ތިމަރަފުށީ ބަނދަރުގެ މަސައްކަތް ތާވަލުކުރެވިފައި އޮތީ މިއަހަރުގެ ފަހު ކުއާޓާގައި – އަސްލަމް

ތ. ތިމަރަފުށީ ބަނދަރުގެ މަސައްކަތް ކުރުމަށް ތާވަލުކޮށްފައިވަނީ މިއަހަރުގެ ފަހު ކުއާޓާގައި ކަމަށް މިނިސްޓަރ އޮފް ނެޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ މުހައްމަދު އަސްލަމް ވިދާޅުވެއްޖެއެވެ.

ބުދަ ދުވަހުގެ ރައްޔިތުންގެ މަޖިލީހުގެ ޖަލްސާގައި ވަޒީރުންނާއި ސުވާލުކުރެއްވުމުގެ ބައިގައި ތިމަރަފުށީ ދާއިރާގެ މެމްބަރު އަބްދުﷲ ރިޔާޒު ވަނީ ޕީއެސްއައިޕީ ޕްރޮޖެކްޓްގެ ގޮތުގައި ހިމެނިފައިވާ ތ. ތިމަރަފުށި ބަނދަރު އަޕްގްރޭޑް ކުރުމުގެ މަސައަކަތް ފެށޭނެ ތާރީހެއް ސާފުކޮށްދެއްވުމާއި ގުޅޭގޮތުން ސުވާލުކުރައްވާފައެވެ. މިސުވާލަށް ޖަވާބުދެއްވަމުން މިނިސްޓަރު އަސްލަމް ވިދާޅުވީ ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ވޭތުވެދިޔަ އަހަރުގެ ފަހުކޮޅު ތިމަރަފުއްޓަށް ކުރެއްވި ޒިޔާރަތެއްގައި ތިމަރަފުށީ ރައްޔިތުންގެ އެދިވަޑައިގަތުމަކަށް މިއަހަރުގެ ބަޖެޓުގައި ތިމަރަފުށީ ބަނދަރު އަޕްގްރޭޑްކޮށްދެއްވާނެ ވާހަކަ ވިދާޅުވެފައިވާ ކަމަށެވެ.

Advertisement

އަދި މިއަހަރުގެ ބަޖެޓުގައި އެ މަސައްކަތް ހިމެނިފައިވާ ކަމަށާއި، މަސައްކަތް ތާވަލުކުރެވި މި މަސައްކަތް ފެށޭނީ މިއަހަރުގެ ފައިނަލް ކުއާޓާގައި ކަމަށް މިނިސްޓަރު އަސްލަމް ވިދާޅުވިއެވެ.

މިކަމާއި ގުޅިގެން ސުވާލުކުރުމުގެ ބައިގައި މެމްބަރު ރިޔާޒު ވަނީ ތިމަރަފުށީ ގިރާ މައްސަލަ ވޭތުވެދިޔަ 2 އަހަރު ވެސް އެންމެ ފަހު ކުއާޓަރަށް ހަދަމުން ގޮސް މިހާރު 3 ވަނަ އަހަރަކަށް ފަސްވެ، އެކަމެއް ނުވާކަމަށް ވިދާޅުވެފައެވެ. އަދި ތިމަރަފުށީގެ މަގުތައް ވެސް ނިންމެން އަންނަނީ ބަނދަރު މަރާމާތުކޮށްގެން ކަމަށާއި، މަގުތަކުގެ މަސައްކަތް ހިނގަމުންދާއިރު އެކަން ކޮށްދިނުމަކީ ރައްޔިތުންގެ ވަރަށް ބޮޑު އާދޭހޭއްކަމުން، އެމަސައްކަތް ފަހު ކުއާޓަރަށް ނުލާ ކުރެވޭނެ އެއްވެސް ގޮތެއް އޮތްތޯ ސުވާލު ކުރައްވާފައެވެ.

މި ސުވާލުގެ ޖަވާބުގައި މިނިސްޓަރު އަސްލަމް ވިދާޅުވީ މަސައްކަތްތައް ޕްލޭންކޮށް ފަށަންވާ ތާރީހުގައި ނުފެށި ވަރަށް ގިނަ މަސައްކަތް ހުންނަ ކަމަށާއި، ތިމަރަފުށީ މަގު ހެދުމުގެ މަސައްކަތްތަކާއި ބަނދަރާއި ގުޅުމެއް ހުރި ކަމަށް ގަބޫލެއް ނުކުރައްވާ ކަމަށެވެ.

އެހެންނަމަވެސް މެމްބަރު އެދިވަޑައިގެންނެވީ ރައްޔިތުންގެ އެދުމަކީ އަވަސްކޮށް ދިނުން ކަމަށްވާތީ، އެކަން ބައްލަވާދެއްވާނެ ކަމަށެވެ.