ދުނިޔޭގެ ކޮވިޑް ޕޮޒިޓިވް ކޭސްތަކުގެ އަދަދު 490 މިލިއަނަށް
491,352,180 މީހުން ވަނީ ދުނިޔޭގެ އެކި ގައުމުތަކުން ކޮވިޑް-19ށް ޕޮޒިޓިވްވެގެން ރިޕޯޓުކޮށްފައި
ދެކުނު އެފްރިކާގައި ކޮވިޑް-19 ވެކްސިން ދޭ ސެންޓަރެއް
މުޅި ދުނިޔެއިން ރިޕޯޓުކޮށްފައިވާ ކޮވިޑް-19 ކޭސްތަކުގެ އަދަދު 490 މިލިއަނަށް އަރައިފިއެވެ.
ޖޯން ހޮޕްސްކިން ޔުނިވާސިޓީން ހޯމަ ދުވަހު އާންމުކޮށްފައިވާ ތަފާސްހިސާބުތައް ދައްކާގޮތުން 491,352,180 މީހުން ވަނީ ދުނިޔޭގެ އެކި ގައުމުތަކުން ކޮވިޑް-19ށް ޕޮޒިޓިވްވެގެން ރިޕޯޓުކޮށްފައެވެ. މީގެތެރެއިންވެސް އެންމެ ގިނަ އަދަދެއްގެ ބަޔަކު ކޮވިޑަށް ޕޮޒިޓިވްވެފައި ވަނީ އެމެރިކާއިންނެވެ. އެގައުމުން 81,832,612 މީހުން ކޮވިޑަށް ޕޮޒިޓިވްވެފައިވާ ކަމަށް ރިޕޯޓުކޮށްފައިވާއިރު، ދެވަނަ އަށް އެންމެ ގިނަ އަދަދެއްގެ މީހުން ޕޮޒިޓިވްވެފައިވާ އިންޑިއާއިން 43,028,863 މީހުން ވަނީ ކޮވިޑަށް ޕޮޒިޓިވްވެފައެވެ.
ތަފާސްހިސާބުތައް ދައްކާގޮތުން މިހާތަނަށް 6,152,703 މީހުން ވަނީ ކޮވިޑް ބަލީގައި މަރުވެފައެވެ.
ދުނިޔޭގެ ސިއްހަތު ޖަމިއްޔާއިން އާންމުކޮށްފައިވާ މައުލޫމާތުތައް ދައްކާގޮތުން މާޗު 21ން މާޗު 27 އާދެމެދު ކޮވިޑަށް ޕޮޒިޓިވްވި މީހުންގެ އަދަދު ވަނީ އޭގެ ކުރީ ހަފުތާތަކާ އަޅާބަލާއިރު 14 އިންސައްތަ ދަށަށް ގޮސްފައެވެ.
މީގެ އިތުރުން ކޮވިޑް-19ގެ އައު ވޭރިއަންޓެއް ފެނިފައިވާ އިރު، މި ވޭރިއަންޓަކީ އޮމިކްރޮން ވޭރިއަންޓަށްވުރެ ފަސޭހައިން ގައިންގަޔަށް އަރާ ވޭރިއަންޓެއް ކަމަށް ސިއްހަތު ޖަމިއްޔާއިން ބުނެއެވެ.
މިހާރު އެންމެ ގިނައިން ކޮވިޑަށް ޕޮޒިޓިވްވާ ގައުމުތަކުގެ ތެރޭގައި ހިމެނެނީ ޗައިނާ، އިނގިރޭސިވިލާތް، ޖަރމަނީ އަދި ދެކުނު ކޮރިއާ އާއި ފްރާންސްއެވެ.
