ތިމަރަފުށީ ހަރުކަށި ފިކުރު: ހެކިތަކާގުޅޭގޮތުން ހައިކޯޓުގެ ނިންމުން ދައުލަތާ އެއްކޮޅަށް
10 އެޕްރީލު 2022 | އާދީއްތަ 14:50ސިއްރު ހެކީގެގޮތުގައި ހުށައެޅި 23 ހެކިންގެ ތަހުގީގީ ބަޔާން ސިއްރުކުރަން ހައިކޯޓުން ތާއީދު
ތިމަރަފުށީ ހަރުކަށި ފިކުރުގެ މައްސަލަ- ހެކި ރައްކާތެރިކުރުމުގެ އަމުރު ދައުލަތުން ހައިކޯޓުގައި އިސްތިއުނާފުކުރުމަށް ބޭއްވި އަޑުއެހުން
ތ. ތިމަރަފުށީގައި ހަރުކަށި ފިކުރު ފަތުރައި، ހަމަލާދޭން އުޅުނުކަމުގެ ތުހުމަތުކުރެވޭ މީހުންގެ މައްޗަށް ފުލުހުން ތައްޔާރުކޮށްފައިވާ އިންޓެލިޖެންސް ރިޕޯޓު ސިއްރުކޮށްނުދިން މައްސަލަ ހައިކޯޓުގައި އިސްތިއުނާފްކޮށްފައިވާއިރު، އެ މައްސަލާގައި ގޮތެއް ނިންމުމުގެ އަޑުއެހުން ހައިކޯޓުގައި ކުރިއަށްގެންގޮސްފިއެވެ.
އާދީއްތަ ދުވަހު ކުރިއަށް ދިޔަ މި އަޑުއެހުމުގައި ހައިކޯޓުން ވަނީ ދައުލަތުން ހުށައަޅާފައިވާ މައްސަލައާ ގުޅޭގޮތުން ކޯޓުން ނިންމި ނިންމުން އިއްވާފައެވެ.
ސިއްރު ހެކީގެ ގޮތުގައި ހުށައެޅި 23 ހެކިންގެ ތަހުގީގީ ބަޔާން:
މި މައްސަލަ ދަށު ކޯޓުން ނިންމެވި ގާޒީ ވަނީ ހެކިންގެ ވަނަވަރާއި، ހެކިވެރިންނަކީ ކޮން ބައެއްކަން އެނގޭނެފަދަ މައުލޫމާތު އުނި ކުރުމަށްފަހު، އެ ބަޔާންތައް ދިފާއަށް ހިއްސާކުރުމަށް ނިންމަވާފައެވެ.
އެހެންނަމަވެސް، މި ބަޔާންތަކުގައި ހިމެނޭ ހެކިވެރިންގެ ވަނަވަރު އުނިކުރުމަކީ ހެކިންގެ ސިއްރުކަން ދެމެހެއްޓިގެންދާނެ ގޮތެއް ނޫންކަމަށް ދައުލަތުގެ ފަރާތުން އިސްތިއުނާފު ހުށައަޅުއްވަމުން ޕަބްލިކް ޕްރޮސެކިއުޓަރ އަހުމަދު ޝަފީއު ވަނީ ވިދާޅުވެފައެވެ. އެގޮތުން އެ ބަޔާންތަކުގެ މައުލޫމާތުތަކަކީ އޭގެ ޒާތުގައި ހެކިވެރިންގެ މައުލޫމާތުތައް އެނގޭނެފަދަ މައުލޫމާތުތަކެއް ކަމަށާއި، އެފަދަ މައުލޫމާތުތައް ބަޔާނުން ސިއްރުކުރާނަމަ، މުޅި ބަޔާނުގެ ބޮޑު ބައެއް ސިއްރުކުރަން ޖެހިދާނެކަން އޭނާ ފާހަގަކުރެއްވިއެވެ.
ހައިކޯޓުންވެސް މި ހެތްކާގުޅޭގޮތުން ނިންމާފައިވަނީ ދައުލަތުން އެދިފައިވާ ގޮތަށް އެ ހެކި ރައްކާތެރިކުރަންޖެހޭ ކަމަށެވެ. އެގޮތުން ބަޔާނުން އެ ފަރާތްތަކުގެ ނަމާއި ވަނަވަރު އުނިކުރި ކަމުގައިވިޔަސް، އެއީ ކޮން ހެކިންނެއްކަން ދެނެގަތުމުގެ އިހްތިމާލު އޮތްކަން ހުކުމުގައި ފާހަގަކޮށްފައިވެއެވެ.
