ޗެއަރޕާސަންގެ އިންތިޚާބު: ފައްޔާޒާއި އިންތި އެކަކު އަނެކަކަށް ދޫ ދިނުމެއްނެތި ކުރިއަށް

އެމްޑީޕީ އުފެދުނީންސުރެ އެ ޕާޓީގެ "ހިތް" ކަމަށް ދެކިގެން އައީ މިހާރުގެ މަޖިލީހުގެ ރައީސް މުހައްމަދު ނަޝީދެވެ. އެމްޑީޕީ އަބަދުވެސް ހިނގަމުން އައީ އެމަނިކުފާނުގެ ވިސްނުންފުޅާ އެއްގޮތަށެވެ. އެމަނިކުފާނު ދެއްކެވި މަގުންނެވެ. މީގެކުރިން، އެ ނޫން މަގެއް، ފިކުރެއް، އެ ޕާޓީގައި އުފަން ވިޔަވެސް ނުދެއެވެ. އެހެންނަމަވެސް އެމްޑީޕީގެ ތަގުދީރު ބަދަލުކޮށްލީ 2018 ވަނަ އަހަރު ގެނައި މަޖުބޫރީ ހާލަތެވެ. ރައީސް ނަޝީދަށް އިންތިޚާބުގައި ވާދަ ނުކުރެވި މިހާރުގެ ރައީސް އިބްރާހިމް މުހައްމަދު ސާލިހް އަށް ޕާޓީގެ ޓިކެޓް ދޭން މަޖުބޫރުވުމެވެ. ޕާޓީން މިގޮތަށް ނިންމުމުގައިވެސް ފޮރުވިފައިވާ ކަންތައްތަކެއްވާކަން ހާމަވާން ފެށީ، ދައުރުގެ މެދުތެރެއިން ރައީސް ނަޝީދު ފެށްޓެވި ނިޒާމީ ބަހުސެވެ. އަދި ބަރުލަމާނީ ނިޒާމު ގެނައުމަށް ޕެޓިޝަނެއް ހަދާ ގިނަ އަދަދެއްގެ ސޮއިވެސް ހަމަކުރިއެވެ. އެހެންނަމަވެސް އެއަޑު މިހާރު ކޮންމެވެސް ވަރަކަށް ފަނޑުވެއްޖެއެވެ. އެހެންނަމަވެސް ރައީސް ނަޝީދު މިކަމުގައި ގެންގުޅުއްވާ ވިސްނުންފުޅަށް ބަދަލެއް ނާދެއެވެ. ފާއިތުވި ހަފްތާގައި ރައްޔިތުންގެ މަޖިލީހުގެ ރިޔާސަތުގައި އިންނަވާވެސް ބަރުލަމާނީ ނިޒާމު ގެންނަން ޖެހޭ ކަމަށް ވިދާޅުވިއެވެ. އެހެންނަމަވެސް ދައްކަން މި އުޅެނީ ނިޒާމީ ބަހުސްގެ ވާހަކައެއް ނޫނެވެ. ދައްކަން މިއުޅެނީ މިހާރު ފޯރީގައި ހިންގަމުން އަންނަ އެމްޑީޕީގެ އެތެރޭގެ އިންތިޚާބުގެ ކެމްޕެއިންގެ ވާހަކައެވެ. ޚާއްސަކޮށް ޗެއާޕާސަންގެ އިންތިޚާބެވެ.

ރިޔާސީ އިންތިހާބާއި މަޖިލިސް އިންތިހާބުގެ އިތުރުން ކައުންސިލް އިންތިހާބުތަކުގައި، އެހެން ސިޔާސީ ޕާޓީތަކާ ވާދަކުރާއިރު ނުފެންނަ ފަދަ ފޯރިއެއް ޗެއާޕާސަން ހޮވުމަށް ކުރަމުން އަންނަ ކެންޕެއިނުން ދަނީ ފެންނަމުންނެވެ.

