ރޯދަ މަހު އެންމެ ހޫނުގަދަވާނީ މެންދުރު 2 ޖަހާއިރު: މެޓް އޮފީސް
މެޓް އޮފީހުން ބުނީ މިދުވަސްވަރު ވައި މަޑުވުމާއި އޭގެ ސަބަބުން ވައިގެ ތެއްކަން މަތިކޮށް ހިފެހެއްޓިފައި ހުރުމުން ވައިގެ ހޫނުމިނަށް ވުރެ އިހުސާސްކުރެވޭ ހޫނުމިން އެތައް ގުނައެއް މަތިވާކަމަށް
ސިނަމާލެ ބްރިޖް
ހިނގަމުންމިދާ އޭޕްރީލް މަހަކީ އަހަރުގެ ތެރޭގައި ރާއްޖެއަށް އެންމެ ހޫނުގަދަ މަސް ކަމުގައި މޫސުމާއި ބެހޭ ގައުމީ އިދާރާއިން ބުނެފިއެވެ.
މެޓް އޮފީހުން ބުނީ މިދުވަސްވަރު ވައި މަޑުވުމާއި އޭގެ ސަބަބުން ވައިގެ ތެއްކަން މަތިކޮށް ހިފެހެއްޓިފައި ހުރުމުން ވައިގެ ހޫނުމިނަށް ވުރެ އިހުސާސްކުރެވޭ ހޫނުމިން އެތައް ގުނައެއް މަތިވާކަމަށެވެ. އަދި މިއީ އިރުވައި މޫސުމުން ހުޅަނގު މޫސުމަށް ބަދަލުވާ ދުވަސްވަރުކަމަށްވެސް މެޓް އޮފީހުން ބުނެއެވެ.
މެޓް އޮފީހުން ވަނީ އެއޮފީހުން ޑާޓާ ނަގަމުންދާ ހަނިމާދޫ، ހުޅުލެ އަދި ގަމުގެ ފިނިހޫނުމިނާއެކު ތަފްސީލް ހާމަކޮށްފައެވެ. އެގޮތުން 1992 ވަނަ އަހަރުން ފެށިގެން 2021 ވަނަ އަހަރަށް ވައިގެ ތެއްކަން ހުރި މިންވަރަށް ބަލާއިރު ހަނިމާދޫގެ ހޫނު މިން މިމުއްދަތުގައި ރިކޯޑް ކޮށްފައިވަނީ 29.7 ޑިގްރީ ސެލްސިއަސްގައެވެ. ހުޅުލޭގައި 29.6 ޑިގްރީ ސެލްސިއަސްގައި ހުރިއިރު މިމުއްދަތުގައި ގަމުގެ ހޫނުމިން ރިކޯޑް ކޮށްފައިވަނީ 28.9 ޑިގްރީ ސެލްސިއަސްގައެވެ.
މެޓް އޮފީހުން ބުނީ މިމަސްތެރޭގައި ދުވަހުގެ ހޫނު މިން އެންމެ މަތިވެގެންދާނީ އާންމުކޮށް މެންދުރުފަހު 2 ޖަހާއިރު ކަމަށެވެ. އޭޕްރީލް 7 ވަނަ ދުވަހުގެ މެންދުރު 2 ޖެހީއިރު ރާއްޖޭގެ އެކި ހިސާބުތަކުގައި ފިނިހޫނު މިން ހުރި ގޮތަށް ބަލާއިރު އެންމެ ހޫނުގަދަކަމަށް ރިކޯޑްކޮށްފައިވަނީ ކައްދޫންނެވެ. އެއީ 32 ޑިގްރީ ސެލްސިއަސްއެވެ. އެއަށްފަހު ހުޅުލެއިންނެވެ. އެއީ 31.5 ޑިގްރީ ސެލްސިއަސްއެވެ. ގަމުގެ ހޫނުމިން 31.1 ޑިގްރީ ސެލްސިއަސްގައި ހުރިއިރު ހަނިމާދޫ އަދި ކާޑެއްދޫގެ ހޫނުމިން ބުރާސްފަތި ދުވަހުގެ މެންދުރު 2 ޖެހީއިރު ހުރީ 31 ޑިގްރީ ސެލްސިއަސްގައެވެ.
އޭޕްރީލް 7 ވީ ބުރާސްފަތި ދުވަހުގެ 5 ޖެހިއިރުގެ ހޫނު މިނަށް ބަލާއިރު ކައްދޫގެ ހޫނުމިން ހުރީ 31.5 ޑިގްރީ ސެލްސިއަސްގައެވެ. ހުޅުލޭގެ ހޫނު މިން 31.1 ޑިގްރީގައި ހުރިއިރު ހަނިމާދޫގެ ހޫނުމިން ހުރީ 31.2 ޑިގްރީ ސެލްސިއަސްގައެވެ. ގަމުގެ ހޫނު މިން 5 ޖެހީއިރު ހުރީ 31.5 ޑިގްރީގައެވެ. އަދި ކާޑެއްދޫގެ ހޫނުމިން ހުރީ 30 ޑިގްރީގައެވެ.
މެޓް އޮފީހުން ބުނީ ކޮންމެ ދުވަހަކުވެސް 11 ޖަހާއިރު، 2 ޖަހާއިރު އަދި 5 ޖަހާއިރު ފަސް ސްޓޭޝަންގައި ވައިގެ ފިނިހޫނުމިން ހުރި މިންވަރު އާންމުކުރަމުން ގެންދާނެކަމަށެވެ.
