ހިޔާ ސަރަހައްދުގައި ގަވާއިދާ ޚިލާފަށް ކާބޯތަކެތި ވިއްކުން މަނާކުރުން
އެ ސަރަހައްދުގައި އުޅޭ އާންމު ރައްޔިތުންނަށް ބޭނުންވާ ޒަރޫރީ ބޭނުންތަަކަށް ޚާއްސަކޮށްގެން ޕްލޮޓްތައް އަންނަނީ ދޫކުރަމުން
ހިޔާ ފްލެޓް ސަރަހައްދުގައި ބައެއް ފަރާތްތަކުން އަންނަނީ މޭޒު ބަހައްޓައިގެން ކާބޯތަކެތި ވިއްކަމުން
ހިޔާ ސަރަހައްދުގައި ގަވާއިދާޚިލާފަށް ކާބޯތަކެތި ވިއްކުން އެޗްޑީސީން މަނާކޮށްފިއެވެ.
މިކަން މަނާކޮށް އެޗްޑީސީން ނެރުނު ބަޔާނުގައި ވަނީ، އެތަނުގައި ކާބޯތަކެތި ވިއްކަމުން އަންނަނީ އިދާރާތަކުން ނަގަން ޖެހޭ ހުއްދަ ނުނަގައި، ގަވާއިދާޚިލާފަށް ކަމަށެވެ. އެހެންކަމުން މިހާރު އެ ސަރަހައްދުގައި މިފަދަ ޚިދުމަތް ދިނުމަށް ބަހައްޓާފައި ހުރި ތަކެތި, ކުރިއަށް އޮތް އެއް ހަފުތާގެ ތެރޭގައި ނެގުމަށް ވަނީ އަންގާފައެވެ. އަދި އެޕްރީލް މަހުގެ 10ވަނަ ދުވަހުގެ ފަހުން, ކާބޯޯތަކެތި ވިއްކުމަށް ބަހައްޓާފައި ހުންނަ ތަންތަން އެ ކޯޕަރޭޝަނުން ނަގާނެކަމަށް ވަނީ ބުނެފައެވެ. އެޗްޑީސީން ނެރެފައިވާ އުސޫލާ ޚިލާފަށް އަމަލުކުރާ މީހުންނާމެދު ފިޔަވަޅުއަޅާނެ ކަމަށްވެސް އެ އިދާރާއިން ވަނީ ބުނެފައެވެ.
އެ ސަރަހައްދަކީ ކޮންސްޓްރަކްޝަން ސައިޓުތައް ގިނަ ސަރަހައްދެއް ކަމުން ކާބޯތަކެތި ގެންގުޅުމުގައި ހުންނަންޖެހޭ ރައްކާތެރިކަމުގެ މިންގަނޑަށް ހުރަސްއެޅޭ ކަމަށެވެ. އެހެންކަމުން ކާބޯތަކެތީގެ ޚިދުމަތް ދިނުމުގައި ހުންނަންޖެހޭ ސާފުތާހިރުކަމުގެ މިންގަނޑު ދަށްވެފައި، ބަލިމަޑުކަމެއް ކަމެއް ފެތުރިދާނެ ކަމުގެ ޝަކުވާ އެޗްޑީސީއަށް ލިބެމުން އަންނަ ކަމަށެވެ.
ހިޔާ ފްލެޓްގައި ވިޔާފާރިއަށް ޚާއްސަކޮށްފައިވާ ޕްލޮޓްތައް އެޗްޑީސީން އަންނަނީ ދޫކުރަމުންނެވެ. މިހާރު އެ ސަރަހައްދުގައި ބައެއް ފިހާރަތައް ހުރިއިރު، ލޯކަލް މާރުކޭޓެއްގެ ޚިދުމަތްވެސް ދިނުމަށް އަންނަނީ ތައްޔާރުވަމުންނެވެ. މީގެ އިތުރުވެސް އެ ސަރަހައްދުގައި އުޅޭ އާންމު ރައްޔިތުންނަށް ބޭނުންވާ ޒަރޫރީ ބޭނުންތަަކަށް ޚާއްސަކޮށްގެން ޕްލޮޓްތައް އަންނަނީ ދޫކުރަމުންނެވެ.
