ދިވެހިރާއްޖެއަށް އެންމެ ގިނައިން ފަތުރުވެރިން އަންނަ މާކެޓުގެ ގޮތުގައި ޔޫކޭ މާކެޓު ހިމެނިއްޖެއެވެ.

މިއަހަރު ފެށުނުއިރު ރާއްޖެއަށް އެންމެ ގިނަ ފަތުރުވެރިން އަންނަ މާކެޓެއްގެ ގޮތުގައި އޮތީ ރަޝިޔާ މާކެޓެވެ. ރަޝިޔާ އާއި ޔޫކްރެއިނާއި ދެމެދު މިހާރު ކުރިއަށްދާ ހަނގުރާމައިގެ ސަބަބުން ރަޝިޔާ އަދި ޔޫކްރެއިނުން ފަތުރުވެރިން އައުން ވަނީ ހުއްޓިފައެވެ. މިއާއެކު މީގެ ކުރިން ދެވަނަ މާކެޓުގެ ގޮތުގައި އޮތް ޔޫކޭ މާކެޓު މިހާރު ވަނީ ރާއްޖޭގެ އެއްވަނަ މާކެޓަށް އަރާފައެވެ.

ޓޫރިޒަމް މިނިސްޓްރީން އާންމުކޮށްފައިވާ ތަފާސްހިސާބުގައިވާ ގޮތުން މިއަހަރުގެ މިހާތަނަށް އައި ފަތުރުވެރިންގެ ތެރެއިން 12.7 އިންސައްތަ ހިއްސާކުރަނީ ޔޫކޭ މާކެޓުންނެވެ. އަދި ރަޝިޔާ މާކެޓު މިހާރު ވަނީ ދެވަނައަށް ވެއްޓިފައެވެ. އެއީ 11.6 އިންސައްތައާއެކުއެވެ. މީގެ އިތުރުން އިންޑިއާ، ޖަރުމަނު، އިޓަލީ، ފްރާންސް، އެމެރިކާ، ސްވިޒަރލޭންޑް، ސައުދީ އެރޭބިއާ އަދި އޮސްޓްރޭލިޔާ ވަނީ އެންމެ ގިނައިން ފަތުރުވެރިން އަންނަ މާކެޓުގެ ތެރޭގައި ހިމެނިފައެވެ.

ޓޫރިޒަމް މިނިސްޓްރީން ބުނީ މިއަހަރުގެ މިހާތަނަށް 456،992 ފަތުރުވެރިން ރާއްޖެ އައިސްފައިވާކަމަށެވެ. ޖެނުއަރީ މަހު 131،764 ފަތުރުވެރިން އައިސްފައިވާއިރު، ފެބްރުއަރީ މަހު 149،008 ފަތުރުވެރިން، މާރޗް މަހު 150،739 ފަތުރުވެރިން އަދި އޭޕްރިލް މަހުގެ 1 އިން 5 އަށް 25،481 ފަތުރުވެރިން ރާއްޖެ އައިސްފައިވާކަމަށް ޓޫރިޒަމް މިނިސްޓްރީން ހާމަކޮށްފައިވެއެވެ.

މިއަހަރުގެ މިހާތަނަށް ދުވާލެއްގެ މައްޗަށް 5،096 ފަތުރުވެރިން ރާއްޖެ އަންނަ ކަމަށް ވަނީ ރެކޯޑުކޮށްފައެވެ. އަދި އާންމުގޮތެއްގައި 8 ދުވަހު ރާއްޖޭގައި މަޑުކުރާކަމަށް މިނިސްޓްރީން ބުނެފައިވެއެވެ.

ޓޫރިޒަމް މިނިސްޓަރ ޑރ. އަބްދުﷲ މައުސޫމް ވިދާޅުވީ ހަނގުރާމައިގެ ކުރިން ރަޝިޔާ މާކެޓުން ފަތުރުވެރިން އައި މިންވަރު 70 އިންސައްތަ ދަށަށްގޮސްފައިވާކަމަށެވެ. ޔޫކްރެއިން އާއި ރަޝިޔާ އެއްކޮށް ފަތުރުވެރިންގެ 20 އިންސައްތަ ހިއްސާކުރާކަމަށް މިނިސްޓަރު ވިދާޅުވިއެވެ. ހަނގުރާމައިގެ ސަބަބުން ޔޫކްރެއިންގެ މާކެޓް އެއްކޮށް ގެއްލިފައިވާކަމަށާއި ރަޝިޔާ މާކެޓްވެސް ދަށަށްދާއިރު އިތުރު މާކެޓްތައް ހޯދުމުގެ މަސައްކަތް ކުރަމުން އަންނަކަމަށް މިނިސްޓަރު ވިދާޅުވިއެވެ.

މީގެ އިތުރުން ލަންކާގައި މިހާރު ހިނގަމުންދާ ހަމަނުޖެހުމުގެ އަސަރުވެސް ރާއްޖޭގެ ފަތުރުވެރިކަމަށް ކުރަމުންދާކަމަށް މިނިސްޓަރު މައުސޫމް ވިދާޅުވިއެވެ. ސްރީލަންކާއަކީ ރާއްޖޭގެ ފަތުރުވެރިކަމުގެ ޕާޓްނަރެއް ކަމަށާއި ވަކިން ޚާއްސަކޮށް ސްރީލަންކާގެ ވެރިރަށް ކޮލަމްބޯއާއި، ސްރީލަންކަން އެއާލައިނަކީ ރާއްޖޭގެ ފަތުރުވެރިކަމަށް މުހިންމު ދެ ބައިވެރިން ކަމުގައި މިނިސްޓަރު ވިދާޅުވިއެވެ.

ޓޫރިޒަމް މިނިސްޓަރު މައުސޫމް ވިދާޅުވީ އެހެން މާކެޓުތަކުގައި ރާއްޖެ އިޝްތިހާރުކުރުމުގެ މަސައްކަތް ހުއްޓާނުލާ ކުރިއަށްގެންދަންޖެހޭ ކަމަށެވެ. ރާއްޖެއިން ފަތުރުވެރިކަން ކުރިއަރުވަން ކުރަމުންދާ މަސައްކަތަކީ ވާދަވެރި މަސައްކަތެއް ކަމަށާއި، މިއަދު ރާއްޖެ އޮތީ މުޅި ދުނިޔޭގެ އެއްވަނަ މާކެޓުގެ ގޮތުގައިކަންވެސް މިނިސްޓަރު މައުސޫމް ފާހަގަކުރެއްވިއެވެ.