ރޯދަ މަހުގެ ފުރަތަމަ ދުވަހެވެ. ސައިކަލުގައި ޑިއުޓީއަށް ދިޔަ މަގުމަތީގައި، ބާރު ސްޕީޑެއްގައި ދުއްވާފައި އައި ކާރެއް އާދަނުގެ ސައިކަލުގައި ނުޖެހި ދިޔައީ ހަމަ ކިރިޔާއެވެ. މަގު މެދުގައި މަޑުކޮށްގެން ހުރެ އާދަނު އަޑުގައި ނެތްތަނަށް ހަޅޭއްލަވަން ފެށިއެވެ. "މިއީ ރޯދަމަހޭ، މަގޭ ގާތަށް ރުޅި ނާރުވާށޭ" ކިޔަމުންނެވެ.
އާދަނު އޮފީހަށް ގޮސް ވަތްތަނާ އޮފީހުގައި އުޅޭ އަހުމަދު އައިސް ވާހަކަ ދައްކަން ފެށުމުންވެސް އާދަނުހުރީ އެ ރުޅި މޫނުގައި ޒާތެއްގެ ފޫއްސެއް ވެފައެވެ. އަހުމަދު ވާހަކަ ދައްކަން ފެށުމުން، "މިއީ ރޯދަމަހޭ، މަށާ މާގިނައިން ވާހަކަ ނުދައްކާށޭ" ބުންޏެވެ. އޭރު އެ އޮފީހުގައި އުޅޭ އައިޝާ ތެޅެމުންފޮޅެމުން އައިސް އޮފީހަށް ވަންނަނީއެވެ. އޭނާ މާ ލަހުން އައީ ކީއްވެތޯ އޮފީސް ކުދިން ސުވާލު ކުރުމުން "އެއީ ރޯދަ ތަންކޮޅޭ" ކިޔައި އެ ވާހަކަ ނިންމާލިއެވެ.
އާދަނު އޮފީސް ނިންމާފައި ދިޔައީ ގެއަށެވެ. ގެއަށް ދިޔަތަނާ މަންމަ ބުނީ ކައިރީ ފިހާރައަށް ގޮސް ލޮނު ޕެކެޓެއް ގަނެދިނުމަށެވެ. ނަމަވެސް އާދަނު ދިން ޖަވާބަކީ، "މިހުރީ ރޯދައަށޭ، ގައިގައި އެއްވެސް ވަރެއް ނެތޭ"އެވެ. ކޮންމެއަކަސް ލޮނުޕެކެޓު ގަންނަން ދިޔައީ ގޭގައި އުޅޭ މަރިޔަނބެވެ.
މަރިޔަނބު ލޮނުޕެކެޓު ގަނެގެން ގެޔަށް އައިއިރު މަންމަ ދިން ފައިސާގެ ބާކީ ގެންނަން އޭނާގެ ހަނދާނުގައެއް ނެތެވެ. މަންމަ އެހެން އެހުމުން، "އެވަރުކަމެއް ވެދާނެ ނޫންހޭ، އެއީ ރޯދަ ތަންކޮޅޭ" ބުނެ މަރިޔަނބުވެސް އެ ވާހަކަ ނިންމާލިއެވެ.
މިއީ މިއަދު މުޖުތަމައުން އާންމުކޮށް ފެންނަ އަދި އިވޭ މަންޒަރުތަކެކެވެ. ރޯދަ މަހަކީ ރުޅިއާއި ނުތަނަވަސްކަން އެއާ ގުޅި ލާމެހިފައިވާ މަހެއްކަމަށް ބައެއް ފަރާތްތަކަށް އޮންނަނީ ގަބޫލުކުރެވިފައެވެ. ރޯދަމަސް ފެށެނީ ކަމަށާއި، ރޯދަ މަހު ރުޅި ނޭރުވުމަށް, ރޯދަ މަސް ފެށުމުގެ މާކުރިން ފެށިގެން ބައެއް ފަރާތްތަކުން ބުނާ އަޑު އިވޭނެއެވެ. އެފަދަ ޕޯސްޓުތައް ސޯޝަލް މީޑިއާގައިވެސް ދައުރުވާލެއް މަދެއް ނޫނެވެ. މުޖުތަމައުގެ ބައެއް ފަރާތްތަކުގެ ގަބޫލުކުރުމެއްގެ ގޮތުގައި މި އޮންނަނީ, ރޯދައަށް ހުރުމަކީ މީހާ އާދަޔާ ޚިލާފަށް ރުޅި އަންނަން ޖެހޭ ކަމެއްކަމަށެވެ.
ރޯދައަށް ހުންނައިރު ތިމާއަށް ހެދޭ ހުރިހާ ގޯސްތަކަކީ ރޯދައިގެ ސަބަބުން ވާ ކަންކަންކަމަށް ބުނުމަކީ އަދި އެންމެ ރަނގަޅު ގޮތެއް ކަމަކަށް ނުފެނެއެވެ. ސަބަބުތަކެއް ނެތިއެއް ނޫނެވެ.
ރަމަޟާން މަހަކީ މީހާ އިތުރަށް ހިތްތިރިވެ، މަޑުމައިތިރިވާން ޖެހޭ މަހެވެ. މީހުންނަށް އޯގާތެރިވެ، ހިތްހެޔޮވާން ޖެހޭ މަހެވެ. ނުކައި އެތައް ގަޑިއިރަކު ހުންނައިރުވެސް، މީހާއަށް ރޫހާނީ ގޮތުން ބާރުވެރިކަން ލިބިދެނިވި މަހެކެވެ. ވީއިރު، "ރޯދަ ތަންކޮޅޭ" ބުނެ، މި ބަރަކާތްތެރި މައްސަރަކީ މީހާއަށް ނުތަނަވަސްކަމާއި ހާސްކަން ލިއްބައިދޭ މަހެއްގެ ގޮތުގައި ނޭނގި ނަމަވެސް މި ސިފަކުރާ ކުރުން ނިމުމަކަށް ގެންނަންވެއްޖެއެވެ.
