އެމްއެމްޕީއާރުސީން ރާއްޖެ އިސްތިހާރުކުރުމަށް، އަސްޓާއާ ގުޅިގެން ކެމްޕެއިނެއް ފަށައިފި

އެމެރިކަން ސޮސައިޓީ އޮފް ޓްރެވެލް އެޑްވައިޒަރސް (އަސްޓާ)އާ ގުޅިގެން އެމެރިކާ މާކެޓުގައި ދިވެހިރާއްޖެ އިޝްތިހާރުކުރުމަށް, މޯލްޑިވްސް މާކެޓިންގ އެންޑް ޕަބްލިކް ރިލޭޝަން ކޯޕަރޭޝަން (އެމްއެމްޕީއާރުސީ)ން މާކެޓިންގ ކެމްޕެއިނެއް ފަށައިފިއެވެ.

މި އަހަރުގެ މާރޗް މަހު ފެށުނު, އެއް އަހަރު ދުވަހުގެ މުއްދަތައް ކުރިއަށްގެންދާ މި ކެމްޕެއިނުގައި އަސްޓާ ވޯރލްޑްވައިޑް ޑެސްޓިނޭޝަން ގައިޑްގައި ދިވެހިރާއްޖެ އިޝްތިހާރުކުރާނެއެވެ. މިފޮތަކީ ދުނިޔޭގެ އެންމެ މަގުބޫލު ފަތުރުވެރިކަމުގެ މަންޒިލްތަކާބެހޭ އެންމެ ފަހުގެ މައުލޫމާތު ހިމެނޭ އެނުއަލް ފޮތެކެވެ.

އެމެރިކާ މާކެޓުގައި ހަރަކާތްތެރިވާ ޓްރެވެލް އެޖެންޓުންނަށް ޚާއްސަކޮށްގެން ދިވެހިރާއްޖެ ޓުއަރިސްޓް ޑެސްޓިނޭޝަނެއްގެ ގޮތުގައި ވިއްކުމަށްބޭނުންވާ ހުރިހާ މައުލޫމާތެއް މި ފޮތުން ލިބޭނެއެވެ. ދިވެހިރާއްޖެއަށް ދަތުރުކުރުމަށް އެންމެ ރަނގަޅު ދުވަސްވަރުގެ އިތުރުން, ދިވެހިރާއްޖެއަކީ އެންމެ މަގުބޫލު އެއް މަންޒިލަށްވާ ސަބަބުތަކާއި, އަދިވެސް ބޭނުންތެރި ތަފާތު މައުލޫމާތު އަސްޓާ ވޯރލްޑްވައިޑް ޑެސްޓިނޭޝަން ގައިޑްއިން އެޖެންޓުންނަށް ލިބޭނެއެވެ. މީގެ އިތުރުން ދިވެހިރާއްޖޭގެ ފަތުރުވެރިކަމުގެ ޕްރޮޑަކްޓްތައް (ރިޒޯޓް, ގެސްޓްހައުސް, ލިވަބޯޑް, ހޮޓެލް) އަދި ރާއްޖެއިން ކުރެވެންހުންނަ ތަފާތު ތަޖުރިބާތަކާ ބެހޭ މައުލޫމާތުވެސް މި ފޮތުން ލިބޭނެއެވެ.

ދިވެހިރާއްޖޭގައި އަޅާފައިވާ ސަލާމަތީ ފިޔަވަޅުތަކާއި ރާއްޖޭގެ ރަށްތަކަކީ ގުދުރަތީގޮތުން ވަކިރަށްތަކެއްގެ ގޮތުގައި އުފެދިފައިވާ މަންޒިލަކަށް ވުމުން ރާއްޖެއަކީ މި ދަނޑިވަޅުގައި ދަތުރުފަތުރުކުރަން އެންމެ ރައްކާތެރި އެއް މަންޒިލްކަން މި ފޮތުގައި އިޝްތިހާރުކުރެވޭނެއެވެ. ލަފާކުރާގޮތުގައި މި ފޮތުގެ ޕްރިންޓް އެޑިޝަން 55,000 ފަރާތަށް ފޯރާނެއެވެ. އަދި ޑިޖިޓަލް އެޑިޝަން 20,000 އަސްޓާ މެމްބަރުންނަށް އީމެއިލްގެ ޒަރިއްޔާއިން ފޮނުވޭނެއެވެ.

2021 ވަނަ އަހަރު އެމެރިކާ މާކެޓްއިން ވަނީ ދިވެހިރާއްޖެއަށް 54,745 ފަތުރުވެރިން ޒިޔާރަތްކޮށްފައެވެ. މިދިޔައަހަރު މި މާރކެޓަކީ 5 ވަނައަށް އެންމެ ގިނައިން ދިވެހިރާއްޖެއަށް ފަތުރުވެރިން ޒިޔާރަތްކޮށްފައިވާ މާރކެޓެވެ. ދިވެހިރާއްޖޭގެ ފަތުރުވެރިކަމުގެ ދާއިރާ އިޔާދަ ކުރުމުގައި އެމެރިކާ މާރކެޓުން ވަރަށް މުހިންމު ރޯލެއް އަދާކުރެއެވެ. 2022 ވަނަ އަހަރުގެ ޖަނަވަރީމަހުގެ ނިޔަލަށް އެމެރިކާ މާރކެޓުން 5,028 ފަތުރުވެރިންވަނީ ރާއްޖެއަށް ޒިޔާރަތްކޮށްފައެވެ. މިހާތަނަށް ޖުމްލަ 229,027 ފަތުރުވެރިން މި އަހަރު ދިވެހިރާާާއްޖެއަށް ޒިޔާރަތްކޮށްފައިވެއެވެ.

