ޔޫކޭގެ ރެޑް ލިސްޓުން ރާއްޖެ އުނިކޮށްފި

ޔޫކޭގެ ރެޑް ލިސްޓުން ރާއްޖެ އުނި ކޮށްފިއެވެ.

އެ ގައުމުން އެންމެ ފަހުން އަޕްޑޭޓް ކޮށްފައިވާ ލިސްޓްގައި ރާއްޖެއާއެކު 8 ގައުމެއް ވަނީ ރެޑް ލިސްޓުން އުނިިކޮށްފައެވެ. އޭގެ ތެރޭގައި ހިމެނެނީ ތުރުކީ، މިސްރު، ދިވެހިރާއްޖެ، އޮމާން، ބަނގްލަދޭޝް، ޕާކިސްތާން އަދި ކެންޔާއެވެ.

ޓްރާންސްޕޯޓް ސެކެޓްރީ ގްރާންޓް ޝަޕްސް ވިދާޅުވީ މި މަހުގެ 22ން ފެށިގެން މި 8 ގައުމުން ލިސްޓުން އުނި ކުރުމަށް ނިންމާފައިވާ ކަމަށާއި، އޮކްޓޯބަރ 4 ވަނަ ދުވަހުން ފެށިގެން އެ ގައުމުތަކުން ޔޫކޭއަށް ދާ ފަތުރުވެރިން ވެކްސިންގެ ދެ ޑޯޒް ފުރިހަމަ ކޮށްފައިވާނަމަ ޕީސީއާރް ޓެސްޓަކާ ނުލާ ދަތުރު ކުރެވޭނެ ކަމަށެވެ. ގައުމަށް އެތެރެވާތާ 2 ދުވަސް ތެރޭގައި ޓެސްޓް ހެދުމަށް ފަސޭހަ އިންތިޒާމުތަކެއް ހަމަޖެއްސުމަށް މަސައްކަތް ކުރަމުންދާ ކަމަށެވެ. އަދި ރެޑް ލިސްޓްގަައި ނުހިމެނޭ ގައުމުތަކުން ދަތުރުކުރާ މީހުންނަށް އަމިއްލަ ގޭގައި ނުވަތަ ބޭނުންވާ ތަނެއްގައި ކަރަންޓީން ވުމުގެ ފުރުސަތު އޮންނާނެ ކަމަށެވެ. އެހެންނަމަވެސް ރެޑް ލިސްޓްގައި ހިމެނޭ ގައުމުތަކުން ދަތުރުކުރާ މީހުން ކަރަންޓީންވާން ޖެހޭނީ، ޔޫކޭގެ ސަރުކާރުން ކަނޑައަޅާ ތަނެއްގައެވެ.

ރާއްޖެ ޔޫކޭގެ ރެޑް ލިސްޓްގައި އޮންނަތާ މިހާރު މަހެއްހާ ދުވަސް ވަނީ ވެފައެވެ. ޔޫކޭ ހިމެނެނީ ރާއްޖެއަށް އެންމެ ގިނައިން ފަތުރުވެރިން އަންނަ މަންޒިލްތަކުގެ ތެރޭގައެވެ. އެހެންކަމުން ރެޑް ލިސްޓުން ރާއްޖެ އުނިވުމާއެކު ފަތުރުވެރިންގެ ޑިމާންޑް އަންނަނީ އިތުރުވަމުންނެވެ.

ރާއްޖޭގެ ވެކްސިން ޖެހޭ އާބާދީއަށް ވެކްސިން ދިނުމުގެ ކާމިޔާބު ކެމްޕެއިނެއް ސަރުކާރުން އަންނަނީ ކުރަމުންނެވެ. އެގޮތުން އާބާދީގެ 70 އިންސައްތަ މީހުން މިހާރުވަނީ ވެކްސިން ފުރިހަމަ ކޮށްފައެވެ. އަޅާފައިވާ ފިޔަވަޅުތަކާއެކު ދުވާލެއްގެ މައްޗަށް ކޮވިޑަށް ޕޮޒިޓިވްވާ މީހުންގެ އަދަދު ވަނީ އެއް ހަމައެއްގައި ހިފެހެއްޓިފައެވެ. އެގޮތުން ފާއިތުވި 24 ގަޑިއިރު ނަގާފައިވާ ފަސް ހާހަށްވުރެ ގިނަ ސާމްޕަލްގެ ތެރެއިން ޕޮޒިޓިވް ވެފައިވަނީ 164 މީހުންނެވެ.