ސިޔާސީ ގުޅުން ކަނޑާލައިގެން ލިބޭނެ އިގްތިސާދީ ފައިދާއެއް ނޯންނާނެ: ސައުދުﷲ

ގަތަރާ އެކު އޮތް ސިޔާސީ ގުޅުން ކަނޑާލައިގެން ރާއްޖެއަށް ލިބޭނެ އިގްތިސާދީ ފައިދާއެއް ނޯންނާނެ ކަމަށް މޯލްޑިވްސް ޓްރޭޑް ޔޫނިއަންގެ ސެކެޓްރީ ޖެނެރަލް ސައުދުﷲ އަހުމަދު ވިދާޅުވެއްޖެއެވެ.

ރާއްޖެ ޓީވީގެ ބޮޑުސުވާލު ޕްރޮގްރާމްގައި ބައިވެރިވެ ވަޑައިގެން ސައުދު ވިދާޅުވީ އަރަބި ބައެއް ގައުމުތަކުންނާއި ރާއްޖެއިން ގަތަރާ ގުޅުން ކަނޑާލުމުގެ ސަބަބުން ރާއްޖެއަށް ފްލައިޓް ދަތުރުކުރާ ރޫޓިންތައް ބަދަލު ވެގެންދާނެކަމަށާއި އެއާ އެކު ޓިކެޓުގެ އަގު އިންތިހާއަށް އުފުލިގެން ދާނެ ކަމަށެވެ. ސަބަބެއް ކަމުގައި ސައުދު ވިދާޅުވީ މިޑްލް އީސްޓުގައި ފަތުރުވެރިން އުފުލުމުގައި ގަތަރަކީ ވަރަށް ބޮޑު ދައުރެއް އަދާކުރާ އެއާލައިނެއް ކަމަށް ވާތީ ކަމަށެވެ.

ގަތަރު ކަހަލަ މުއްސަނދި ތަނަވަސް ގައުމަކާ ގުޅުން ކަނޑާލުމުން ސައުދު ވިދާޅުވީ ރާއްޖޭގެ އިގްތިސާދަށް ހީވެސް ނުކުރާކަހަލަ މައްސަލަތަކެއް ދިމާވާނެ ކަމަށެވެ. އެގޮތުން ރާއްޖެއަށް މިޑްލް އީސްޓް ގައުމުތަކުން އަންނަ ފަތުރުވެރިންގެ ނިސްބަތް މަދުވާނެ ކަމަށާއި ރާއްޖެއިން ގަތަރާ ގުޅުން ކަނޑާލި ދެތިން ދުވަހު ވެސް ގެސްޓުހައުސްތަކާއި ރިސޯޓުތަކުގެ ބުކިންގްސްތައް ކެންސަލްވެފައިވާ ކަމަށެވެ.

ސައުދު ވިދާޅުވީ ވޭތުވެދިޔަ 33 އަހަރުގެ ތެރޭގައި ގަތަރު ސަރުކާރުން ރާއްޖޭގައި މިސްކިތްތަކާއި ސްކޫލްތައް އަޅައި ބޮޑެތި އިންވެސްޓްމެންޓްތައް ކޮށްފައިވާ ކަމަށެވެ. އަދި ގަތަރުގެ ކުންފުންޏެއް ކަމަށްވާ އުރީދޫއަކީ ޓެލެކޮމިއުނިކޭޝަން ދާއިރާގައި ދުނިޔޭގެ ނަން މަޝްޙޫރު ތަނަކަށް ވާއިރު ރާއްޖޭގައި ވެސް އުރީދޫ އިން ޓެލެކޮމިއުނިކޭޝަންގެ ޚިދުމަތް ދޭއިރު މިކަހަލަ ބޮޑެތި އިންވެސްޓްމެންޓްތަކަކީ އެއިރެއްގައި ރާއްޖޭގައި އޮތް ސިޔާސީ ކަންތައްތަކަށް ބިނާވެ ރާއްޖެ އައިސްފައިވާ އިންވެސްޓްމަންޓްތައް ކަމަށް ސައުދު ވިދާޅުވިއެވެ. ނަމަވެސް ދެން ރާއްޖެއަށް އެކަހަލަ އިންވެސްޓްމެންޓްތަކެއް ގަތަރުން ނާންނާނެ ކަމަށް ސައުދު ވިދާޅުވިއެވެ.

