ރާއްޖޭގެ ގިނަ ރިސޯޓްތައް ނުހެދި އޮތީ އެތަން ހެދުމަށް ބޭނުންވާ ފައިސާ ނެތިގެން ކަމަށް ޓޫރިޒަމް މިނިސްޓަރު އަބްދުﷲ މައުސޫމް ވިދާޅުވެއްޖެއެވެ.
މިނިސްޓަރު މައުސޫމް މިހެން ވިދާޅުވީ، ރިސޯޓްތައް ތަރައްގީކުރުމަށް ހަވާލުކޮށްފައިވާ ރަށްތައް ނުހެދި ލަސްވަމުންދާ ދިޔުމާއި ގުޅޭ ގޮތުން ރައްޔިތުންގެ މަޖިލީހުގައި މެމްބަރުން ކުރެއްވި ސުވާލުތަކަށް ޖަވާބު ދެއްވަމުންނެވެ. މިނިސްޓަރު ވިދާޅުވީ، ދިވެހިންނަށް ރިސޯޓްތައް އަމިއްލަ ނުކުރެވި ދަނީވެސް ރާއްޖޭގައި ދިވެހިންނަށް ފަންޑު ނުލިބޭތީ ކަމަށެވެ. މިނިސްޓަރު ވިދާޅުވީ ރާއްޖެއިން ދިވެހިންނަށް ފަނޑު ހޯދައި ދިނުމުގެ މަގު ފަހިވެގެން ހިނގައްޖެ ނަމަ މިކަމަށް ހައްލު ލިބިގެންދާނެ ކަމަށެވެ.
ބޭރުން އަންނަ އިންވެސްޓަރުންވެސް އަންނަނީ އެމީހުންގެ އަމިއްލަ ފައިސާ ހިފައިގެން ނޫން ކަމަށާއި، އެމީހުންވެސް ފަންޑު ހޯދަނީ ބޭރުގެ ކޮންމެވެސް ބޭންކަމުން ކަމަށް މިނިސްޓަރު ވިދާޅުވިއެވެ. ދިވެހިންނަށްވެސް އެފަދަ ފުރުސަތު ފަހިވެއްޖެ ނަަމަ މިކަމަށް ހައްލު ލިބިގެންދާނެ ކަން މިނިސްޓަރު ފާހަގަކުރެއްވިއެވެ.
ފަތުރުވެރިކަމުގެ ބާރުތައް އަމިއްލަ ކުރެވި ހުރިހާ ކަމެއް ދިވެހިންގެ އަތަށް ފުރޮޅާލެވޭނީ މިފަދަ ކަންކަމަށް ޖާގަ ދީގެން ކަމަށް މިނިސްޓަރު ވިދާޅުވިއެވެ.
ރާއްޖޭގެ ގިނަ ރިސޯޓްތައް ނުހެދި އޮތީ ހަމަ ހަދާނެ ލާރި ނެތިގެން. ރާއްޖޭގައި ދިވެހިންނަށް ރިސޯޓް އޯނަރޝިޕް ލިބުން މަދުވެގެންމިދަނީ ރާއްޖޭގައި ފަންޑު ނުލިބިގެން.އަބްދުﷲ މައުސޫމް / ޓޫރިޒަމް މިނިސްޓަރު
ރާއްޖޭގައި މިހާރުވެސް 83 ރަށް ރިސޯޓުގެ ގޮތުގައި ތަރައްގީ ކުރުމަށް ދޫކުރެވި ނުހެދިވާކަމަށް މިނިސްޓަރުގެ ވާހަކަފުޅުގައި ވަނީ ފާހަގަކުރައްވާފައެވެ.
