ރޮނާލްޑޯ އަށް 12 މެޗުގެ ސަސްޕެންޝަނެއް އައުން ގާތް!

ބާސެލޯނާ އަތުން 1-3 ގެ ނަތީޖާއިން ރެއާލް މޮޅުވި މެޗުގައި ރެފްރީ ކޮއްޕާލުމުން ކްރިސްޓިއާނޯ ރޮނާލްޑޯ އަށް 12 މެޗުގެ ސަސްޕެންޝަނެއް އައުން ގާތް ކަމަށް ރިޕޯޓްތައް ބުނެފި އެވެ.

ސްޕެނިޝް ސުޕަކަޕްގައި ހޯމަ ދުވަހުގެ ރޭ ބާސާ އަދި ރެއާލް ބައްދަލުކުރި މެޗުގެ 80 ވަނަ މިނެޓުގައި ރޮނާލްޑޯ ވަނީ ލަނޑު ޖަހާ ރެއާލް އަށް ލީޑު ނަގައިދީފައެވެ. އެ ލަނޑު ޖެހުމަށް ފަހު ރޮނާލްޑޯ ވަނީ ޖޯޒީ ބޭލުމަށް ފަހު އުފާފާޅުކޮށްފައެވެ. އެގޮތުން ރެފްރީ ވަނީ އޭނާ އަށް ރީނދޫ ކާޑެއް ދައްކާފައެވެ.

އޭގެ މިނެޓެއް ފަހުން ރޮނާލްޑޯ އަށް ރެފްރީ ވަނީ ދެވަނަ ރީނދޫ ކާޑާއެކު ރަތް ކާޑެއް ދައްކާފައެވެ. އޭނާ އަށް ރެފްރީ ރަތް ކާޑެއް ދައްކާފައިވަނީ ބާސެލޯނާގެ ޕެނަލްޓީ އޭރިޔާ ތެރެއިން ޑައިވް ކުރި ކަމަށް ބަލާފައެވެ. އެހެންނަމަވެސް ރިޕްލޭ އިން ފެންނަ ގޮތުގައި ބާސާގެ ޕެނަލްޓީ އޭރިޔާ ތެރެއިން އެޓީމުގެ އުމްޓިޓީ އާއި ރޮނާލްޑޯއާ ދެމެދު ކޮންޓެކްޓެއް ހިނގާފައިވާތަން ފެނެއެވެ.

ރެފްރީ ރަތް ކާޑު ދެއްކުމާއެކު ރޮނާލްޑޯ ވަނީ ރުޅިވެރިކަމާއެކު ރެފްރީ ކައިރިޔަށް ގޮސް އޭނާ ކޮއްޕާލާފައެވެ. ރިޕޯޓްތައް ބުނާ ގޮތުން ރެފްރީ ތައްޔާރުކުރި ރިޕޯޓުގައި ރަތް ކާޑު ދެއްކިފަހުން ރޮނާލްޑޯ އޭނާ ކޮއްޕާލި ކަމަށް ވަނީ ލިޔެފައެވެ.

ސްޕެއިންގެ ފުޓުބޯޅަ ފެޑެރޭޝަންގެ ގަވައިދު ބުނާ ގޮތުން ކުޅުންތެރިޔަކު ރެފްރީއާ އެއްވެސް ވަރަކަށް ހަމަނުޖެހުމެއް ހިންގާ ކޮއްޕާލާ އަދި ގައިގަ އައްލައިފި ނަމަ އަދަބެއްގެ ގޮތުގައި ހަތަރު މެޗާ 12 މެޗާ ދޭތެރޭގައި ސަސްޕެންޝަނެއް އަންނާނެ އެވެ.

ރޮނާލްޑޯ އަށް ސަސްޕެންޝަނެއް އަތުވެއްޖެ ނަމަ އޭނާ އަށް ގެއްލޭނީ ހަމައެކަނި ސްޕެއިންގެ މުބާރާތްތަކުގެ މެޗުތަކެވެ. އެހެންނަމަވެސް ރޮނާލްޑޯ އަށް ފިޔަވަޅު ނާޅަން ފެޑެރޭޝަނުން ނިންމައިފި ނަމަ އޭނާއަށް ގެއްލޭނީ ހަމައެކަނި ސްޕެނިޝް ސުޕަކަޕްގެ ދެވަނަ ލެގެވެ.