މީގެ އިތުރުން ސައުދު ވިދާޅުވީ ރާއްޖެއިން މިހާރު ދަނީ ވަރަށް ހުދުމުޚުތާރު ވެރިކަމަކާ ދިމާއަށް ކަމަށާއި ދުނިޔޭގެ ބޮޑެތި ނަންކިޔާ ގައުމުތަކާ ގުޅުން ކަނޑާލުމުން ރާއްޖެއިން ވަކި ގައުމަކަށް ބަރޯސާވާން ޖެހޭނެ ކަމަށެވެ. މިއީ ދުނިޔޭގެ ޚުދުމުޚުތާރު ގައުމުތަކުން ފެންނަ އަލާމާތްތައް ކަމަށް ސައުދު ވިދާޅުވިއެވެ.

" ޖުމްލަކޮށް ބުނަންޏާ ހަގީގަތުގައި މިސަރުކާރުން މިދަނީ ހުދުމުޚުތާރު ވެރިކަމަކާ ދިމާލަށް. ދުނިޔޭގެ ބޮޑެތި ނަންކިޔާ ގައުމުތަކާއި އެކަހެރިވަމުން މިދަނީ އަޅުގަނނޑުމެން ހަގީގަތުގައި ވެސް ވަކި ގައުމަކަށް ބަރޯސާވެ އެގައުމުގެ އެހީގައި އަޅުގަނޑުމެންނަށް ތިބެވޭނެކަމަށް ރައްޔިތުން ނިކަމެތި ކޯށް ސަލާންޖަހާ ސިޔާސަތެއް އަށަގަތީމަ އަޅގަނޑުމެން ޖެހޭނެ ބޭސްސިޓީއަށް ސަލާން ޖަހަން. ޑޮކްޓަރަށް ނުދެއްކިގެން ސަލާންޖަހަން ޖެހޭނެ. ޕާޓީގެ ޕްލެޓްފޯމެއް ނެތިއްޖިއްޔާ ވަޒީފާއެއް ނުލިބޭނެ. އޭރުން ތައުލީމުގެ ބޭނުމެއް ނޯންނާނެ. މިކަހަލަ އަލާމާތް ތަކަކީ ދުނިޔޭގެ ހުދުމުޚުތާރު ގައުމުތަކުން ފެންނަން ހުރި އަލާމާތްތައް. އެ އަލާމާތްތައް މިހާރު އަޅުގަނޑުމެންނަށް ރާއްޖެއިން ފެނިގެން މިދަނީ،" ސައުދު ވިދާޅުވިއެވެ.

މީގެ އިތުރުން ސައުދު ވިދާޅުވީ ރާއްޖެއިން ގަތަރާއި އޮންނަ ސިޔާސީ ގުޅުން ކަނޑާލީ ޓެރަރިސްޓް ޖަމާއަތްތަކަށް ވާގިވެރިވާ ކަމަށް ބުނެފައި ވީނަމަވެސް އެކަމުގެ ސީދާ ހެކި ރާއްޖެއަށް ދެއްކިފައި ނުވާ ކަމަށެވެ. އަދި ބައިނަލްއަގުވާމީ ފަރާތްތަކުން އެފަދަ ގައުމުތައް ކަނޑައަޅާފައިވާއިރު ރާއްޖެއިން އަމިއްލައަށް އޭގެ ތެރެއަށް ވަދެގެން ނުވާނެ ކަމަށް ގަބޫލުކުރައްވާ ކަމަށް ވެސް ސައުދު ވިދާޅުވިއެވެ.