މެލޭޝިއާގައި ރާއްޖެ އިތުރަށް އިސްތިހާރުކުރުމަށް އެމްއެމްޕީއާރުސީން އެޕަލް ވެކޭޝަންސްއާއެކު ކެމްޕެއިނެއް ފަށައިފި

މެލޭޝިއާ މާކެޓުގައި ރާއްޖޭގެ މަޤުބޫލުކަން އިތުރުކުރުމަށް ހާއްސަ ބްރޭންޑް ވިޒިބިލިޓީ ކެމްޕެއިނެއް މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) އިން އެޕަލް ވެކޭޝަންސްއާއެކު ފަށައިފިއެވެ.

މި ކެންޕެއިން ކުރިއަށް ދާނީ މާޗު މަހުން ފެށިގެން އޭޕްރިލް މަހުގެ ނިޔަލަށެވެ.

މެލޭޝިއާގެ އެޕަލް ވެކޭޝަންސް އަކީ 1996 ވަނަ އަހަރު ޤާއިމުކޮށްފައިވާ ޓްރެވަލް އެޖެންސީއެކެވެ. މިއީ ނެޓްވޯކްތަކާއި، ޕާޓްނަރުންގެ އެހީގައި މެލޭޝިއާ އާއި ދުނިޔޭގެ އެކި ކަންކޮޅުތަކުގައި ވެކޭޝަން ޕެކޭޖުތައް ވިއްކުމުގައި ހަރަކާތްތެރިވާ ޓްރެވަލް އެޖެންސީއެކެވެ. މިއީ މަތީ ފަންތީގެ ތަފާތު ޓްރެވަލް ތަޖުރިބާތަކާއި، ގިނަ ބާވަތުގެ ޕްރޮޑަކްޓްތައް ކަސްޓަމަރުންނާއި ހަމައަށް ފޯރުކޮށްދޭ، އިތުބާރު ލިބިފައިވާ ޓްރެވަލް އެޖެންސީއެކެވެ. އެމްއެމްޕީއާރުސީއާއި އެޕަލް ވެކޭޝަންސްއިން ކުރިއަށްގެންދާ މިކެމްޕެއިންގެ ދަށުން ރާއްޖެއަކީ މެލޭޝިއާ ފަތުރުވެރިން ޒިޔާރަތްކުރުމަށް ރައްކާތެރި އަދި އެކަށީގެންވާ މަންޒިލެއްގެ ގޮތުގައި އިޝްތިހާރުކުރެވޭނެއެވެ. މި ކެންޕެއިނަކީ ދެކުނުއިރުމަތީ އޭޝިއާގައި ރާއްޖެ ޕްރޮމޯޓުކުރުމަށް އެމްއެމްޕީއާރުސީން ގެންގުޅޭ ސްޓްރެޓަޖީގެ ދަށުން ހިންގޭ ކެންޕެއިންނެވެ. ދެކުނުއިރުމަތީ އޭޝިއާގެ މާކެޓުގައި ރާއްޖެ ޕްރޮމޯޓުކުރުމަށް އެމްއެމްޕީއާރުސީން ގެންގުޅޭ ސްޓްރެޓަޖީ ބިނާވެފައިވަނީ ރާއްޖޭގެ ފަތުރުވެރިކަމުގެ އެކި ކެޓަގަރީތައް މާކެޓް ކުރުމަށެވެ.

ދުނިޔޭގެ ލީޑީންގް ޑެސްޓިނޭޝަނެއްގެ ގޮތުން ރާއްޖެއިން ލިބެން ހުރި ތަފާތު ތަޖުރިބާތައް މި ކެމްޕޭންގައި އިޝްތިހާރުކުރެވޭނެއެވެ. ހަމަ އެއާއެކު، އާއިލާތަކާއި މުސްލިމް ފަތުރުވެރިންނަށް ހުރި ފުރުސަތުތައް ހިމެނިގެންދާނެއެވެ. އަދި ކަނޑުއަޑިއާއި، ލޯކަލް އަދި ހަނީމޫން ޓޫރިޒަމް ސެގްމެންޓުގައި ރާއްޖެއިން ލިބެން ހުރި ފުރުސަތުތައް މި ސްޓްރެޓަޖީގެ ދަށުން އިޝްތިހާރުކުރުމަށް އިސްކަންދޭނެއެވެ. މީގެ އިތުރުން ރާއްޖޭގެ ފަތުރުވެރިކަމުގެ ހިދުމަތްދޭ ރިސޯޓް، ހޮޓެލް، ގެސްޓްހައުސް، ހޯމްސްޓޭ އަދި ލިވަބޯޑުތަކުގައި ފަތުރުވެރިންނަށް ލިބެން ހުރި ފުރުސަތުތަކާއި، ތަފާތު ތަޖުރިބާތައް މާކެޓްކުރެވޭނެއެވެ.

