ރަސްފަރީ ފަރަށް އެރި ބޯޓުން ޖޫރިމަނާގެ ފައިސާ ދައްކައިފި

ރަސްފަރި ފަރަށް އެރި ބޯޓުން ޖޫރިމަނާގެ ފައިސާ ދައްކާފައިވާ ކަމަށް އެންވަޔަރަމެންޓަލް ޕްރޮޓެކްޝަން އެޖެންސީ (އީޕީއޭ)ގެ ޑިރެކްޓަރު ޖެނެރަލް އިބްރާހީމް ނައީމް ވިދާޅުވެއްޖެއެވެ.

ކ. ރަސްފަރީގެ ހުޅަނގު ފަރާތު ފަރަށް އެރި ކާގޯ ބޯޓުގެ ސަބަބުން 893 މިލިއަން ރުފިޔާގެ ގެއްލުން ލިބިފައިވީ ނަމަވެސް ދިވެހިރާއްޖޭގެ ތިމާވެށި ރައްކާތެރިކޮށް ދެމެހެއްޓުމާބެހޭ ޤާނޫނުގެ ދަށުން ހެދިފައިވާ ތިމާވެއްޓަށް ދޭ ގެއްލުންތަކަށް ޖޫރިމަނާ ކަނޑައެޅުމާއި ބަދަލު ހޯދުމުގެ ޤަވާޢިދުގެ ދަށުން އެއްސަތޭކަ މިލިއަން ދިވެހި ރުފިޔާ އިން ރަސްފަރީގެ ފަރަށް އެރި "އެމް.ވީ ނެވިއޯސް އެމެރައިލިސް" ނަމަކަށް ކިޔާ އުޅަނދުގެ ވެރިފަރާތް ވަނީ ޖޫރިމަނާކޮށްފައެވެ.

ރާއްޖެޓީވީގެ ފަލަސުރުހީ ޕްރޮގްރާމުގައި ނައީމް ވިދާޅުވީ ބޯޓުތައް ފަހަރަށް އަރައިގެން ލިބޭ ގެއްލުން އެންމެ ފުރިހަމައަށް ނުބެލޭ ކަމަށެވެ. ފަރަށް ލިބޭ ގެއްލުން ބަލަނީ އެންމެ ކައިރީގައި ހުރި މުރަކަ ހުރި މިންވަރަށް ބަލައިގެން ކަމަށްވާއިރު ފަރަށް ލިބޭ ގެއްލުން ބަލަނީ ފޯމިއުލާއެއް ބޭނުންކޮށްގެން ކަމަށް ވެސް ވިދާޅުވިއެވެ. އެގޮތުން އެތަނުގައި ހުރި ދިރޭ މުރަކައިގެ ނިސްބަތަށް ބެލުމަށްފަހު ފޯމިއުލާ ބޭނުންކުރާ ކަމަށް ނައީމް ވިދާޅުވިއެވެ. އެގޮތުން ފޯމިއުލާ ބޭނުންކުރުމުން ޖޫރިމަނާގެ އަދަދު ވަރަށް ބޮޑުކޮށް އަންނަ ކަމަށާއި އެހެންނަމަވެސް ޖޫރިމަނާ ކުރުމުގެ އެންމެ ބޮޑު އަދަދަކަށް އޮންނަނީ 100 މިލިއަން ރުފިޔާ ކަމަށް ވިދާޅުވިއެވެ.

ސަރުކާރުން ރެސްޓޮރޭޝަން ޓްރަސްޓް ފަންޑްގެ ނަމުގައި ފަންޑެއް ހުޅުވާފައިވާ ކަމަށާއި ރަސްފަރި ފަރަށް އެރި ބޯޓުން ފައިސާ ޖަމާކޮށްދީފައިވާ ކަމަށާއި އެ ފައިސާއިން ރަސްފަރި ފަރު އަލުން އިޔާދަކުރުމަށްޓަކައި ކުރަންޖެހޭ މަސައްކަތްތައް ކުރުމަށް ނިންމާފައިވާ ކަމަށް ނައީމް ވިދާޅުވިއެވެ.

