ރައީސް ގޮތަބަޔާގެ އިސްތިއުފާއަށް ގޮވާލައި، އެތައް ހާސް ބަޔަކު ކޮލޮމްބޯގެ މަގުމައްޗަށް

ރައީސް ގޮތަބަޔާ ރާޖަޕަކްސަގެ އިސްތިއުފާއަށް ގޮވާލައި އެތައް ހާސް ބަޔަކު ކޮލޮމްބޯގެ މަގުމައްޗަށް ނުކުމެއްޖެއެވެ.

ލަންކާގެ އިގުތިސާދީ ހާލަތު ގޯސްވެ ބޭރު ފައިސާ ރިޒަރވް އެއްކޮށްހެން ހުސްވުމާ ގުޅިގެން, އެގައުމަށް ވަނީ ތެލާއި ބޭސް އަދި ކާނާ ފަދަ ޒަރޫރީ ސާމާނު ހޯދުމަށް ދަތިވެފައެވެ. ގައުމުގެ ގިނަ ހިސާބުތަކަށް ކަރަންޓު ކެނޑުން ފަދަ މައްސަލަތަކާ ކުރިމަތިލާން ޖެހިފައިވާއިރު، ބޭސް ނުލިބި ގިނަ އަދަދެއްގެ ހޮސްޕިޓަލް، ކްލިނިކް އަދި ބޭސްފިހާރަތައް ވަނީ ބަންދުކުރަން ޖެހިފައެވެ.

މިފަދަ ގިނަ މަައްސަލަތަކާއެކު އެގައުމުގެ އިގުތިސާދީ، ސިޔާސީ އަދި އިޖުތިމާއީ ހާލަތު ވަނީ ވަރަށް ބޮޑަށް ދަށަށް ގޮސްފައެވެ. މިއާއެކު އާންމުންގެ ނުރުހުން ސަރުކާރަށް އަމާޒުވެ، ރައީސް ގޮތަބަޔާ ރާޖަޕަކްސައަށް ރައްޔިތުން ދަނީ ފާޑުކިޔަމުންނެވެ.

ކޮލޮމްބޯގައި މުޒާހަރާކުރި ގިނަ އަދަދެއްގެ ބަޔަކު ވަނީ ރައީސް ގޮތަބަޔާ ގެއަށް ވަޑައިގަތުމަށް ގޮވާލާފައެވެ. ގައުމު މިހާރު މިއޮތް ހާލަތުގެ ޒިންމާ ނަންގަވަން ރައީސަށް ޖެހިވަޑައިގަންނަވާނެކަމަށް ރައްޔިތުން ބުނަމުންދާއިރު، ރައްޔިތުން ވަނީ ރާޖަޕަކްސަ އާއިލާއަށްވެސް ނުރުހުން ފާޅުކޮށްފައެވެ.

އާންމުންގެ ނުރުހުން އަމާޒުވެގެން ދިޔަނަމަވެސް ރައީސް ވަނީ އިސްތިއުފާ ނުދެއްވާނެކަމަށް ވިދާޅުވެފައެވެ. ރައީސް ގޮތަބަޔާއަށް މިހާރު ވަނީ މަޖިލީހުގެ މެޖޯރިޓީވެސް ގެއްލިފައެވެ.

ލަންކާގެ އިގުތިސާދީ ހާލަތު ރަނގަޅުކުރުމަށް ކުރިއަށްއޮތް 6 މަސްދުވަހުގެ ތެރޭގައި 3 ބިލިއަން ޑޮލަރުގެ ބޭރު އެހީ ބޭނުންވާނެ ކަަމަށް ފިނޭންސް މިނިސްޓަރު އަލީ ސަބްރީ ވަނީ ވިދާޅުވެފައެވެ. މީގެ ތެރޭގައި ތެލާއި، ބޭސް ފަދަ ޒަރޫރީ ސާމާނު ހޯދުމަށް ބޭނުންވާ ފައިސާ ހިމެނޭކަމަށް އޭނާ ވިދާޅުވިއެވެ.