މި ކެމްޕެއިންގެ ދަށުން ހިންގާ ހަރަކާތްތަކުގެ ތެރޭގައި ރާއްޖޭގެ ފަތުރުވެރިކަމާއި ބެހޭ މައުލޫމާތާއި، އެންމެ ފަހުގެ ޓްރެވަލް ގައިޑްލައިންތަކާއި، އެހެނިހެން މުހިއްމު ތަފްސީލް ހިމެނޭ އާޓިކަލްތައް މެލޭޝިއާގެ ފަތުރުވެރިކަމާބެހޭ މައުލޫމާތު ފަތުރާ މައި އޮންލައިން ޕްލެޓްފޯމްތައް ކަމަށްވާ "ކަމް އޮން ލެޓްސް ޓްރެވަލް" އަދި "އޯމައިނިއުސް" ގައި ޝާއިޢުކުރާނެއެވެ. އަދި، ރާއްޖޭގެ ވީޑިއޯ އިޝްތިހާރުތައް އެޕަލް ޓީވީ އެފްބީ ލައިވްގައި ދެއްކުމުގެ އިތުރުން، އެޕަލް ވެކޭޝަންސްގެ ކްލައިޓުންނަށް އީމެއިލްގެ ޒަރިއްޔާއިން ރާއްޖޭގެ މައުލޫމާތު ފޯރުކޮށްދޭނެއެވެ. މީގެ އިތުރުން، ރާއްޖޭގެ އިޝްތިހާރު އެޕަލް ވެކޭޝަންސްގެ ވެބްސައިޓުގައި ޖެހުމާއި، ފޭސްބުކް އަދި އިންސްޓަގްރާމް ފަދަ ޕްލެޓްފޯމްތަކުގައި ރާއްޖޭގެ ޕޯސްޓްތައް ޝާއިޢުކުރާނެއެވެ.

ކޮވިޑްގެ ސަބަބުން 2020 އަދި 2021 ވަނަ އަހަރު މެލޭޝިއާގެ ބޯޑަރު އޮތީ ގިނަ ދުވަސްތަކަކަށް ބަންދުކޮށްފައެވެ. މިހާރު މެލޭޝިއާ މިވަނީ ބައިނަލްއަޤްވާމީ އިންބައުންޑް އަދި އައުޓްބައުންޑް ފަތުރުވެރިކަމަށް ހުޅުވާލާފައެވެ. މި މާކެޓުގެ ޤައުމުތަކުގައި ރާއްޖޭގެ މަޤުބޫލުކަން ދެމެހެއްޓުމަށާއި، ރާއްޖެ އަންނަ ފަތުރުވެރިންގެ އަދަދު އިތުރުކުރުމަށް މިދިޔަ އަހަރު އެމްއެމްޕީއާރުސީއިން ވަނީ ގިނަ ހަރަކާތްތަކެއް ހިންގާފައެވެ. މިގޮތުން ޓްރިޕްޒިއްލާ އަދި ޓްރެވަލް ވީކްލީ އޭޝިއާއާއެކު ވަނީ ހާއްސަ ކެމްޕެއިންތައް ހިންގާފައެވެ. މި އަހަރު މި މާކެޓަށް ހާއްސަކޮށް އެމްއެމްޕީއާރުސީއިން ހިންގަން ރާވާފައިވާ ހަރަކާތްތަކުގެ ތެރޭގައި ޓްރިޕްޒިއްލާ، ހިޕްވީ، އަދި މޯލްޑިވްސް އީ-ލާނިން ޕްރޮގްރާމް ފާހަގަކޮށްލެވެއެވެ. އަދި މީގެއިތުރުން މާޓާ ފެއަރ، މެލޭޝިއާ ޑައިވް އެކްސްޕޯ (މައިޑް) އަދި ތައިލެންޑް ޑައިވް އެކްސްޕޯގައި ބައިވެރިވެ، ދިވެހިރާއްޖެ މާކެޓްކުރުމަށް ހަމަޖެހިފައިވެއެވެ.

