އިނގިރޭސި ޕްރިމިއަރ ލީގުގައި ޗެލްސީއާއި ވާދަކުރި މެޗުގައި ފަހަތުން އަރާ ބްރެންޓްފޯޑުން ބޮޑު މޮޅެއް ހޯދައިފިއެވެ.

ޗެލްސީގެ ދަނޑުގައި ހޮނިހިރު ދުވަހު ކުޅުނު މި މެޗުން ބްރެންޓްފޯޑް ކުރިހޯދީ 4-1 ގެ ނަތީޖާއަކުންނެވެ. މި މެޗުގައި ފުރަތަމަ ލީޑު ނެގީ ޗެލްސީއިންނެވެ. ދެވަނަ ހާފު ފެށިގެން މާ ގިނައިރެއް ނުވަނީސް އޭރިއާ ބޭރުން ފޮނުވާލި ބާރު ހަމަލާ ގޯލުގެ ކަނަކަށް ފޮނުވާލައިގެން ޗެލްސީއަށް ލީޑު ނަގައިދިނީ އެންޓޯނިއޯ ރުޑިގާއެވެ.

އޭގެ ދެމިނެޓު ފަހުން ބްރެންޓްފޯޑަށް ނަތީޖާ ހަމަހަމަ ކޮށްދިނީ ވިޓަލީ ޖަނޭޓްއެވެ. މި މެޗުގައި އޭނާ ދެލަނޑު ޖެހިއެވެ. ބްރެންޓްފޯޑަށް ލީޑު ނަގައިދިން ލަނޑު ކާމިޔާބު ކޮށްދިނީ ޑެންމާކުގެ ކްރިސްޓެން އެރިކްސަންއެވެ. ޔޫރޯ 2020 ގައި ހާޓްއެޓޭކެއް ޖެހިގެން ކުޅުމާއި ދުރުގައި ހުރުމަށްފަހު އޭނާ އަންނަނީ އަލުން ކުޅުން ފަށައިގެން ރަނގަޅު ކުޅުމެއް ދައްކަމުންނެވެ. ބްރެންޓްފޯޑުގެ ފަހު ލަނޑަކީ ޔޯނޭ ވިސާ ކާމިޔާބުކޮށްދިން ލަނޑެކެވެ.

މި ނަތީޖާއާއެކު ބްރެންޓްފޯޑު ވަނީ ތާވަލުގެ 14 ވަނައަށް ޖެހިލާފައެވެ. ޗެލްސީ އޮތީ 59 ޕޮއިންޓާއެކު ތާވަލުގެ ތިންވަނައިގައެވެ.

ލީގުގައި ހޮނިހިރު ދުވަހު ކުޅުނު އެހެން މެޗުތަކަށް ބަލާއިރު، ވަޓްފޯޑް އަތުން ލިވަޕޫލް މޮޅުވީ 2-0 ގެ ނަތީޖާ އަކުންނެވެ. ބާންލޭއާއި ވާދަކޮށް މެންޗެސްޓަރ ސިޓީއިންވެސް ކުރިހޯދީ މި ނަތީޖާއިންނެވެ. ބްރިޓަން އާއި ނޯވިޗް ސިޓީ ބައްދަލުކުރި މެޗު އެއްވެސް ޓީމަކަށް ލަނޑެއް ނުޖެހި އެއްވަރުވިއިރު، ލީޑްސް އާއި ސައުތެމްޕްޓަން ބައްދަލުކުރި މެޗު ނިމުނީ 1-1 ން އެއްވަރު ވެގެންނެވެ. އެސްޓަން ވިލާގެ މައްޗަށް ވޮލްވްސްއިން ކުރިހޯދީ 2-1 ގެ ނަތީޖާއަކުންނެވެ.