މިނިސްޓަރު ވަނީ ފައިސާގެ އެހީއާއެކު މިހާރު ހުރި ސޮވްރިން ބޮންޑްތައް ރީސްޓްރަކްޗަރ ކުރުމުގެ މަސައްކަތް ކުރައްވާނެ ކަމަށާއި, މިއަހަރުގެ ޖުލައިއަށް ހަމަވާ 1 ބިލިއަން ޑޮލަރުގެ ދެއްކުން ފަސްކުރުމުގެ މަޝްވަރާތައް ކުރައްވާނެ ކަމަށްވެސް ވިދާޅުވެފައެވެ. މަސައްކަތްކުރައްވާނީ ހާރޑް ޑިފޯލްޓަކަށް ދިއުމަށް ކަމަށާއި މިއީ ފަސޭހަކަމަކަށް ނުވާނެކަމަށް އޭނާ ވިދާޅުވިއެވެ.

މީގެ އިތުރުން އެންމެ އިސްކަމެއް ދެއްވައިގެން މިހާރު ކުރައްވާނެ ކަމަކީ ސަޕްލައި ޗެއިން ރަނގަޅުކޮށް, ތޭލާއި ގޭސް އަދި ބޭސް ލިބޭނެ މަގު ފަހިކޮށް ރައްޔިތުންނަށް ދިމާވެފައިވާ ގޮންޖެހުންތައް ކުޑަކުރަން ކަމަށް ވިދާޅުވިއެވެ.

މީގެ ކުރިން އަލީ ސަބްރީ ވަނީ މިޖުލައި މަހު ހަމަވާ 1 ބިލިއަން ޑޮލަރުގެ ދަރަނި ރީސްޓްރަކްޗަރ ކުރަންޖެހޭކަމަށް ވިދާޅުވެފައެވެ. އަދި މިދަރަނި އަދާކުރުމަށް އެހީ ލިބޭތޯ އިންޓަނޭޝަނަލް މަނިޓަރީ ފަންޑް (އައިއެމްއެފް)އަށް ވެސް ދާންޖެހޭކަމަށް ވިދާޅުވެފައެވެ. އަދި ވޯރލްޑް ބޭންކާއި އޭޑީބީގެ އެހީވެސް ބޭނުންވާކަމަށް ވިދާޅުވިއެވެ. މިއެހީތައް ބޭނުންނަމަ ގައުމުގައި ސިޔާސީ ހަމަޖެހުން ބޭނުންވާކަމަށާއި މި ހަމަޖެހުން ނެތްނަމަ މަޝްވަރާތައްކުރަން ދާނީ ކޮންބައެއްތޯ އޭނާ ވަނީ ސުވާލުއުފައްދަވާފައެވެ.

ލަންކާގެ ހާލަތާމެދު އައިއެމްއެފްއިން ކަންބޮޑުވުން ފާޅުކޮށްފައިވާއިރު، އެއިދާރާއިން ވަނީ ލަންކާއާއެކު މަޝްވަރާކުރުމަށް ކުރަންޖެހޭ ޓެކްނިކަލް-ލެވެލްގެ މަސައްކަތްތައް ކުރަންފަށާފައި ކަމަށް ހޮނިހިރު ދުވަހު ވަނީ ބުނެފައެވެ. އަދި ކުރިއަށް އޮތް ދުވަސްތަކުގެ ތެރޭގައި ލަންކާއާއެކު މަޝްވަރާކުރަން ފަށާނެކަމަށް ވަނީ ބުނެފައެވެ.

ޖޭޕީ މޯގަން އެނަލިސްޓުން ވަނީ މިއަހަރު ލަންކާގެ ގްރޮސް ޑެޓް ސަރވިސިންގ 7 ބިލިއަން ޑޮލަރަށް އަރާނެކަމަށް އަންދާޒާކޮށްފައެވެ. މިހާރު ލަންކާގެ ކަރަންޓް އެކައުންޓް ޑެފިސިޓް ހުރީ 3 ބިލިއަން ޑޮލަރުގައެވެ. އަދި މާޗް މަސް ނިމުނު އިރު ލަންކާގެ ފޮރިން ރިޒަރވް ހުރީ 1.9 ބިލިއަން ޑޮލަރުގައެވެ.