މިހާތަނަށް އިނގިރޭސިވިލާތުން ބައި ލައްކައަށްވުރެ ގިނަ ފަތުރުވެރިން އަތުވެއްޖެ
މިއަހަރުގެ މިހާތަނަށް 460،479 ފަތުރުވެރިން ވަނީ ރާއްޖެ އައިސްފައި
ފަތުރުވެރިއެއް
މިއަހަރުގެ މިހާތަނަށް އިނގިރޭސިވިލާތުން ބައިލައްކައަށްވުރެ ގިނަ ފަތުރުވެރިން ރާއްޖެ އައިސްފައިވާކަމަށް ޓޫރިޒަމް މިނިސްޓްރީން ބުނެފިއެވެ.
ޓޫރިޒަމް މިނިސްޓްރީން އާންމުކޮށްފައިވާ ޓޫރިޒަމްގެ ތަފާސްހިސާބުގައިވާ ގޮތުން މިއަހަރުގެ މިހާތަނަށް 460،479 ފަތުރުވެރިން ވަނީ ރާއްޖެ އައިސްފައެވެ. މިއީ ފާއިތުވި 2021 ވަނަ އަހަރުގެ މި މުއްދަތުގައި ރާއްޖެ އައި ފަތުރުވެރިންނަށްވުރެ 43.1 އިންސައްތަ އިތުރު އަދަދެއް ކަމަށް ޓޫރިޒަމް މިނިސްޓްރީން ހާމަކޮށްފައިވެއެވެ. މިއަހަރުގެ ޖެނުއަރީ މަހު 131،764 ފަތުރުވެރިން އައިސްފައިވާއިރު، ފެބްރުއަރީ މަހު 149،008 ފަތުރުވެރިން، މާރޗް މަހު 150،739 ފަތުރުވެރިން އަދި އޭޕްރިލް މަހުގެ 1 އިން 6 އަށް އައިސްފައިވަނީ 28،968 ފަތުރުވެރިން ކަމަށް ޓޫރިޒަމް މިނިސްޓްރީން ބުނެފައިވެއެވެ.
މިއަހަރުގެ މިހާތަނަށް ރާއްޖެ އައި ފަތުރުވެރިންގެ ތެރެއިން 58،608 ފަތުރުވެރިން ރާއްޖެ އައިސްފައިވަނީ އިނގިރޭސިވިލާތުން ކަމަށް ޓޫރިޒަމް މިނިސްޓްރީން ހާމަކޮށްފައިވެއެވެ. އަހަރުގެ މިހާތަނަށް ރާއްޖެ އައި ފަތުރުވެރިންގެ އަދަދުން 12.7 އިންސައްތަ ހިއްސާކުރަނީ އިނގިރޭސިވިލާތުން އައިސްފައިވާ ފަތުރުވެރިން ކަމަށް ޓޫރިޒަމް މިނިސްޓްރީން ބުނެފައިވެއެވެ. އިނގިރޭސިވިލާތަކީ މިހާރު ފަތުރުވެރިން ރާއްޖެ އަންނަ މާކެޓުތަކުގެ ތެރެއިުން ޓޮޕް މާކެޓުގެ ގޮތުގައި އޮތް މާކެޓެވެ.
މީގެ ކުރިން ޓޮޕް މާކެޓުގެ ގޮތުގައި އޮތީ ރަޝިޔާ މާކެޓެވެ. ރަޝިޔާ އާއި ޔޫކްރެއިނާއި ދެމެދު މިހާރު ހިނގަމުންދާ ހަނގުރާމައިގެ ސަބަބުން މި ދެ މާކެޓުން ފަތުރުވެރިން އައުން ހުއްޓުމާއެކު މިހާރު އެންމެ ކުރިއަށް ޖެހިފައިމިވަނީ ޔޫކޭ މާކެޓެވެ. ރަޝިޔާ މާކެޓުން މިހާތަނަށް އައިސްފައިވަނީ 53،010 ފަތުރުވެރިން ކަމަށް ޓޫރިޒަމް މިނިސްޓްރީން ބުނެފައިވެއެވެ. ތިންވަނައިގައި އޮތް އިންޑިޔާ މާކެޓުން 50،242 ފަތުރުވެރިން ވަނީ އައިސްފައެވެ. މީގެ އިތުރުން ޖަރުމަނު، އިޓަލީ، ފްރާންސް، އެމެރިކާ، ސްވިޒަރލޭންޑް، ސައުދީ އަރަބިއާ އަދި އޮސްޓްރިއާ މި ލިސްޓުގައި ހިމެނެއެވެ.