ދުނިޔޭގެ ފެންވަރުގައި ރާއްޖެ އިޝްތިހާރުކުރުމުގެ ޒިންމާ އުފުލާ ކުންފުނީގެ ހައިސިއްޔަތުން އެމްއެމްޕީއާރްސީ އިން ވޭތުވެދިޔަ އަހަރު ކޮށްފައިވާ މަސައްކަތްތަކަށް ބަލާއިރު، އިންޑަސްޓްރީގެ ޕާޓްނަރުންނާއެކު 22 މާކެޓެއްގައި 260 ހަރަކާތް ވަނީ ހިންގާފައެވެ. މީގެތެރޭގައި ފެއާރތަކާއި އެގްޒިބިޝަންތަކުގައި ބައިވެރިވުމުގެ އިތުރުން، އެކި ޤައުމުތަކުގައި ރޯޑްޝޯތައް ވެސް ވަނީ ބާއްވާފައެވެ. އަދި ވެބިނާތަކާއި، ފެމިލަރައިޒޭޝަން ދަތުރުތަކުގެ އިތުރުން މާކެޓިން ކެމްޕެއިންތައް ވަނީ ހިންގާފައެވެ. ދުނިޔޭގެ ހުރިހާ ކަންކޮޅެއްގައިވެސް ރާއްޖެއަކީ ފަތުރުވެރިންގެ އިތުބާރު ލިބިފައިވާ މަންޒިލެއްކަމަށް ހެކިވާ އެންމެ އަލިގަދަ ނިޝާނަކަށް ވެގެންދިޔައީ، 'ވޯލްޑް ޓްރެވަލް އެވޯރޑްސް' (ޑަބްލިއުޓީއޭ) 2021ގައި 'ވޯލްޑްސް ލީޑިންގް ޑެސްޓިނޭޝަން' ގެ ލަގަބު ޖެހިޖެހިގެން ދެވަނަ އަހަރަށް ރާއްޖެއަށް ކާމިޔާބު ކުރެވުނުކަމެވެ. މީގެ އިތުރުންވެސް ދިވެހިރާއްޖެއިން ވަނީ ޑަބްލިއުޓީއޭ 2021ގައި އެތައް ޙާއްސަ އެވޯޑްތަކެއް ޙާސިލްކޮށްފައެވެ.

ކުރިޔަށް މިދާ އަހަރަކީ ދިވެހިރާއްޖޭގެ ފަތުރުވެރިކަމުގެ ތާރީޙުގައި ވަރަށް ޙާއްސަ އަހަރެކެވެ. ރާއްޖޭގެ ފަތުރުވެރިކަމަށް 50 އަހަރު ފުރުން ފާހަގަކުރުމުގެ ޙާއްސަ ހަރަކާތްތައް މިދިޔަ އަހަރު ފަށައިގަތީ ކުލަގަދަ ހަރަކާތްތަަކާއި އެކުގައެވެ. އެމްއެމްޕީއާރްސީގެ ފަރާތުން ރާއްޖޭގެ ޓޫރިޒަމްގެ ރަން ޔޫބީލް ފާހަގަކުރުމަށް އެތައް ހަރަކާތްތަކެއް ތާވަލް ކޮށްފައިވެއެވެ. މީގެ ތެރޭގައި، 2022ވަނަ އަހަރުގެ ފުރަތަމަ ކުއާޓަރުގައި އެކަނިވެސް 60 އިން-ޕާރސަން ހަރަކާތް ބޭއްވުމަށް ހަމަޖެހިފައިވެއެވެ. މީގެ ތެރޭގައި 11 ފެއާރ އާއި ރޯޑްޝޯތަކާއި އެހެނިހެން ހަރަކާތްތައް ފާހަގަކޮށްލެވެއެވެ.