ހައިކޯޓުންވެސް ވަނީ (ޝަފީއު ވިދާޅުވެފައިވާ ފަދައިން) ސިއްރުހެކިވެރިންގެ ތަހުގީގު ބަޔާންތައް ހާމަނުކުރިކަމުގައިވިއަސް, ހެކި ހުށަހެޅުމާއި ހެތްކާ ސުވާލުކުރުމުގެ ހައްގު ގެއްލިގެންދާނެކަމަށް ނުފެންނަކަމަށް ނިންމަވާފައެވެ.
އައިސިސްގެ ފަރާތުން ރާއްޖޭގައި އަމީރަކު ކަނޑައެޅިކަމަށް ބުނެ ފޮނުވާފައިވާ ސިޓީއަކާއި ރަސްމީ ލިޔުމެއް:
މި ހެކީގެ ބައެއް މައުލޫމާތުތައް އުނި ކުރުމަށްފަހުވެސް ދިފާއަށް ލިޔެކިޔުންތައް ހަވާލު ކުރުމަށް ދައުލަތުން ދެކޮޅުހަދައެވެ. ދައުލަތުން އެދުނީ އެ ލިޔުންތަކުގެ ތަރުޖަމާ ތައްޔާރުކުރި ފަރާތުގެ ނަން އުނިކުރުމަށްފަހު، ޝަރީއަތުން ކަނޑައަޅާ ޝަރުތުތަކާއެކު ކޯޓަށް ގޮސް ބެލޭނެގޮތަށް ހެކި ރައްކާތެރި ކޮށްދެއްވުމަށެވެ.
ނަމަވެސް އެ ހެކިވެސް, ތަރުޖަމާ ކުރި ފަރާތުގެ ނަން އުނި ކުރުމަށްފަހު ހާމަކުރެއްވުމަށް ކްރިމިނަލް ކޯޓުގައި މައްސަލަ ބައްލަވާ ގާޒީ ވަނީ ނިންމަވާފައެވެ.
މި ހެތްކާ ގުޅޭގޮތުން ހައިކޯޓުން ނިންމާފައިވާ ނިންމުމަށް ބަލާއިރު، ހައިކޯޓުގައި މި މައްސަލަ ބެއްލެވި ފަނޑިޔާރުންނަށްވެސް ބުރަވެވަޑައިގެންނެވިފައިވަނީ ދައުލަތުން އެދިފައިވާ ގޮތަށް މި ހެކިވެސް ރައްކާތެރިކޮށްދޭން ޖެހޭކަމަށެވެ. ސަބަބެއްކަމަށް ފާހަގަ ކުރެއްވީ އެއީ ހަނގުރާމައާއި ޓެރަރިޒަމުގެ އަމަލުތަކަށް ހިތްވަރު ލިބިދެވޭފަދަ، މުޖުތަމައުގައި ފެތުރިގެންދިއުން ގާނޫނީގޮތުން ހުއްދަނުކުރެވޭނެ ތަކެތި ކަމަށް ފެނިވަޑައިގަންނަވާތީއެވެ. ދައުލަތުންވެސް އިސްތިއުނާފު ހުށައެޅިއިރު އެ ނުކުތާ ފާހަގަކޮށްފައިވެއެވެ.
ތަހުގީގުކުރި ފަރާތުގެ ބަޔާން:
މައްސަލައިގެ ތަހުގީގު ބަޔާންވެސް އެއްކޮށް ސިއްރު ކޮށްދިނުމަށް ދައުލަތުން ދަށު ކޯޓުގައި އެދިފައިވާއިރު، ހެކި ރައްކާތެރިކުރުމަށް ދައުލަތުން އެދިފައިވާ ގޮތަކީ، ބަޔާންތައް ސިއްރުކޮށް، އެއީ ކޮން ހެކިންތަކެއްކަން ނޭނގޭގޮތަށް ހެކިބަސް ނެގުމެވެ.
މި ބަޔާންތަކުގައި މިފަދަ މައްސަލަތަކުގައި ފުލުހުން ބޭނުންކުރާ އުކުޅުތަކާއި، ތަހުގީގުގެ ތަރުތީބު ބަޔާންކުރާގޮތުގެ މައުލޫމާތުތައް ހިމެނޭކަމަށް ދައުލަތުން ބުނި ނަމަވެސް, ދަށު ކޯޓުން މައްސަލަ ބެއްލެވި ގާޒީ ވަނީ ދައުލަތުން ބުނެފައިވާގޮތަށް ސިއްރުކުރަން ޖެހޭފަދަ އުކުޅެއް ފުލުހުން ބޭނުންކޮށްފައިވާކަން މި ތަހުގީގު ބަޔާނުން އެނގެން ނެތްކަމަށް ވިދާޅުވެ، އެ ހެކިވެސް ހާމަކުރެއްވުމަށް ނިންމަވާފައެވެ.