ކޮވިޑް-19ގެ ހާލަތުގެ ކުރިން އެންމެ ގިނަ ފަތުރުވެރިން ރާއްޖެ އަންނަ މާކެޓުގެ ގޮތުގައި އޮތީ ޗައިނާއެވެ. 2019 ވަނަ އަހަރު ޗައިނާއިން 284،029 ފަތުރުވެރިން ރާއްޖެ އައިސްފައިވެއެވެ. އެހެންނަމަވެސް ކޮވިޑް-19ގެ ހާލަތާއެކު ޗައިނާ ބޯޑަރު ބަންދުކޮށް އެގައުމުން ފަތުރުވެރިން އައުން ވަނީ އެއްކޮށް ހުއްޓިފައެވެ. އެއަހަރު ދެވަނައަށް އެންމެ ގިނަ ފަތުރުވެރިން އައިސްފައިވަނީ އިންޑިއާއިންނެވެ. އިންޑިއާއިން 166،030 ފަތުރުވެރިން އައިސްފައިވެއެވެ. އަދި ތިންވަނައަށް އިޓަލީން 136،343 ފަތުރުވެރިން ވަނީ އައިސްފައެވެ. މީގެ އިތުރުން ޖަރުމަނު އިނގިރޭސިވިލާތް، ރަޝިއާ، ފްރާންސް، އެމެރިކާ، ޖަޕާން އަދި އޮސްޓްރޭލިއާ ހިމެނެއެވެ.
ކޮވިޑް-19 އާއެކު ރާއްޖޭގެ ބޯޑަރު އެއްކޮށް ބަންދުކޮށް ފަތުރުވެރިކަން ހުއްޓިފައި އޮތް މުއްދަތުގައި ސަރުކާރުން މަސައްކަތްކޮށްފައިވަނީ އޮންލައިންކޮށް ރާއްޖެ އިޝްތިހާރުކުރުމުގެ މަސައްކަތް ކުރުމަށެވެ. މިގޮތުން އައު މާކެޓުތަކުގައި ރާއްޖެ އިޝްތިހާރުކުރަން މަސައްކަތްކުރުން ފާހަގަކޮށްލެވެއެވެ. މި މަސައްކަތާއެކު ރާއްޖޭގެ ބޯޑަރު ހުޅުވާލުމާއެކު އެކި ގައުމުތަކުން ފަތުރުވެރިން އަންނަން ފަށައި، މިހާރު ފަތުރުވެރިން އަންނަ މާކެޓުތަކުގެ އެންމެ ކުރީގައި އޮތީ ކޮވިޑް-19 ގެ ކުރިން މި ލިސްޓުގެ ފަހަތުގައި އޮތް މާކެޓުތަކެވެ.
މިއަހަރަކީ މިއީ ރާއްޖޭގެ ފަތުރުވެރިކަމުގެ ރަންޔޫބީލް އަހަރަށް ވުމާއެކު ސަރުކާރުން މަސައްކަތްކުރަމުންގެންދަނީ މިއީ ކާމިޔާބު އަހަރަކަށް ހެދުމަށެވެ. އަދި ފަތުރުވެރިން ގެނައުމަށް އަމާޒު ހިފާފައިވާ އަދަދަށް ފަތުރުވެރިން ގެނައުމަށެވެ.
