ސަލްމާން މިސްކިތާ އިންވެގެން އޮތް ޕާކިން ޒޯންތައް ހުސްކޮށްދޭން އެދިއްޖެ
މިއާއެކު ޕާކިން މައްސަލައަށް ހައްލު އަންނާނެ
ކިންގް ސަލްމާން މިސްކިތް
މިރަމްޟާން މަހާ ދިމާކޮށް މާލޭސިޓީގައި އަލަށް ހުޅުވި އެންމެ ބޮޑުއެއްމިސްކިތް ކަމަށްވާ ސަލްމާން މިސްކިތުގެ ވަށައިގެން އޮތް ޕާކިން ޒޯންތައް ހުސްކޮށްދޭން އިސްލާމިކް މިނިސްޓްރީން އެދިއްޖެއެވެ.
ރަމްޟާން މަހުގެ ކުރިން އައި ހުކުރު ދުވަހު ސަލްމާން މިސްކިތް ހުޅުވައި މިސްކިތުގައި ނަމާދުކުރަން ފަށާފައިވާއިރު، އެ ސަރަހައްދުގައި ޕާކް ކުރެވޭނެ އިންތިޒާމެއް ހަމަޖެހިފައި ނެތުމުން މިސްކިތަށް އަރާ މީހުންނަށް ވަނީ ބޮޑެތި ދަތިތަކަކާ ކުރިމަތިލާންޖެހިފައެވެ. ސަލްމާން މިސްކިތުގެ ދެ ފަރާތުގައި ދެ ޕާކިން ޒޯން ގާއިމްކޮށްފައިވީނަމަވެސް ދާއިމީކޮށް ކާރުޕާކު ކުރުމަށް އެ ދެ ޕާކިން ޒޯނުންވެސް ގިނަ ސްލޮޓުތަކެއް މާލެ ސިޓީ ކައުންސިލުން ވަނީ ކުއްޔަށް ދޫކޮށްފައެެވެ.އެހެން ކަމުން ސައިކަލް ޕާކް ކުރާނެ ޖަާގަވަނީ ވަރަށް ބޮޑަށް މަދުވެފައެވެ.
ރާއްޖެއެމްވީއަށް މައުލޫމާތުދެއްވަމުން އިސްލާމިކް މިނިސްޓަރ ޑރ. އަހްމަދު ޒާހިރު އަލީ ވިދާޅުވީ މި ދެ ޕާކިން ޒޯންގައި މިސްކިތަށްދާ އާންމުންނަށް ޕާކު ކުރެވޭނެ ގޮތަށް ޕާކިން ޒޯންތައް ހުސްކޮށްދޭން އެދި ބުދަ ދުވަހު މާލެ ސިޓީ ކައުންސިލަށް ސިޓީއެއް ފޮނުވާފައިވާނެކަމަށެވެ. މިސްކިތް ކައިރީގައި ޕާކު ކުރާނެ ޖާގަ ނެތުމުން މިސްކިތަށް އަރާ މީހުންނަށް ވަރަށް ދަތިވާކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ މި ދެ ޕާކިން ޒޯނަކީ މީގެ ކުރިންވެސް ސަލްމާން މިސްކިތަށް އަރާ މީހުން ޕާކު ކުރުމަށް ހަަޖައްސާފައިވާ ތަން ކަމަށެވެ. އެތަނުގައި ކާރު ޕާކު ކުރުމަށް 6 މަސް ދުވަހަށް ކުއްޔަށް ދިނީ މީގެ ކުރީ ސިޓީ ކައުންސިލުން ކަމަށާއި، މިހާރު އޮތް ކައުންސިލުން އެ މުއްދަތު އިތުރުކޮށްދިނީކަމަށް މިނިސްޓަރ ވިދާޅުވިއެވެ.
މިނިސްޓަރ އިތުރަށް ވިދާޅުވީ މި ޕާކިން ޒޯންތައް ހުސްކުރެވުމުން ޕާކިން މައްސަލައަށް ހައްލެއް އައިސް މިސްކިތަށް އަރާ މީހުންނަށް ވަރަށް ބޮޑު ފަސޭހައެއް ވެގެންދާނެ ކަމަށެވެ.