ހައިކޯޓުންވެސް ކްރިމިނަލް ކޯޓުގެ އެ ނިންމުމަށް ތާއީދުކުރެއެވެ. އެގޮތުން ފުލުހުންގެ ތަހުގީގުގައި ބޭނުންކުރެވޭނެ ޚާއްސަ އުކުޅުތަކަކީ ކޮބައިކަމާއި, އެ އުކުޅުތައް ބޭނުންކުރެވޭނެ އުސޫލު ދިވެހި ފުލުހުންގެ ޚިދުމަތުގެ ގާނޫނުގެ 18 ވަނަ ބާބުގައި ބަޔާން ކޮށްފައިވާކަމަށާއި، ސިއްރުކުރަންޖެހޭފަދަ އުކުޅެއް ފުލުހުން ބޭނުން ކޮށްފައިވާކަން ތަހުގީގުކުރި ފަރާތުގެ ބަޔާނުން އެނގެން ނެތްކަން ސަބަބެއްގެ ގޮތުގައި ހައިކޯޓުން ވަނީ ފާހަގަކޮށްފައެވެ.
އިންޓެލިޖެންސް ރިޕޯޓުތައް:
މި ރިޕޯޓުތައް (ޝަރުތުތަކަކާއެކު) ޝަރީއަތް މެދުވެރިކޮށް ބެލޭނެ ގޮތް ހެދުމަށް ދައުލަތުން އެދިފައިވާއިރު، ދަށު ކޯޓުން މައްސަލަ ނިންމެވި ގާޒީ ވަނީ, އިންޓެލިޖެންސް ރިޕޯޓު ޝަރީއަތަށް އައިސް ބެލުމާއި ވަކީލުންގެ އަތަށް ދޫކުރުމާމެދު ވަކި ތަފާތު ނަތީޖާއެއް އޮތްކަމަށް ދެކިވަޑައިނުގަންނަވާކަމަށް ވިދާޅުވެ އެ ހެކިތައްވެސް ހާމަ ކުރެއްވުމަށް ނިންމަވާފައެވެ.
އެހެންނަމަވެސް، މި ހެތްކާ ގުޅޭގޮތުން ހައިކޯޓުންވެސް ނިންމާފައިވަނީ ދައުލަތާ އެއްކޮޅަށެވެ. އެއީ މި މައްސަލައިގެ ބާވަތާއި، މި ރިޕޯޓުތަކުގައި ހިމެނިފައިވާ މައުލޫމާތު އާންމުވެއްޖެނަމަ، ގައުމީ ސަލާމަތަށް ކުރިމަތިވެދާނެ ނުރައްކަލެއްގެ އިހްތިމާލު އޮތްމިންވަރުގެ މައްޗަށާއި، މިބާވަތުގެ ތަހުގީގުތަކަށް ހުރަސް އެޅިދާނެކަމުގެ އިހްތިމާލު އޮތްކަމަށް ފެންނާތީކަމަށް ހައިކޯޓުގައި މައްސަލަ ނިންމެވި ފަނޑިޔާރުން ދެކެވަޑައިގަނެއެވެ.
ދަޢުވާލިބޭ ފަރާތްތަކުގެ ފޯނުން ނަގާފައިވާ، ހަރުކަށި ފިކުރާއި ޓެރަރިޒަމަށް ހިތްވަރުދޭ ޑޮކިއުމެންޓްތައް ހިމެނޭ ސީޑީތައް:
މި ހެކިވެސް ދައުލަތުން އެދިފައިވާ ގޮތަށް (ކްރިމިނަލް ކޯޓުން ކަނޑައަޅާ ޝަރުތުތަކާއެކު) ހަމައެކަނި ކޯޓުގައި ބަލައި ދިރާސާކުރުމަށް ފުރުސަތުދެއްވުމަށް ހައިކޯޓުގައި މައްސަލަ ނިންމެވި ފަނޑިޔާރުން ނިންމެވިއެވެ. ސަބަބަކީ މިފަދަ ތަކެތި މުޖުތަމައުގެ ތެރެއަށް ފެތުރިގެން ހިނގައިދާނެކަމުގެ އިހްތިމާލު އޮންނަ ފަދައިން، ދައުވާލިބޭ ފަރާތްތަކަށްވެސް ދޫކުރެވިދާނެކަމަށް ނުފެންނާތީކަމަށް ހުކުމުގައި ބަޔާންކޮށްފައިވެއެވެ.
މައިގަނޑު ގޮތެއްގައި ހެކި ރައްކާތެރިކުރުމާ ގުޅޭގޮތުން ދައުލަތުގެ ފަރާތުން ޝަފީއު ހުށައެޅުއްވި އިސްތިއުނާފީ ނުކުތާތައް ނިމިގެން ގޮސްފައިވަނީ ދައުލަތާއި އެއްކޮޅަށެވެ.
