިޓް އޮފީހުން ވަނީ ކޮމިޓީގައި ފާހަގަކޮށްފައެވެ.