އަދިވެސް ޓޮޕް މާކެޓުގެ ގޮތުގައި އޮތީ ރަޝިޔާ މާކެޓު
މިހާތަނަށް 324،742 ފަތުރުވެރިން ވަނީ ރާއްޖެ އައިސްފައި
ބުރުންޏަށް ޒިޔާރަތްކުރި ފަތުރުވެރިންނަށް މަރުހަބާކިޔުން
ރާއްޖެ އަންނަ ފަތުރުވެރިންގެ ތެރެއިން އަދިވެސް އެންމެ ގިނަ ފަތުރުވެރިން ރާއްޖެ އަންނަނީ ރަޝިޔާ މާކެޓުން ކަމަށް ޓޫރިޒަމް މިނިސްޓްރީން ހާމަކޮށްފިއެވެ.
ޓޫރިޒަމް މިނިސްޓްރީން އާންމުކޮށްފައިވާ އެންމެ ފަހުގެ ތަފާސްހިސާބުތައް ދައްކާގޮތުން, މިއަހަރުގެ މިހާތަނަށް ރާއްޖެއަށް ޒިޔާރަތްކުރި ފަތުރުވެރިންގެ އަދަދު ވަނީ 324،742އަށް އަރާފައެވެ. ޖެނުއަރީ މަހު ރާއްޖެ އައިސްފައިވަނީ 131،764 ފަތުރުވެރިންނެވެ. އަދި މާޗް މަހު 149،008 ފަތުރުވެރިން ޒިޔާރަތްކޮށްފައިވާއިރު، މި ހިނގާ މާޗް މަހުގެ މިހާތަނަށް ޒިޔާރަތްކޮށްފައިވަނީ 43،971 ފަތުރުވެރިން ކަމަށް ޓޫރިޒަމް މިނިސްޓްރީން ހާމަކޮށްފައިވެއެވެ.
ޓޫރިޒަމް މިނިސްޓްރީން ބުނީ މިއަހަރުގެ މިހާތަނަށް ރާއްޖެ އައި ފަތުރުވެރިންގެ ތެރެއިން 48،173 ފަތުރުވެރިން އައިސްފައިވަނީ ރަޝިޔާ މާކެޓުން ކަމަށެވެ. އަދި ޓޫރިސްޓު މާކެޓުތަކުގެ ތެރެއިން އެއްވަނައިގައި އަދިވެސް އޮތީ ރަޝިޔާ މާކެޓެވެ. ދެވަނައިގައި އިނގިރޭސިވިލާތް ހިމެނޭއިރު އިނގިރޭސިވިލާތުން މިހާތަނަށް 36،608 ފަތުރުވެރިން ރާއްޖެ އައިސްފައިވާކަމަށް ޓޫރިޒަމް މިނިސްޓްރީން ބުނެފައިވެއެވެ. ތިންވަނައިގައި އިންޑިއާ އޮތްއިރު މިހާތަނަށް 31،433 ފަތުރުވެރިން އެގައުމުން އައިސްފައިވެއެވެ. ޖަރުމަނުން 25،650 ފަތުރުވެރިން އައިސްފައިވާއިރު، އިޓަލީން 22،385 ފަތުރުވެރިން އައިސްފައިވެއެވެ. އަދި ފްރާންސުން 16،104 ފަތުރުވެރިން އައިސްފައިވާއިރު، އެމެރިކާއިން 12،800 ފަތުރުވެރިން, ޔޫކްރެއިނުން 8،049 ފަތުރުވެރިން، ސްވިޒަރލޭންޑުން 7،434 ފަތުރުވެރިން އަދި އޮސްޓްރިއާއިން 7،118 ފަތުރުވެރިން ވަނީ ރާއްޖެ އައިސްފައެވެ.
މިއަހަރުގެ މިހާތަނަށް ދުވާލެއްގެ މައްޗަށް 4،776 ފަތުރުވެރިން އަންނަ ކަމަށް ޓޫރިޒަމް މިނިސްޓްރީން ވަނީ ލަފާކޮށްފައެވެ. އަދި 8 ދުވަހު ރާއްޖޭގައި މަޑުކުރާ ކަމަށް ވަނީ ރެކޯޑުކޮށްފައެވެ.
ޓޫރިޒަމް މިނިސްޓްރީން ހާމަކުރާގޮތުގައި, މިވަގުތު ޓޫރިސްޓު އެކޮމޮޑޭޝަން ފެސިލިޓީތަކުގެ ގޮތުގައި 1،172 ފެސިލިޓީއެއް އެބަހުއްޓެވެ. އޭގެތެރޭގައި 168 ރިސޯޓާއި، 839 ގެސްޓްހައުސްއާއި، 1 ހޯމްސްޓޭއާއި، 152 ސަފާރީއެއްގެ އިތުރުން 12 ހޮޓަލެއް ހިމެނެއެވެ. މިތަންތަނުގައި 60،047 ބެޑް ކެޕޭސިޓީ އެބަހުއްޓެވެ. 1،172 ޓޫރިސްޓު ފެސިލިޓީގެ ތެރެއިން މިވަގުތު ޚިދުމަތް ދެމުންދަނީ 963 ތަނަކުން ކަމަށާއި, އަދި 60،047 ބެޑް ކެޕޭސިޓީގެ ތެރެއިން 54،340 އެނދެއްގެ ޚިދުމަތް ދެމުންދާކަމަށް ޓޫރިޒަމް މިނިސްޓްރީން ހާމަކޮށްފައިވެއެވެ.
މިއަހަރު ނިމުމުގެ ކުރިން 2 މިލިއަން ފަތުރުވެރިން ގެނައުމަށް ސަރުކާރުން ވަނީ އަމާޒު ހިފާފައެވެ. މި އަމާޒަށް ވާސިލްވެވޭނެ ކަމުގެ އުންމީދު އެބައޮތްކަމަށް ޓޫރިޒަމް މިނިސްޓަރު ހާމަކުރައްވާފައިވާއިރު، މިދިޔަ 2021 ވަނަ އަހަރަށް ސަރުކާރުން ކަނޑައެޅި އަމާޒުވެސް ވަނީ ކާމިޔާބުކޮށްފައެވެ. އެގޮތުން މިދިޔަ 2021 ވަނަ އަހަރު 1.3 މިލިއަން ފަތުރުވެރިން ގެނައުމަށް އަމާޒު ހިފިއިރު، އަހަރު ނިންމާލާފައިވަނީ 1.32 މިލިއަން ފަތުރުވެރިންނާއެކުއެވެ.