ނިޒާމީ ކޯޅުމުގެ އަޑު ފަނޑުވި ނަމަވެސް އެ ކޯޅުމުގައި އެޅުނު ރެނދު އަދިވެސް އޮތީ އޮގޮތުގައެވެ. ޕާޓީ، ދެ ނިޒާމަށް ބައިވެއްޖެއެވެ. ޕާޓީގެ ދެ ލީޑަރުން ކަމަށްވާ ރައީސް ނަޝީދަށާއި ރައީސް ސާލިހްއަށް ޕާޓީ ބެހިއްޖެއެވެ. ޗެއާޕާސަން އިންތިހާބުގައި އެ ދެ ޕެކްޝަން އޮތީ ހަމަ އެގޮތަށެވެ. ޗެއަރޕާސަން ކަމަށް ވާދަ ކުރައްވަނީ އިކޮނޮމިކް މިނިސްޓަރ ފައްޔާޒު އިސްމާއީލާއި ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީއެވެ. އިމްތިޔާޒު ފަހުމީއަކީ ރައްޔިތުންގެ މަޖިލިހުގައި ރައީސް ނަޝީދުގެ އެންމެ ގާތް އަދި އެންމެ އިތުބާރުކުރައްވާ އެއް މެމްބަރެވެ. ފައްޔާޒު އިސްމާއީލަކީ ރައީސް ސާލިހު އެންމެ އިތުބާރު ކުރައްވާ ވަޒީރެވެ. އެ ދެ ބޭފުޅުންވެސް ރާއްޖޭގެ އެކި ރަށްރަށަށް ވަޑައިގެން ކެމްޕެއިން ހަރަކާތްތައް ގެންދަވަނީ ކުރައްވަމުންނެވެ. އެމްޑީޕީ "ހިންގާލަން" ޝިއާރާއެކު ފައްޒާރު ކެމްޕެއިން ކުރައްވަމުން ގެންދަވާއިރު އިންތިޔާޒު ގެންދަވަނީ "އިންތިއާއެކު" ޝިއާރުގައި ކެމްފެއިން ކުރައްވަމުންނެވެ.

ސަރުކާރުގެ އިސް މަގާމުތަކުގައި ތިއްބެވި ބޭފުޅުންނާއި ކުންފުނިތަކުގެ ވެރީންނާއި ޕާޓީގެ އިސް އެކްޓިވިސްޓުންގެ ތެރެއިން ގިނަ ބަޔަކާއި ސުޕަމެޖޯރިޓީ އޮތް ރައްޔިތުންގެ މަޖިލީހުގެ ސާފު އަގުލަބިއްޔަތުވެސް ފެންނަނީ ފައްޔާޒުގެ ކެމްޕެއިނުންނެވެ. އެހެންނަމަވެސް ތާރީޚަށް ނަޒަރު ހިންގާލާއިރު، އެމްޑީޕީގެ ޗެއާޕާސަން މިހާތަނަށް ކުރެއްވި ބޭފުޅުންނަކީ ރައީސް ނަޝީދުގެ އެންމެ އަރިސް ބޭފުޅުންނެވެ. އެގޮތުން އެމްޑީޕީގެ ޗެއާޕާސަން ކަން ކުރެއްވި އެ ޕާޓީގެ ފައުންޑަރ މެމްބަރު މުހައްމަދު ލަތީފު (ގޯގޯ) އާއި މިހާރުގެ ޑިފެންސް މިނިސްޓަރު މާރިޔާ އަހުމަދު ދީދީ އާއި މަޖިލިހުގެ ކުރީގެ ނައިބު ރައީސް ރީކޯ މޫސާ މަނިކާއި ކުރީގެ ޓޫރިޒަމް މިނިސްޓަރު އަލީ ވަހީދާއި އެންމެ ފަހުން އެ މަގާމު އަދާކުރެއްވި ރައްޔިތުންގެ މަޖިލިހުގެ ހެންވޭރު ހުޅަނގު ދާއިރާގެ މެމްބަރު ހަސަން ލަތީފަކީވެސް ރައީސް ނަޝީދުގެ ތާއިދާއެކު އެ މަގާމަށް ވަޑައިގެންނެވި ބޭފުޅުންނެވެ.

އެހެންކަމުން މިއީވެސް މި އިންތިޚާބު ފޯރިގަދަވެގެންދާ އެއް ސަބަބެވެ. މި އިންތިޚާބުގައި ރައީސް ނަޝީދު ތާއީދު ކުރައްވަނީ އިންތިއަށެވެ. އަދި އިންތިގެ ކެމްޕެއިން ޓީމްގައި ހިމެނިވަޑައިގަންނަވަނީވެސް ރައީސް ނަޝީދްއަށް ތާއީދު ކުރައްވާ ބޭފުޅުންނެވެ.

