މާލެސިޓީ ގެ ސިނަމާލެ ބްރިޖް ސަރަހައްދަށް އެރި ވެލާ އެޅި ބިސްތައް އެންވަޔަރަމެންޓަލް ޕްރޮޓެކްޝަން އެޖެންސީ (އީޕީއޭ)ގެ ބެލުމުގެ ދަށަށް ގެންގޮސްފައިވާއިރު އެ ބިސްތައް ވިހާނީ މި މަހުގެ ތެރޭގައި ކަމަށް ބެލެވޭ ކަމަށް އެ އެޖެންސީގެ ޑިރެކްޓަރު ޖެނެރަލް އިބްރާހީމް ނައީމް ވިދާޅުވެއްޖެއެވެ.
އީޕީއޭ އިން ވަނީ ބިސްތައް ފޯ ސީޒަންސް ކުޑަހުރާގައި ވަޅުލާފައެވެ. ނައީމް ވިދާޅުވީ އެމީހުން ބިސްވަޅުތައް ރައްކާތެރިކަމާއެކު ބަލަހައްޓަމުން ގެންދާނެ ކަމަށެވެ. 30 ނުވަތަ 45 ދުވަސް ފަހުން ވިހާނެކަން ފާހަގަކުރައްވާ ނައީމް ވިދާޅުވީ އެކަމުގެ މައުލޫމާތުތައް ހިއްސާ ކުރަމުންދާނެ ކަމަށެވެ.
މާރޗް މަހުގެ 15 ވަނަ ދުވަހު މާލޭގެ ސިނަމާލެ ބްރިޖް ސަރަހައްދަށް ވެލާ އެރުމާއެކު ފުލުހުން ވަނީ އެސަރަހައްދު ކޯޑަންއޯފް ކުރުމަށްފަހު ވެލައަށް ރައްކާތެރިކަން ދީފައެވެ. ވެލައަށް ހިމާޔަތްދިނުމަށް އީޕީއޭއިން ވަނީ ފުލުހުންނަށް އަންގާފައެވެ. އެ ދުވަހުގެ ދަންވަރުގެ ވަގުތެއްގައި ވެލާ ވަނީ ބިސް އަޅާފައެވެ. ބިސް އެޅުމަށްފަހު ވެލާ ވަނީ ފައިބައިގެންގޮސްފައެވެ. އޭގެފަހުންވެސް ފުލުހުން ދިޔައީ އެސަރަހައްދު ބަލަހައްޓަމުންނެވެ. އީޕީއޭގެ ޓީމުން ގޮސް ވެލާ އެޅި ބިސްތައް ނަގާފައިވަނީ ފަތިހު 4ވެސް ޖެހިފަހުންނެވެ.
މިއީ ފަހުގެ ތާރީޚެއްގައި ވެލައެއް މާލެއަށް އަރާ ބިސް އަޅާފައިވާ ފުރަތަމަ ފަހަރެވެ. މީގެކުރިން މިއަހަރުގެ ފެބްރުއަރީ މަހުގެ 27 ގައިވެސް މާލެއަށް ވަނީ ވެލާ އަރާފައެވެ. ނަމަވެސް އެފަހަރު ވަނީ ފުލުހުން އެވެލާ މޫދަށް ބާލާފައެވެ. އެކަމާއި ގުޅިގެން ގިނަ ބަޔެއްގެ ފާޑުކިޔުންތައްވެސް އަމާޒުވެފައިވެއެވެ.
ރަށްރަށުގައި ކުރިއަށްގެންދާ ތަރައްގީގެ އެކި ޕްރޮޖެކްޓުތަކުގެ ސަބަބުން ވެލާކަހަނބު ބިސްއަޅާ މާހައުލަށް ގެއްލުންވަމުންދާ ކަމަށް ވެސް ނައީމް ވިދާޅުވިއެވެ. ނައީމް ވިދާޅުވީ, ތަރައްގީގެ މަސައްކަތްތައް ކުރިނަމަވެސް ދިރޭ ތަކެތީގެ މާހައުލަށް ގެއްލުންނުވާނެގޮތަށް އެކަން ކުރަންޖެހޭ ކަމަށެވެ. ތަރައްގީގެ މަޝްރޫއުތަކާއެކު ވެލާކަހަނބު ފަދަ ތަކެތި ބިސް އަޅާ ތަންތަނަށްވެސް ގެއްލުންވަމުންދާކަމަށް ނައީމް ވިދާޅުވިއެވެ.
މިގޮތުން މީހުން ދިރިއުޅޭ ރަށްރަށުގެ އައްސޭރިފަށް ހިމާޔަތްކުރުމަށް ކުރިއަށްގެންދާ ޕްރޮޖެކްޓުތަކާއި އެއަރޕޯޓުތައް ތަރައްގީކުރުމުގެ މަސައްކަތްތަކުގެ ސަބަބުން ވެލާކަހަނބު ބިސް އަޅަމުންދާ ތަންތަނަށް ގެއްލުންވަމުންދާކަމަށް ނައީމް ވިދާޅުވިއެވެ. ނައީމް ވިދާޅުވީ މީގެ ކުރިން ނ. މާފަރަށްވެސް ވެލާކަހަނބު ބިސް އެޅުމަށް އަރާކަން ފާހަގަކުރެވިފައިވާކަމަށެވެ. އެހެންނަމަވެސް އެރަށުގައި އެއަރޕޯޓު ތަރައްގީކުރުމުން އެރަށަށް ބިސް އެޅުންވެސް ހުއްޓިފައިވާކަމަށް ނައީމް ވިދާޅުވިއެވެ.
އެހެންކަމުން އެތަކެތީގެ މާހައުލަށް ގެއްލުން ނުވާނެހެން ތަރައްގީގެ މަޝްރޫއުތައް ހިންގުމަށް ސަމާލުކަން ދޭންޖެހޭކަމަށް ނައީމް ވިދާޅުވިއެވެ. އަދި ވެލާ ބިސް އަޅަން އަރާ ފަޅު ރަށްރަށުގައި އެކި މަސައްކަތްތައް ކުރާއިރުވެސް އެތަކެތީގެ މާހައުލަށް ގެއްލުން ނުވާނެގޮތަށް އެކަން ކުރަން އަންގާ ކަމަށް ނައީމް ވިދާޅުވިއެވެ.
ނައީމް ވިދާޅުވީ އައްސޭރިފަށް ހިމާޔަތްކުރުމުގެ މަސައްކަތް ކުރެވޭނެ އެކި ގޮތްތައް މިހާރު އެބަހުރި ކަމަށެވެ. މިގޮތުން ވަށައިގެން ހިލަ ޖެހުމުގެ ބަދަލުގައި އައްސޭރިފަށަށް ވެލި އަޅައިގެން ގޮނޑުދޮށްތައް އެ އޮންނަ ގޮތަށް ބޭއްވުމަކީވެސް ކުރެވިދާނެ ކަމެއް ކަމަށް ނައީމް ވިދާޅުވިއެވެ. މިއީ ކޮންމެވެސް ވަރެއްގެ ޚަރަދެއް ހިނގާނެ މަސައްކަތެއްނަމަވެސް މިގޮތަށް މިކަން ކުރާނަމަ ވެލާ ކަހަނބަށް ބިސް އެޅުމަށް އަރަން ފަހި މާހައުލެއް އޮންނާނެ ކަމަށް ނައީމް ވިދާޅުވިއެވެ.
