އެއްވަނާގައި އޮތް ސިޓީއާއި، ދެވަނާގައި އޮތް ލިވަޕޫލްވެސް މޮޅު

އިނގިރޭސި ޕްރިމިއަރ ލީގު ތާވަލްގެ އެއްވަނާގައި އޮތް މެންޗެސްޓަރ ސިޓީއާއި ދެވަނާގައި އޮތް ލިވަޕޫލްވެސް އިންޓަރނޭޝަނަލް ބްރޭކަށްފަހު އެނބުރި އައިސް ކުޅުނު ފުރަތަމަ މެޗު ކާމިޔާބުކޮށްފިއެވެ. ލިވަޕޫލް މެޗު ކާމިޔާބުކުރީ ވަޓްފޯޑާއި ވާދަކޮށް 2-0 ނެވެ. 22 ވަނަ މިނިޓްގައި ފުރަތަމަ ލަނޑު ޖަހާ ކުރި ހޯދައިދިނީ ޖޮޓާއެވެ. މެޗު ނިމެން މިނިޓަކަށް ވެފައިވަނިކޮށް ދެވަނަ ލަނޑު ޖެހީ ޕެނަލްޓީއަކުން ފަބީނިއޯއެވެ.

ވަޓްފޯޑަކީ ރެލިގޭޝަނުން ސަލާމަތްވުމަށް ހަނގުރާމަ ކުރަމުންދާ ޓީމެކެވެ. މެޗުން މޮޅުވެ ލިވަޕޫލުން ތާވަލްގެ އެއްވަނައަށް ޖެހިލިއެވެ.

އެކަމަކު އޭގެ އިރުކޮޅެއް ފަހުން ސިޓީން ވަނީ މެޗުން މޮޅުވެ އަލުން އެއްވަނަ މަޤާމަށް ޖެހިލާފައެވެ. އެއީ 2-0 ން ބާންލީ ބަލިކޮށްގެންނެވެ. ސިޓީން ލީޑް ނެގީ ކެވިން ޑި ބުރައިނާ ޖެހި ލަނޑުންނެވެ. ފުރަތަމަ ހާފްގެ 25 ވަނަ މިނިޓްގައި ދެވަމަ ލަނޑު ޖެހީ ގުންޑޮގާންއެވެ. ދެ ލަނޑު ޖަހަންވެސް ފުރުޞަތު ތަނަވަސްކޮށްދިނީ ސްޓާލިންގއެވެ. މިނަތީޖާގެ ސަބަބުން ސިޓީއާއި ލިވަޕޫލާ ދެމެދު އޮތީ ޕޮއިންޓެއްގެ ފަރަޤެކެވެ.