ދެ ކެންޑިޑޭޓުންވެސް ގެންދަވަނީ އެމްޑީޕީގެ ކަންކަން ރަނގަޅުކޮށް ދެއްވާނެ ކަމަށް ވިދާޅުވެ ވައުދުތައް ވެ ވަޑައިގަންނަވަމުންނެވެ. އެއްބޭފުޅަކު އަނެއް ބޭފުޅަކަށް ހޫނުގަދަ ބަހުގެ ހަމަލާތައްވެސް ދެއްވައެވެ. ރައްޔިތުންގެ މަޖިލީހުގެ ޖަލްސާ ތެރެއިންވެސް މިހާރު ބިލްތަކުގެ ބަހުސަށްވުރެ ބޮޑަށް ފެންނަނީ ޕާޓީގެ އިންތިޚާބުގެ ފޯރީގައި އެއް މެމްބަރަކު އަނެއް މެމްބަރަކަށް ބަހުގެ ހަމަލާތައް ދެއްވާ މަންޒަރެވެ.

އެންމެ ފަހުން ފައްޔާޒު ވިދާޅުވެފައިވަނީ، އެމްޑީޕީ ޗެއާޕާސަން އިންތިޚާބުގައި މިހާތަނަށް ދަތުރު ކުރެވުނު 115 ރަށުން އިވުނު އަޑަކީ އެމްޑީޕީ، ނުހިނގާކަމުގެ ވާހަތައް ކަމަށެވެ. ކުރިއަށް އޮތް އިންތިޚާބު ކާމިޔާބުކޮށް މިކަންބޮޑުވުންތަކަށް ހައްލު ގެންނަވާނެކަމަށް ވިދާޅުވިއެވެ.

އެމްޑީޕީ ނުހިނގާކަމުގެ ޝަކުތާކަށް ރައްދު ދެއްވަމުން ރައީސް ނަޝީދު ވިދާޅުވެފައިވަނީ ، އެމްޑީޕީގެ ހިންގުމުގެ އެންމެ މައިގަނޑު ނިޒާމަކީ އެތެރޭގެ އިންތިހާބުތައް ކަމަށެވެ. ސިޔާސީ ޕާޓީއެއްގެ ހިންގުން އަމާޒުވާން ޖެހޭނީ އިންތިހާބު ކާމިޔާބު ކުރުމުގެ މައްޗަށް ކަމަށް ވާއިރު އެކަމުގައި އެމްޑީޕީ ނުހިންގިފައި ނެތް ކަމަށް ރައީސް ނަޝީދު ވިދާޅުވިއެވެ.

އެމްޑީޕީގެ ޗެއާޕާސަން ކަމުގެ މަގާމު ދިފާއު ކުރަން ފައްޔާޒާއި އިންތި ތިއްބެވީ ގަދަޔަށް ހިފާފައެވެ.

މީހުން ބުނާ ގޮތުގައި މި އިންތިޚާބުގެ ނަތީޖާއަކީ ވަރަށް ގިނަ ކަންކަން އެނގިގެންދާނެ ނަތީޖާއެކެވެ. އެގޮތުން ކުރިއަށް އޮތް ރިޔާސީ އިންތިޚާބުގައި އެމްޑީޕީގެ އާންމު މެންބަރުންގެ ވޯޓު އޮންނާނީ ކިހިނެތްކަން އެނގިގެންދާނެއެވެ. ފައްޔާޒަށް ކާމިޔާބު ވެއްޖެނަމަ އެއީ ރައީސް ސާލިހަށް ދެވަނަ ދައުރެއް ކަށަވަރުވުން ކަމަށް މީހުން ބުނެއެވެ.

އަދި އިންތިއަށް ޗެއާޕާސަންކަން ކާމިޔާބު ވެއްޖެ ނަމަ، އެއީ، ރައީސް ނަޝީދަށް ރިޔާސީ ޓިކެޓް ކަށަވަރު ވުމެވެ.