ސައިކަލު ދުއްވާފައި ދިޔަ އަންހެނެއްގެ ކަރުގައި އޮތް ފަށެއް ފޭރިގަންނަން އުޅުނު މައްސަލާގައި ހައްޔަރުކުރި މީހާގެ ވަނަވަރު އާއްމުކޮށްފި

މާލޭގެ މަގެއްގައި ސައިކަލު ދުއްވާފައި ދިޔަ އަންހެނެއްގެ ކަރުގައި އޮތް ފަށެއް ފޭރިގަންނަން އުޅުނު މައްސަލާގައި ހައްޔަރުކުރި މީހާގެ ވަނަވަރު އާއްމުކޮށްފިއެވެ.

ބުރާސްފަތި ދުވަހު އަލިކިލެގެފާނު މަގުގައި ހިނގި މިހާދިސާގެ ވީޑިއޯ ސޯޝަލް މީީޑިއާގައި ވަނީ އާއްމުވެފައެވެ. އެވީޑިއޯއިން ފެންނަ ގޮތުގައި ހެލްމެޓެއް އަޅައިގެން ހުރި ޒުވާން ފިރިހެނަކު ޒުވާން އަންހެނެއްގެ ސައިކަލު ފަހަތުން ދުއްވާފައި އައިސް އަރާ ހަމަކުރުމަށްފަހު، ކަރުގައި އޮތް ރަން ފަށް ޖަހައިގަތުމަށް މަސައްކަތް ކުރެއެވެ. އެމަސައްކަތް ކާމިޔާބު ނުވުމުން ސައިކަލު ބަހައްޓާފައި ވެސް އައިސް ކަރުގައި އޮތް ފަށާއި، އަތްދަބަސް ޖަހައިގަތުމަށް މަސައްކަތް ކުރާ މަންޒަރު ފެނެއެވެ. އެ އަންހެން މީހާ ސައިކަލު ދޫކޮށްލުމަށްފަހު، ދުވެފައި ގޮސް މަގުގެ ދުވާރު މައްޗަށް އަރާ މަންޒަރު ފެނެއެވެ. އޭގެފަހުން ފިރިހެން މީހާ ސައިކަލަށް އަރައިގެންދާއިރު، ފަހަތުން އަންނަ އެހެން ބަޔަކު އައިސް އަންހެން މީހާގެ ސައިކަލު ނަގައިދީ، އެހީތެރިކަން ފޯރުކޮށްދެއެވެ.

ފޭރެން މަސައްކަތް ކުރި މީހާ ހެލްމެޓް އަޅައިގެން ހުރުމުގެ ސަބަބުން އޭނާގެ މޫނު ވީޑިއޯއަށް އަރާފައިނުވެއެވެ.

ހުކުރު ދުވަހު ފުލުހުން ބުނީ މިމައްސަލައާ ގުޅިގެން ހައްޔަރުކޮށްފައިވަނީ މާލެ، ވ.ފިޔަބަރި، 30 އަހަރުގެ ހަސަން އިސާމު ކަމަށެވެ. އަދި އޭނާ ހައްޔަރުކުރީ ބުރާސްފަތި ދުވަހުގެ ހަވީރު 5:20 ހާއިރު ކަމަށެވެ. އަދި ފުލުހުންގެ ތަރުޖަމާނު އަހުމަދު ޝިފާން ވިދާޅުވީ އިސާމު ދުއްވި ސައިކަލުވެސް ފުލުހުންގެ ބެލުމުގެ ދަށަށް ގެންގޮސްފައިވާ ކަމަށެވެ.

މިމައްސަލަ ފުލުހުން ގެންދަނީ އިތުރަށް ތަހުގީގު ކުރަމުންނެވެ.

ދޭތެރެދޭތެރެއިން މާލެސިޓީގެ މަގުތަކުން ފޭރުމުގެ މައްސަލަތައް ފެންމަތިވެއެވެ. އެގޮތުން މޯބައިލް ފޯނާއި، އަތްދަބަސް ޖަހައިގަތުމާއި، ކަރުގައި އޮންނަ ފަށް ޖަހާ ގަތުމުގެ ހާދިސާތައް ހިނގާފައިވެއެވެ. އަދި މީހުންނަށް ބިރު ދައްކައިގެން ފޭރުގެ މައްސަލަތައް ހިންގާއިރު، މާލޭގެ ގެސްޓްހައުސްތަކަށް ވަދެ، ދުވަހު ކުއްޔަށް ކޮޓަރީގައި ތިބޭ މީހުންނަށް ވެސް ބިރުދައްކައިގެން މުދާ ފޭރިގަނެފައިވެއެވެ.