އެމްބާޕޭއަށް މެސީއާ އަރާ ހަމަނުކުރެވޭނެ: ގާޑިއޯލާ

ފްރާންސްގެ ޒުވާން ފޯވާޑް ކިލިއަން އެމްބާޕޭއަށް ލިއޮނެލް މެސީއާ އެއްފެންވަރަށް ނާދެވޭނެ ކަމަށް މެންޗެސްޓާ ސިޓީގެ ކޯޗު ޕެޕް ގާޑިއޯލާ ބުނެފިއެވެ.

ނޫސްވެރިންނާ ވާހަކަ ދައްކަމުން ގާޑިއޯލާ ބުނެފައި ވަނީ އެމްބާޕޭ އަކީ ތަފާތު މޮޅު ކުޅުންތެރިޔެއް ކަމަށާއި އަދި މުސްތަގުބަލުގައި އޭނާ ދުނިޔޭގެ އެންމެ މޮޅު އެއް ކުޅުންތެރިޔާއަށް ވާނޭ ކަމަށެވެ. އެހެނަސް މެސީއާ އެއް ހަމަޔަކަށް އޭނާއަށް އާދެވުމަކީ ވާނޭ ކަމެއް ނޫން ކަމަށް ގާޑިއޯލާ ބުންޏެވެ. އެގޮތުން 12 އަހަރު ވަންދެން ދުނިޔޭގެ އެންމެ މޮޅު ކުޅުންތެރިޔާގެ ގޮތުގައި ދެމިހުރުމަކީ އޭނާއަށް ކުރަން ވަރަށް އުނދަގޫ ވާނެ ކަމެއް ކަމަށް ގާޑިއޯލާ ބުންޏެވެ.

މީގެ އިތުރުން ގާޑިއޯލާ ބުނެފައި ވަނީ މެސީއަކީ ކޮންމެ ސީޒަނެއްގައި ވެސް މަދުވެގެން 50 ލަނޑު ޖަހާ ކުޅުންތެރިޔެއް ކަމަށާއި އޭނާއަކީ ހުރިހާ ބޮޑެތި ޓީމުތަކާ ދެކޮޅަށް ކުޅޭ މެޗުތަކުގައި ތަފާތު ދައްކާ ކުޅުންތެރިޔެއް ކަމަށެވެ. ހަމަ އެހެންމެ ކޮންމެ ތިން ދުވަހަކުން އޭނާ މެޗެއް ކުޅޭއިރު އިންޖަރީ ނުވެ އޭނާ ކުޅޭ ކަމަށާއި މެސީ އޭނާގެ ހަށިގަނޑު ވަރަށް ރަނގަޅަށް ގެންގުޅޭ ކަމަށް ވެސް ގާޑިއޯލާ ބުންޏެވެ.

މިފަދަ ސަބަބުތަކަކާ ހުރެ އެމްބާޕޭއަށް މެސީއާ އެއް ހަމަޔަކަށް ނާދެވޭނެ ކަމަށް ގާޑިއޯލާ ހާމަކުރިއެވެ. ގާޑިއޯލާ ވަނީ އެމްބާޕޭ އަދި މެސީ އަޅާކިޔާ ނޫސްވެރިންނާ ކުޅުންތެރިން އަދި ކޯޗުންނަށް ފާޑުކިޔާފައެވެ. އެގޮތުން މި ދެ ކުޅުންތެރިން އަޅާކިޔުމަކީ ވަރަށް ގޯސްކަމެއް ކަމަށާއި އެމްބާޕޭއާ މެސީ އަޅާކިޔޭނީ އެމްބާޕޭގެ ކެރިއަރު ނިމުމުން ކަމަށް އޭނާ ބުންޏެވެ.

މިދިޔަ ސީޒަނުގެ ޗެމްޕިއަންސް ލީގުގައި އެމްބާޕޭވަނީ ގާޑިއޯލާގެ ސިޓީއާ ދެކޮޅަށް ކުޅުނު ދެ މެޗުގައި މޮޅު ކުޅުމެއް ދައްކާ އެ ޓީމުގެ ކޮޅަށް ދެ ލަނޑު ޖަހާފައެވެ.

މިދިޔަ ސީޒަނުގައި މޮނާކޯއަށް ކުޅުނު ނަމަވެސް އެމްބާޕޭވަނީ މި ސީޒަނުގައި އެ ޓީމުގެ ވާދަވެރި ޕީއެސްޖީއަށް 180 މިލިއަން ޔޫރޯގެ ލޯނު އެއްބަސްވުމެއްގެ ދަށުން ބަދަލުވެފައެވެ. އޭނާ ވަނީ މިދިޔަ ސީޒަނުގައި މޮނާކޯއަށް ކުޅުނު 44 މެޗުގައި 26 ލަނޑު ޖަހާފައެވެ.