އެމެރިކާ މާރކެޓުގައި ދިވެހިރާއްޖެ އިޝްތިހާރުކުރުމަށް ގިނަ ހަރަކާތްތަކެއް ކުރިއަށްގެންދިއުމަށްވަނީ ހަމަޖެހިފައެވެ. މީގެ ތެރޭގައި ޑެސްޓިނޭޝަން ޓްރެއިނިންގތަކާއި, ވެބިނާތަކާއި, ފެމިލިއަރައިޒޭޝަން ޓްރިޕްތަކާއި އަދި ރޯޑްޝޯތައް ހިމެނެއެވެ. މީގެ އިތުރުން ވަރޗުއަލް ހަރަކާތްތައް ހިންގުމާއި، މި އަހަރު އޭ.ޓީ.ޓީ.އޭ އެލެވޭޓް ނޯތު އެމެރިކަން ކޮންފަރެންސް އަދި އުސްޓޯއާ އެނުއަލް ކޮންފަރެންސްގައި ބައިވެރިވުން ހިމެނެއެވެ.

ދުނިޔޭގެ ފެންވަރުގައި ރާއްޖެ އިޝްތިހާރުކުރުމުގެ ޒިންމާ އުފުލާ ކުންފުނީގެ ހައިސިއްޔަތުން އެމްއެމްޕީއާރްސީން ވޭތުވެދިޔަ އަހަރު ކޮށްފައިވާ މަސައްކަތްތަކަށް ބަލާއިރު، އިންޑަސްޓްރީގެ ޕާރޓްނަރުންނާއެކު 22 މާރކެޓެއްގައި 260 ހަރަކާތް ވަނީ ހިންގާފައެވެ. މީގެތެރޭގައި ފެއަރތަކާއި އެގްޒިބިޝަންތަކުގައި ބައިވެރިވުމުގެ އިތުރުން، އެކި ގައުމުތަކުގައި ރޯޑްޝޯތައް ވެސް ވަނީ ބާއްވާފައެވެ. އަދި ވެބިނާތަކާއި، ފެމިލަރައިޒޭޝަން ދަތުރުތަކުގެ އިތުރުން މާކެޓިން ކެމްޕެއިންތައް ވަނީ ހިންގާފައެވެ. ދުނިޔޭގެ ހުރިހާ ކަންކޮޅެއްގައިވެސް ރާއްޖެއަކީ ފަތުރުވެރިންގެ އިތުބާރު ލިބިފައިވާ މަންޒިލެއްކަމަށް ހެކިވާ އެންމެ އަލިގަދަ ނިޝާނަކަށް ވެގެންދިޔައީ، 'ވޯލްޑް ޓްރެވަލް އެވޯރޑްސް' (ޑަބްލިއުޓީއޭ) 2021ގައި 'ވޯލްޑްސް ލީޑިންގް ޑެސްޓިނޭޝަން'ގެ ލަގަބު ޖެހިޖެހިގެން ދެވަނަ އަހަރަށް ރާއްޖެއަށް ކާމިޔާބު ކުރެވުނުކަމެވެ. މީގެ އިތުރުންވެސް ދިވެހިރާއްޖެއިން ވަނީ ޑަބްލިއުޓީއޭ 2021ގައި އެތައް ޚާއްސަ އެވޯޑްތަކެއް ހާސިލްކޮށްފައެވެ.

ކުރިޔަށް މިދާ އަހަރަކީ ދިވެހިރާއްޖޭގެ ފަތުރުވެރިކަމުގެ ތާރީޚުގައި ވަރަށް ޚާއްސަ އަހަރެކެވެ. ރާއްޖޭގެ ފަތުރުވެރިކަމަށް 50 އަހަރު ފުރުން ފާހަގަކުރުމުގެ ޚާއްސަ ހަރަކާތްތައް މިދިޔަ އަހަރު ފަށައިގަތީ ކުލަގަދަ ހަރަކާތްތަަކަކާ އެކުގައެވެ. އެމްއެމްޕީއާރްސީގެ ފަރާތުން ރާއްޖޭގެ ޓޫރިޒަމްގެ ރަން ޔޫބީލް ފާހަގަކުރުމަށް އެތައް ހަރަކާތްތަކެއް ތާވަލް ކޮށްފައިވެއެވެ. މީގެ ތެރޭގައި، 2022ވަނަ އަހަރުގެ ފުރަތަމަ ކުއާރޓަރގައި އެކަނިވެސް 60 އިން-ޕާރސަން ހަރަކާތް ބޭއްވުމަށް ހަމަޖެހިފައިވެއެވެ. މީގެ ތެރޭގައި 11 ފެއަރއާއި ރޯޑްޝޯތަކާއި އެހެނިހެން ހަރަކާތްތައް ފާހަގަކޮށްލެވެއެވެ.