ފޭރުމުގެ މައްސަލައެއްގައި ހައްޔަރު ކުރި މީހަކު 15 ދުވަހަށް ބަންދު
ކްރިމިނަލް ކޯޓުގައި މި އަމުރު ނެރުއްވީ ގާޒީ އިބްރާހިމް އިޙްސާން
ކްރިމިނަލް ކޯޓް
ފޭރުމުގެ މައްސަލައެއްގައި ހައްޔަރު ކުރި މީހަކު 15 ދުވަހަށް ބަންދު ކުރުމަށް ކްރިމިނަލް ކޯޓުން އަމުރުކޮށްފިއެވެ.
މި މައްސަލައިގައި ހައްޔަރު ކޮށްފައިވަނީ 43 އަހަރުގެ ދިވެހި ފިރިހެނެކެވެ. އޭނާގެ މައްޗަށް ތުހުމަތު ކޮށްފައިވަނީ ފޭރުމުގެ ކުށުގެ މައްސަލައެއްގައެވެ.
އޭނާ 15 ދުވަހަށް ބަންދު ކުރުމަށް ކްރިމިނަލް ކޯޓުން ވަނީ އަމުރުކޮށްފައެވެ. އޭނާގެ ބަންދުގެ މުއްދަތު ހަމަވާނީ 10 ޖުލައި 2023 ގައެވެ.
އޭނާގެ މައްޗަށް ތުހުމަތު ކުރެވޭ ކުށް ކުރިކަމަށް ކޮންމެވެސް މިންވަރެއްގެ ހެކި ހުށައެޅިފައިވާކަމަށް ކޯޓު އަމުރުގައި ބުނެފައިވެއެވެ.
މި މައްސަލައިގައި ހުށައެޅިފައިވާ ޙާދިސާ ރިޕޯޓަށް ބަލާއިރު، އޭނާ ހައްޔަރު ކޮށްފައިވަނީ ބިދޭސީއެއްގެ ކަރުގައި އޮތް ރަން ފަށެއް ފޭރިގަތް މީހަކު ހިފަހައްޓައިގެން އުޅޭކަމަށް ފުލުހުންނަށް ލިބުނު ރިޕޯޓަކާއި ގުޅިގެން އެތަނަށް ފުލުހުން ގޮހެވެ.
އެހެންނަމަވެސް އެ ތުހުމަތަށް އޭނާ އިންކާރު ކުރެއެވެ. އެގޮތުން އޭނާ ބުނެފައިވަނީ ފަށް ފޭރިގަންނަން އުޅުނީ އޭނާ ނޫން ކަމަށާއި، އެކަން ކުރީ އެތަނުން އެވަގުތު ސައިކަލުގައި ދިޔަ ދެ މީހުން ކަމަށެވެ.
އޭނާ ބުނާ ގޮތުގައި އޭނާއަކީ އެކަން ހުއްޓުވައި، ފަށް އޭގެ ވެރިފަރާތާއި ޙަވާލު ކުރި މީހާއެވެ.
އެ ފަށް ފޭރުނީ އޭނާކަަމަށް އެވަގުތު އެ ސަރަޙައްދުގައި ތިިބި މީހުންވެސް ވަނީ ފުލުހުންގެ ގާތުގައި ބުނެފައެވެ.
އޭނާ ބަންދު ކުރުމަށް ކްރިމިނަލް ކޯޓުން އަމުރުކޮށްފައިވަނީ މުޖުތަމައުގެ ސަލާމަތާއި ރައްކާތެރިކަމަށް ބަލާފައެވެ.
އަދި އޭނާއަކީ ކުށުގެ ރެކޯޑު އޮންނަ މީހެއްކަމަށްވެސް ކޯޓު އަމުރުގައި ބުނެފައިވެއެވެ.
ކްރިމިނަލް ކޯޓުގައި މި އަމުރު ނެރުއްވީ ގާޒީ އިބްރާހިމް އިޙްސާންއެވެ.
