އާރަށު ހިޔާނާތުގެ ދައުވާއިން ދިފާއުވުމަށް ޔާމީނު 18 ހެއްކެއް ހުށައަޅުއްވައިފި
ދެން އަޑުއެހުމެއް އޮންނާނީ 18 އޭޕްރީލްގައި
ރައީސް ޔާމީނުގެ މައްޗަށް އުފުލާފައިވާ ދައުވާތަކުގެ އަޑުއެހުންތައް ކްރިމިނަލް ކޯޓުގައި ދަނީ ކުރިއަށް
ފެލިދެއަތޮޅު އާރަށް ތަރައްގީކުރުމަށް ހިންގި މުއާމަލާތުގެ ތެރެއިން, މަގާމުގެ ނުފޫޒު ބޭނުންކޮށްގެން ރިޝްވަތު ނެގި މައްސަލައިގެ އަޑުއެހުމެއް ބުރާސްފަތި ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
މި އަޑުއެހުން ކުރިއަށް ގެންދިޔައީ ރައީސް ޔާމީނާއި، މި މައްސަލައިގައި ރިޝްވަތު ދިނުމުގެ ކުށުގެ ދައުވާ އުފުލާފައިވާ ޔޫސުފް ނައީމްގެ މައްސަލަވެސް އެކުއެކީގައެވެ. މި އަޑުއެހުމުގައި އޮތީ ދިފާއީ ހެކި ހާމަކުރުމެވެ.
އެހެންނަމަވެސް، އަޑުއެހުން ފައްޓަވަމުން ރައީސް ޔާމީނުގެ ޤާނޫނީ ވަކީލުންގެ ޓީމުން ވަނީ މި މައްސަލައިގެ އަޑުއެހުންތައް ލައިވް ކުރުމުގެ ކަންކަން ގޮސްފައިވާ ހިސާބެއް ސާފުކުރައްވާފައެވެ. މި އަޑުއެހުމުގައި ރައީސް ޔާމީނުވެސް ވަނީ އެމަނިކުފާނަށް އޮތް ރައްކާތެރިކަމަކީ މި ޝަރީއަތް ލައިވްކޮށްގެން ކުރިއަށް ގެންދިޔުން ކަމުގައި ވިދާޅުވެ، އެކަމަށް ސާފު ޖަވާބެއް ޝަރީއަތުން ދެއްވުމަށް އެދިވަޑައިގެންފައެވެ.
އެކަމާއި ގުޅޭގޮތުން މައްސަލަ ބައްލަވާ ގާޒީ އަހުމަދު ޝަކީލް ވިދާޅުވީ، ޝަރީއަތުން ކުރިންވެސް އެކަމަށް ޖަވާބު ދެއްވާފައިވާނެ ކަމަށެވެ. އެގޮތުން މި މައްސަލައިގެ އިބްތިދާއީ މަރުޙަލާ ނިމި، ޝަރީއަތް ފެށެންވާއިރަށް އަޑުއެހުންތައް ލައިވް ކުރެވޭނެކަމަށް ޤަބޫލު ކުރައްވާކަމަށް ގާޒީ ވިދާޅުވިއެވެ. އެގޮތަށް ނުވި ނަމަވެސް، ޝަރީއަތް ފެށުމުގެ މަރުޙަލާއާއި ހިސާބަށް ދިޔުމުން، އަޑުއެހުންތައް ފަސް ކުރުމަކީވެސް މަޝްވަރާ ކުރެވިދާނެ ކަމެއްކަމަށް ގާޒީ ވިދާޅުވިއެވެ.
މި އަޑުއެހުމުގައި ދެން އޮތީ ދިފާއީ ހެކި ހާމަކުރުމެވެ. އެގޮތުން ރައީސް ޔާމީނުގެ ފަރާތުން 18 ހެއްކެއް ހުށައަޅާފައިވާއިރު، އޭގެ ތެރޭގައި ހިމެނެނީ ޝަފަހީ 7 ހެއްކާއި، ކިތާބީ 11 ހެއްކެކެވެ. ރައީސް ޔާމީނުގެ ފަރާތުން ހުށައެޅުއްވި ކިތާބީ ހެކިތަކުގެ ތެރޭގައި ޑޮލަރު ވިއްކި ކަމުގެ ލިޔުމެއް ހިމެނުނު ނަމަވެސް، އެއީ ކޮން ތާރީޚެއްގެ މުއާމަލާތެއްކަން އެނގެން ނެތުމުން، އެކަން ޝަރީއަތުގެ ކުރީގެ ހުށައެޅުމެއްގެ ގޮތުގައި ހުށައަޅުއްވާނެކަމަށް މި އަޑުއެހުމުގައި ދައުލަތުގެ ވަކީލާ ވިދާޅުވިއެވެ.
އެއަށްފަހު ޔޫސުފް ނައީމްގެ ފަރާތުން 13 ހެއްކެއް ހުށައަޅާފައިވާއިރު، އޭގެ ތެރޭގައި ހިމެނެނީ 3 ޝަފަހީ ހެއްކާއި، 10 ކިތާބީ ހެއްކެކެވެ.
ދެ ފަރާތުން ހެކި ހާމަކުރުމުން މައްސަލަ ބައްލަވާ ގާޒީ ވަނީ މިއީ މަދަނީ މިންގަނޑުން ކުރިއަށް ގެންދެވިދާނެ ދައުވާއެއްތޯ ކަނޑައެޅުމުގެ ކުރިން، އެކަމާއި ގުޅިގެން ވާހަކަދެއްކުމަށް ދެފަރާތަށްވެސް ފުރުސަތެއް ދެއްވާފައެވެ. އެހެންނަމަވެސް، ދިފާއުން ވަނީ އެކަމާއި ގުޅިގެން ވާހަކަ ދެއްކުމަށް އިތުރު އަޑުއެހުމެއް ތާވަލުކޮށްދެއްވުމަށް އެދިފައެވެ. އަދި ދައުލަތުންވެސް ވަނީ، ދެފަރާތުން ވާހަކަ ދެއްކުމުގެ ފުރުސަތު ގާޒީ ދެއްވި ނަމަވެސް، މިއީ ތަފްސީލީ ގޮތެއްގައި ހެއްކާއި ގުޅޭގޮތުން ވާހަކަ ދެއްކޭނެ މަރުޙަލާއެއް ނޫންކަން ހައިކޯޓުން ދާދި ފަހުން ނިންމި ގަޒިއްޔާއަކާއި ޙަވާލާދީ ހަނދާން ކޮށްދީފައެވެ.
މިކަމާއި ގުޅިގެން މައްސަލަ ބައްލަވާ ގާޒީ ވަނީ މިއީ މަދަނީ މިންގަނޑުން ކުރިއަށް ގެންދެވިދާނެ ދައުވާއެއްތޯ ކަނޑައެޅުމުގެ ކުރިން އެކަމާއި ގުޅިގެން ވާހަކަ ދެއްކުމަށް 18 އޭޕްރީލްގައި އަޑުއެހުމެއް ބޭއްވުމަށް ނިންމަވާފައެވެ.
