ވިލިމާލެ ދާއިރާގެ އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ ބައި-އިލެކްޝަން 16 މެއި ގައި
މި އިންތިޚާބު ބޭއްވުމަށް ކުރިން ހަމަޖެހިފައި އޮތީ 14 މެއި 2022 ގައި
ލޯކަލް ކައުންސިލް އިންތިހާބު 2020 ގެ ތެރެއިން- ކައުންސިލް އިންތިޚާބަށްފަހުވެސް އެކި ދާއިރާތަކުގެ ބައި އިލެކްޝަން ކުރިއަށްދޭ
ވިލިމާލެ ދާއިރާގެ އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ ބައި-އިލެކްޝަން 16 މެއި ގައި އޮންނާނެކަމަށް އިލެކްޝަންސް ކޮމިޝަން (އީސީ) އިން ބުނެފިއެވެ.
މި އިންތިޚާބު ބޭއްވުމަށް ކުރިން ހަމަޖެހިފައި އޮތީ 14 މެއި 2022 ގައެވެ. ނަމަވެސް، އެ ދުވަހު ސިޔާސީ ޕާޓީއެއްގެ އެތެރޭގެ ބޮޑު އިންތިޚާބެއް ބާއްވަން ނިންމާފައިވާތީ، އިންތިޚާބު ބާއްވައިފިނަމަ އިދާރީގޮތުން ދަތިތަކެއް ކުރިމަތި ވެދާނެކަމަށް ކޮމިޝަނަށް ފެންނަކަމަށް އީސީން ބުނެއެވެ.
މެއި މަހުގެ 14 ވަނަ ދުވަހަކީ ވެރިކަން ކުރާ މައި ޕާޓީ އެމްޑީޕީގެ ޗެއަރޕަރސަން ހޮވުމަށް ބާއްވާ އިންތިޚާބު އޮންނަ ދުވަހެވެ. އެމްޑީޕީގެ އެތެރޭގެ އިންތިޚާބު މީގެ ކުރިން ބޭއްވުމަށް ނިންމީ އެޕްރީލް މަހުގެ 16 ވަނަ ދުވަހުއެވެ. ނަމަވެސް ރަމަޟާން މަހުގެ ތެރޭގައި އިންތިޚާބު ބާއްވަން ޖެހޭތީ ގައުމީ މަޖިލީހުގެ އަޣްލަބިއްޔަތުން ވަނީ އިންތިޚާބު 14 މެއިއަށް ފަސް ކޮށްފައެވެ.
އެހެންކަމުން އީސީން ވަނީ ވިލިމާލެ ދާއިރާގެ އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ ބައި-އިލެކްޝަން ބާއްވާ ތާރީޚް 16 މެއި 2022 ވާ ހޯމަ ދުވަހަށް ބަދަލު ކޮށްފައެވެ.
މި އިންތިޚާބު ބާއްވަނީ ހުޅުމާލޭގައި ހިނގި ނުރައްކާތެރި އެކްސިޑެންޓެއްގައި މާލެ ސިޓީ ވިލިމާލެ ދާއިރާގެ އަންހެނުންގެ ތަރައްގީއަށް މަސައްކަތްކުރާ ކޮމިޓީގެ މެމްބަރު އައިމިނަތު އީމާން ނިޔާވުމާއި ގުޅިގެންނެވެ.
ހުޅުމާލޭގައި ހިނގި ނުރައްކާތެރި އެކްސިޑެންޓެއްގައި ފަރުވާ ހޯދަމުން ދަނިކޮށް އީމާން ނިޔާވެފައިވަނީ މާރޗު މަހުގެ 1ވަނަ ދުވަހު ހެނދުނު ގެ ވަގުތެއްގައެވެ. ޢުމުރުން 29 އަހަރުގެ އީމާން އެކްސިޑެންޓްވީ ހުޅުމާލޭ ކުރެދިމާ ހިނގުމުން ސައިކަލުގައި ދުއްވާފައި ދަނިކޮށް ވެއްޓިގެންނެވެ.