އެ އުޅަނދު ފުންކޮށް ނިމުމުން އެ ސަރަޙައްދުގެ ތިމާވެއްޓަށް ލިބުނު ގެއްލުންތައް ބެލުމަށް އީޕީއޭއާއި އެމްއެންޑީއެފް ގުޅިގެން އެ ސަރަޙައްދު ބަލައި ސާރވޭ ކުރުމުގެ މަސައްކަތް ވަނީ ކުރިއަށް ގެންގޮސްފައެވެ. އެކަމާ ގުޅޭ ފަހުގެ ތަފްސީލުތައް ހިއްސާކޮށް އީޕީއޭއިން ބުނީ، މިހާތަނަށް ބެލި ބެލުމުން އެ ފަރުގެ 8867 އަކަމީޓަރުގެ ސަރަޙައްދަކަށް ބޮޑެތި ގެއްލުންތަކެއް ލިބިފައިވާކަން ފާހަގަވާ ކަމަށެވެ.

މި ހާދިސާ ހިނގުމުގައި ބޯޓުގެ ކެޕްޓަންގެ ވަރަށް ބޮޑު އިހުމާލެއް އޮތްކަން ފާހަގަކުރެވުނު ކަމަށް މި ހާދިސާ ހިނގި ގޮތް ތަހުގީގުކުރުމުގައި ހަރަކާތްތެރިވި ޓްރާންސްޕޯޓް މިނިސްޓްރީީގެ ޑެޕިއުޓީ މިނިސްޓަރ ހަމަދު އަބްދުލްޣަނީ ވިދާޅުވިއެވެ. މި ބޯޓަކީ އިންޑިޔާގެ ސޫތުކުޅިން ފުރައިގެން ދެކުނު އެފްރިކާއަށް ދަތުރުކުރަމުންދިޔަ ބޯޓެކެވެ. މި ބޯޓު ފަރަށް އެރީ ބޯޓުގެ އިންޖީނުގެ ޔުނިޓު ތިނެއްގެ ހޫނުމިން މަތިވުމުން އިންޖީނު ނިއްވާލުމުގެ ސަބަބުން އުޅަނދު އޮޔާ ގޮސްގެން ކަމަށް މިހާތަނަށް ހޯދުނު ހޯދުންތަކުން ދައްކައެވެ.

ރަސްފަރީ ފަރަކީ ދިވެހިރާއްޖޭގެ ތިމާވެށި ރައްކާތެރިކޮށް ދެމެހެއްޓުމާއި ބެހޭ ގާނޫނުގެ ދަށުން 1995 އިން ފެށިގެން ހިމާޔަތްކޮށްފައިވާ ފަރެކެވެ. މިއީ ޑައިވަރުންގެ މެދުގައި މަޝްހޫރު، މާލެ އަތޮޅުގައި އޮންނަ ތިމާވެށީގެ ގޮތުން އެންމެ މުހިއްމު އެއް ސަރަޙައްދެވެ. މި ފަރުގައިވާ މުރަކައިގެ ބަގީޗާގައި، އެންމަޑި ސާފުކުރުމަށް ބޭނުންކުރާ "ކްލީނިންގ ސްޓޭޝަން" އެއްވެސް ހިމެނެއެވެ. މީގެ އިތުރުން މި ސަރަޙައްދަކީ ފަރުމަހުގެ ދިރުމުން މުއްސަނދި އަދި ރާއްޖޭގައި ހިމާޔަތްކޮށްފައިވާ މާހުޅުނބުލަނޑާއާއި، މަޑިއާއި، މިޔަރާއި، ވެލާ ފެންނަ ސަރަޙައްދެކެވެ.