އެމްބާޕޭ ޕީއެސްޖީގައި މަޑުކުރުން ގާތް!

ޕީއެސްޖީގެ ޒުވާން ތަރި ކީލިއަން އެމްބާޕޭ މި ސީޒަން ނިންމުމަށް ފަހުވެސް އެޓީމުގައި މަޑުކުރާނެކަމަށް ބެލެވިއްޖެއެވެ.

މީގެ ކުރިން ބެލެވިފައި އޮތީ މި ސީޒަން ނިމުމާއެކު ފްރީ ޓްރާންސްފާއެއްގައި އޭނާ ސްޕެއިންގެ ރެއާލް މެޑްރިޑްއަށް ބަދަލުވާނެ ކަމަށެވެ. މިދިޔަ ސަމަރ ޓްރާންސްފާގައިވެސް ރެއާލްއިން އެމްބާޕޭ ހޯދުމަށް ތިން ފަހަރެއްގެ މަތިން ޕިއެސްޖީއަށް ހުށަހެޅިއެވެ. ނަމަވެސް ޕީއެސްޖީ ވަނީ އެމްބާޕޭ ދޫކޮށްލުމަށް އޭރުވެސް ދެކޮޅު ހަދާފައެވެ.

މިހާރުވެސް ޕީއެސްޖީން އެންމެ ބޮޑު ސަމާލުކަމެއް ދިީގެން ކުރަމުން އަންނަ ކަމަކީ އެމްބާޕޭ އެޓީމުގައި ބެހެއްޓުމަށް ކުރާ މަސައްކަތެވެ. އެގޮތުން އެމްބާޕޭއަށް ޓީމުގެ ކެޕްޓަން ބޭންޑު ދިނުމަށްވެސް ކްލަބުގެ މެނޭޖުމެންޓުން ވަނީ މަޝްވަރާކޮށްފައެވެ.

ލޮރިއެންޓް އަތުން 5-1 ން މޮޅުވުމަށްފަހު ދިން އިންޓަވިއުއެއްގައި އެމްބާޕޭ ބުނީ އޭނާގެ މުސްތަގުބަލާއި މެދު ވަކި ގޮތަކަށް އަދި ނުނިންމާ ކަމަށެވެ. ވަކި ގޮތަކަށް ނިންމުމުގެ ކުރިން ވިސްނަން ޖެހޭ ވަރަށް ބައިވަރު ކަންތައް އެބަހުރި ކަމަށް އެމްބާޕޭ ބުންޏެވެ. އަދި ލޯބިވާ ފަރާތްތަކާއެކު އެންމެ ރަނގަޅު ގޮތަކީ ކޮބައިތޯ ބަލަމުން އަންނަ ކަމަށްވެސް އޭނާ ބުންޏެވެ.

ލިއޮނެލް މެސީ ޕީއެސްޖީއަށް ބަދަލުވާނެކަމަށް އެންމެ ފުރަތަމަ ބުނި ނޫސްވެރިއަކީ ޑެނިއޭލް ރިއޯލޯއެވެ. އޭނާ ވަނީ ޕީއެސްޖީއާއެކު އެމްބާޕޭ އިތުރު އެއްބަސްވުމެއް ހަދާނެކަމަށް ބުނެފައެވެ. އަދި މި އެއްބަސްވުން ހަދާާނީ މިއަންނަ މޭ މަހުގައި ކަމަށްވެސް އޭނާ ބުންޏެވެ.