ރަމަޟާން މަހަކީ އަހަރެއްގައި އަންނާނެ އެންމެ މަތިވެރި މައްސަރެވެ. މިއީ އަޅުކަމުގެ މައްސަރެކެވެ. އަހަރެއްގެ ތެރޭގައި އަންނާނެ އެންމެ މަތިވެރި ރޭ، ލައިލަތުލްގަދުރި ވިލޭރޭވެސް ހިމެނެނީ ރަމަޟާން މަހުގައެވެ. މިއީ މީހުންގެ ދިރިއުޅުން ބަދަލުކޮށްލާ މަހެކެވެ. ދުނިޔަވީ ކަންކަމުން ދުރުކޮށް، ހެޔޮ ކަންކަމާ ދިމާލަށް ގެންގޮސްދޭ މަހެކެވެ.
މިއީ އެހާމެ މާތްވެގެންވާ މައްސަރަކަށް ވާއިރު، މި މައްސަރުގެ ފައިދާ އެންމެ ހެޔޮގޮތުގައި ހިފަން މަސައްކަތްކުރަންޖެހެއެވެ. ރަމަޟާން މަހުގެ ރޯދަތައް ހިފައި ގިނަގިނައިން ހެޔޮ އަމަލުތައް ކުރުން މަތީގައި ދެމިހުންނަންޖެހެއެވެ. ތިމާއަށް ކުރެވޭ ކުޑަ ކުޑަ ކަމަކުންވެސް މި މައްސަރުގެ ސަވާބާއި ދަރުމަ ލިބުމަށް މަގުފަހިވެއެވެ. އެހެންކަމުން އެންމެ ހެޔޮ ގޮތުގައި މި ދުވަސްތައް ހޭދަކުރަން މަސައްކަތްކުރަންޖެހެއެވެ.
ރަމަޟާން މަހުގެ ސަވާބާއި ދަރުމަ ހޯދުމަށް ކުރެވޭނެ ކަންކަން މަޝްހޫރު ދީނީ އިލްމުވެރިޔާ މުފްތީ މެންކު ވަނީ ވަރަށް ތަފްސީލުކޮށް ކިޔައިދީފައެވެ. މިގޮތުން ކޮންމެ ދުވަހަކުވެސް ޤުރުއާން ކިޔެވުމަށް ވަގުތުކޮޅެއް ހުސްކޮށްލުމަށް އޭނާ ނަސޭހަތްތެރިވެފައިވެއެވެ. އެހެންނަމަވެސް މިއީ ހަމައެކަނި ރަމަޟާން މަހު ކުރަންޖެހޭ ކަމެއް ނޫން ކަމަށާއި، އެހެން މަސް މަހުގައިވެސް ޤުރުއާން ކިޔެވުން އިތުރުކުރުމަށް އޭނާ ވަނީ ނަސޭހަތްތެރިވެފައެވެ.
ކީރިތި ޤުރުއާން ކިޔެވުމުގެ އިތުރުން ފަގީރަކަށް އެހީވުމަކީވެސް ސަވާބާއި ދަރުމަ އިތުރުކޮށްދޭ ކަމެކެވެ. އެއީ އެކަމަކުން އާޚިރަތުގައި ތިމާއަށް ކާމިޔާބު ލިބުމަށް މަގުފަހިކޮށްދޭ ކަމެއް ކަމަށް މުފްތީ ބުނެފައިވެއެވެ. ރޯދައަށްހުރެ ގިނަ ގިނައިން ދުއާ ކުރުމަށާއި، ތަރާވީހު ނަމާދު ކުރުމަށް ނަސޭހަތްތެރިވެފައިވެއެވެ. ވަކިން ޚާއްސަކޮށް ރޯދައަށް ހުރެ ނަމާދުތައް ގަޑިން ގަޑިއަށް އަދާކުރުމަށް މުފްތީ ނަސޭހަތްތެރިވެފައިވާއިރު، ތިމާ ހިފާ ރޯދައަކީ މާތް ﷲގެ ހަޟުރަތުގައި ބަލައިގަންނަ އަޅުކަމަކަށް ވާން ބޭނުންނަމަ ގަޑިން ގަޑިއަށް ނަމާދު އަދާކުރުން މުހިންކަމަށް ބުނެފައިވެއެވެ.
މީގެ އިތުރުން ރަމަޟާން މަހުގެ ސަވާބާއި ދަރުމަ ހޯދުމަށް ތިމާގެ އާއިލާއާއިމެދު އޮންނަ ގުޅުން ވަރުގަދަކުރަންޖެހެއެވެ. އަދި އާއިލާއާއެކު ވަގުތު ހޭދަކުރުން އިތުރުކުރަންޖެހެއެވެ. ކަންކަމަށް ބޭނުންޖެހިފައިވާ މީހުންނަށް އެހީތެރިވުމާއި، ރަނގަޅު މީހަކަށް ވާން މަސައްކަތްކުރަންޖެހެއެވެ. މިފަދަ ކުދިކުދި ކަންތައްތަކަކީ މި މައްސަރުގެ ބޭނުން އެންމެ ހެޔޮ ގޮތުގައި ހިފުމަށް ކުރެވިދާނެ ކަންކަމެވެ.
ވީމާ އަޅުގަޑުމެން އެންމެންވެސް ގަދައަޅައިމަސައްކަތް ކުރަންވީ މިފަދަ ނަސޭހަތުގައި ހިފައި މިލިބިފައިފާ ރަނުގެ ފުރުސަތުގެ ބޭނުން އެންމެ ހެޔޮގޮތުގައި ހިފުމަށެވެ.
