އައްޑޫ ސިޓީގެ 6 އަހަރުގެ ކުއްޖަކަށް ޖިންސީގޯނާކުރި މައްސަލަ މަޖިލީހުން ބަލަނީ
ޖިންސީގޯނާކުރިކަމުގެ ތުހުމަތުގައި ހައްޔަރުކުރީ އުމުރުން 59 އަހަރުގެ އަންހެނެއް
ޖިންސީ ގޯނާގެ އަނިޔާ
އައްޑޫ ސިޓީ ހިތަދޫގައި 6 އަހަރުގެ އަންހެން ކުއްޖަކަށް ޖިންސީ ގޯނާކުރި މައްސަލަ، ރައްޔިތުންގެ މަޖިލީހުގެ ހިއުމަން ރައިޓްސް އެންޑް ޖެންޑާ ކޮމިޓީން ބެލުމަަށް ނިންމައިފިއެވެ.
މި މައްސަލަ އެ ކޮމިޓީން ބަލައިދިނުމަށް އެދިވަޑައިގަތީ ބަލައިދިނުމަށް އައްޑޫ މީދޫ ދާއިރާގެ މެމްބަރު ރޮޒައިނާ އާދަމެވެ. ރޮޒައިނާ ވިދާޅުވީ، މައްސަލައާ ގުޅުންހުރި ވާހަކަތައް އެކި ގޮތްގޮތަށް ދެކެވޭތީ, ކަމާބެހޭ އިދާރާތަކުން މި ކަމުގެ ހަގީގަތް އޮޅުން ފިލުވުމަށް މަޖިލީހުގެ ހިއުމަން ރައިޓްސް ކޮމިޓީގެ ބައްދަލުވުމެއް މާދަމާ ބާއްވައިދިނުމަށް އެދިފައިވާނެކަމަށެވެ. އަދި ބައްދަދަލުވުން ބާއްވައިދެއްވާނެކަމުގެ ޔަގީންކަން ކޮމިޓީގެ ޗެއަރ އަދި ހިންނަވަރު ދާއިރާގެ މެމްބަރު ޖީހާން މަހުމޫދު ދެއްވާފައިވާކަމަށެވެ.
ރޮޒެއިނާ ވިދާޅުވީ މިކަމުގެ ހައްސާސްކަމުން, ކަމާބެހޭ އިދާރާތައް މަޖިލީހަށް ވަޑައިގެން މައުލޫމާތު ދެއްވައި ރައްޔިތުންގެ ހުރި ކަންބޮޑުވުންތަކަށް ވަގުތުން ޖަވާބު ލިބުން ވަރަށް މުހިއްމުކަމަށް ދެކެވަޑައިގަންނަވާ ކަމަށެވެ.
އެ ކުއްޖާއަށް ޖިންސީގޯނާކުރިކަމުގެ ތުހުމަތުގައި ހައްޔަރުކުރީ އުމުރުން 59 އަހަރުގެ އަންހެނެކެވެ. އޭނާއަކީ އެރަށު ސުކޫލްގައި މަސައްކަތު މީހެއްގެ ވަޒީފާ އަދާކުރާ މީހެކެވެ. އޭނާ ޝަރީއަތުން ވަކި ގޮތެއް ނިންމަންދެން ބަންދުގައި ބެހެއްޓުމަށް ކޯޓުން ވަނީ އަމުރުކޮށްފައެވެ.
ޖިންސީގޯނާކުރިކަމަށް ތުހުމަތުކުރެވޭ އެކުއްޖާގެ ކާފަ ހައްޔަރު ނުކޮށް، ކުށެއް ނެތް މީހަކަށް ޖަލުގައި އަނިޔާދެމުންދާކަމަށް ބުނެ ހިތަދޫގައި އަންނަނީ މުޒާހަރާވެސް ކުރަމުންނެވެ.
މީގެ އިތުރުން، އެ މައްސަލަ ސީރިއަސް މައްސަލައެއްގެ ގޮތުގައި ބަލައި އެކަމުގައި ޝާމިލުވާ އެންމެންގެ މައްސަލަތައް ވަކިވަކިން ތަހުގީގު ކޮށްދިނުމަށް އައްޑޫ ސިޓީ ކައުންސިލުން ވަނީ ގޮވާލާފައެވެ. މި މައްސަލާގައި ފުލުހުން ބުނެފައިވަނީ، އިތުރަށް ބަލަން ޖެހޭ ކަންކަން ބެލުމާއި މައްސަލައާގުޅޭ ހެކި ހޯދުމުގެ މަސައްކަތާއި އިތުރު މީހެއްގެ ބައިވެރިވުން އެކަމުގައި އޮތްތޯ ބެލުމުގެ މަސައްކަތް ކުރަމުންދާ ކަމަށެވެ. ކުއްޖާއަށް ޖިންސީ އަނިޔާއެއް ލިބިފައިވޭތޯ ބަލަން މެޑިކަލް އެސެސްމަންޓް ހަދާފައިވާ ކަމަށާއި، ތަހުގީގަށް ބޭނުންވާ, ކުއްޖާގެ ނަފްސާނީ ހާލަތާ ގުޅޭ އެެސެސްމަންޓާއި, ކުއްޖާއަށް ބޭނުންވާ ރައްކާތެރިކަން ފޯރުކޮށްދިނުމަށް ކުރަންޖެހޭ މަސައްކަތް ކުރަމުން އަންނަކަމަށްވެސް ފުލުހުން ބުނެއެވެ.
