މާފުށީ ޖަލުގެ ޝަރީއަތް ކުރިއަށްގެންދާ ރޫމެއް ނުލިބިގެން، މޫސަގެ މަރުގެ މައްސަލަ ކުރިއަށް ނުގެންދެވުނު
7 އެޕްރީލު 2022 | ބުރާސްފަތި 07:01ކްރިމިނަލް ކޯޓުގައި މި މައްސަލަ ބައްލަވަނީ ގާޒީ ޙަސަން ސައީދު
ކްރިމިނަލް ކޯޓު- ކްރިމިނަލް ކޯޓުގައި މި މައްސަލަ ބައްލަވަނީ ގާޒީ ޙަސަން ސައީދު
2017 ވަނަ އަހަރުގެ ސެޕްޓެމްބަރު މަހުގެ 24 ވަނަ ދުވަހު މާފަންނު އައިޓަމްސް ފިހާރަ ކައިރީގައި ތޫނު ހަތިޔާރު ބޭނުންކޮށްގެން ހިންގި ގޭންގު މާރާމާރީއެއްގައި، ވ.ކެޔޮދޫ ދޭލިޔާގޭ މޫސާ އަޙްމަދު މަރާލި މައްސަލައާއި ގުޅިގެން ބޭއްވި އަޑުއެހުން ކެންސަލްކޮށްފިއެވެ.
މޫސަގެ މަރުގެ މައްސަލައިގައި ތޫނު އެއްޗެއް ބޭނުންކޮށްގެން ގަސްތުގައި މީހަކު މަރާލުމުގައި ބައިވެރިވުމުގެ ދައުވާ އުފުލާފައި ވަނީ މ. ދިއްގަރު ދެބުދާރުގެ އަހުމަދު އިޖާދު މުހައްމަދު އާއި، ނ. ޅޮހި ކަނީރުމާގެ މުހައްމަދު ރިޔާޒުއާއި، ސ ހިތަދޫ މުޑުދާސްގޭ އަލީ ޙަސަންގެ މައްޗަށެވެ.
މީގެއިތުރުން، ސ ހިތަދޫ ގުލްބަކާގޭ މުޙައްމަދު ނާޒިޝް ނާޒިމްގެ މައްޗަށް މި މައްސަލައިގައި އުފުލާފައިވަނީ މީހަކަށް ނުރައްކާތެރި ހާނީއްކައެއްވާނެ ގޮތަށް ތޫނު އެއްޗެއް ބޭނުންކޮށްގެން މާރާމާރީ ހިންގުމުގެ ކުށުގެ ދައުވާއެވެ.
އެ ހަތަރު މީހުންގެ މައްޗަށް ކުރާ ދައުވާގެ އަޑުއެހުން ތާވަލުކޮށްފައި އޮތީ ބުރާސްފަތި ދުވަހުގެ ހެނދުނު 10:30 އަށެވެ. އެހެންނަމަވެސް، އަޑުއެހުން ކެންސަލްވެފައިވަނީ މާފުށީ ޖަލުގައި ވީޑިއޯ ކޮންފަރެންސިންގ ރޫމެއް އެވަގުތު ލިބެން ނެތުމުގެ ސަބަބުންނެވެ.
މިކަމާއި ގުޅިގެން ކަރެކްޝަންސްގެ އޮފިޝަލަކު ރާއްޖެއެމްވީއަށް ވިދާޅުވީ، މާފުށީ ޖަލުގައި ވީޑިއޯ ކޮންފަރެންސްކޮށް ޝަރީއަތް ކުރިއަށް ގެންދިއުމަށް 5 ރޫމެއް ހުންނަ ކަމަށާއި، އެ 5 ވީޑިއޯ ކޮންފެރެންސިންގ ރޫމްވެސް އަޑުއެހުންތަކަށް ބޭނުންކުރާ ކަމަށެވެ. އަދި ބުރާސްފަތި ދުވަހު ނެޓްވޯކްގެ މައްސަލަތަކެއް ދިމާވުމުގެ ސަބަބުން ބޭނުން ކުރަމުން ދިޔައީ އޭގެ ތެރެއިން 4 ތަނެއް ކަމަށާއި، އެކަމުގެ ސަބަބުން ބައެއް އަޑުއެހުންތައް އެހެން ގަޑިއަކަށް ފަސްކޮށްދިނުމަށް ކަރެކްޝަންސްއިން އެދިފައިވާނެ ކަމަށް އޭނާ ވިދާޅުވިއެވެ.
މޫސަގެ މަރުގެ މައްސަލައިގައި ތޫނު އެއްޗެއް ބޭނުންކޮށްގެން ގަސްތުގައި މީހަކު މެރުމުގެ ކުށުގެ ދައުވާ އުފުލާފައިވާ އިބްރާޙިމް ސައްމާޙް އަހުމަދު ފަތުހީގެ ފަރާތުން ޝަރީއަތުގެ ކުރިން ހުށައެޅި ހުށައެޅުމަކާއި ގުޅިގެން އޭރު ކްރިމިނަލް ކޯޓުން ވަނީ އެ ދައުވާ ބަލާނެ ތަނެއް ނެތްކަމަށް ނިންމާފައެވެ. އަދި އެ ނިންމުން ދައުލަތުން ހައިކޯޓުގައި އިސްތިއުނާފް ކުރުމުން ހައިކޯޓުންވެސް ވަނީ ކްރިމިނަލް ކޯޓުގެ ނިންމުމަށް ތާއީދުކޮށްފައެވެ.
އެހެންނަމަވެސް، ސުޕްރީމް ކޯޓުން 2021 ވަނަ އަހަރު ވަނީ އެ ދައުވާ އަލުން ބެލުމަށް ކްރިމިނަލް ކޯޓުގެ މައްޗަށް އަމުރު ނެރިފައެވެ.
ކްރިމިނަލް ކޯޓުގައި މި މައްސަލަ ބައްލަވަނީ ގާޒީ ޙަސަން ސައީދުއެވެ.
